[Kuldīgā, 1305.gada 18.februārī]
______________________________________________________________________________

Universis Christi fidelibus, ad quos presens scriptum pervenerit, frater Borchardus miseracione divina Curoniensis ecclesie episcopus, frater Bertoldus prepositus totumque capitulum eiusdem ecclesie salutem in vero salutari. Actiones, quas mundus ordinat, sepe delet successus temporis, nomina firmentur firmo karactere litterarum. Sciat ergo presentis et futuri temporis posteritas, quod nos unanimo consensu ad peticionem preceptoris fratrum per Lyvoniam et marscalci terre eiusdem, fratris Hoyeri comendatoris Rigensis, fratris Rodolfi commendatoris in Goldingen, fratris Wernheri capellani magistri dicti, fratris Reynfridi advocati in Goldingen ceterorumque discretorum fratrum viris honestis Hinrico de Helmede, Bernhardo dicto Gang, Conrado dicto Meye, Theoderico dicto Sperlinc et Theoderico cognato eiusdem et Frederico de Rincstide castrum Sacke cum omnibus suis pertinenciis, item castrum Zintere cum omnibus pertinenciis suis, exceptis Prusse et Karkele et eis attinentibus, item quidque cedit ecclesie nostre de Adzen, contulimus ipsis et suis legitimis pro [!] heredibus iure pheodali perpetuo possidenda adiecta hac condicione, ut antedicti a data presencium infra IIII annos in prenominatis locis residenciam faciant personalem, alioquin huiusmodi donacionem secernimus iritam penitus et inanem. In eius rei testimonium presens scriptum fecimus sigillorum nostrorum munimine roborari. Datum in Goldingen anno domini MCCCV-o feria quinta post Septuagesimam. Salvo tamen iure antiquorum infeodatorum in eis locis.
______________________________________________________________________________

Avots: Zeids, T. Trīs dokumenti par feodālā īpašuma attīstību Kursā. Grām.: Vēstures problēmas. 4.sējums. Rīga: Latvijas PSR Zinātņu akadēmija, 1961. 7.-8.lpp.

Dokumenta tulkojums latviešu valodā

Ievietots: 16.08.2001.

HISTORIA.LV