(08031.) Zû ôstern dar nâch zû hant

(08032.) besante er aber sîne lant.

(08033.) dô quâmen im die brûdere sîn,

(08034.) daß lantvolk und die pilgerîn.

(08035.) mit schiffen vûr er ûf die vart

(08036.) hin zû Mezoten wart.

(08037.) dô er quam in daß lant,

(08038.) die burc die gab sich zû hant

(08039.) ûf des meisters gnâde dô.

(08040.) des wart daß her gemeine vrô.

(08041.) der brûdere her vûrte von dan

(08042.) wîb, kindere und man

(08043.) und waß sie gûtes vunden,

(08044.) daß wart in zû den stunden

(08045.) und vûren vrôlîchen wider.

(08046.) eß stûnt unlange sider,

(08047.) ein her wart aber ûß gesant

(08048.) in der Semegallen lant.

(08049.) daß her zu Terweten quam,

(08050.) von der burge eß nam

(08051.) rasche Semegallen dô

(08052.) unde ranten alsô

(08053.) vaste hin zû Ratten wart.

(08054.) daß hûs wart gewunnen mit der vart,

(08055.) daß verbranten sie vil gar

(08056.) und nâmen in ir schar

(08057.) alleß, daß sie vunden

(08058.) dar inne zû den stunden.

(08059.) dô daß hûs was verbrant,

(08060.) dô reit daß her zû Nieflant.

(08061.) den Semegallen wart gâch

(08062.) in kurtzer wîle dar nâch

(08063.) wider zû der cristenheit.

(08064.) eß was in von hertzen leit,

(08065.) waß sie hatten vor getân.

(08066.) um einen zins sie bâten sân,

(08067.) daß sie mûsten den geben

(08068.) und in der brûdere vride leben.

(08069.) der meister der gab in sider

(08070.) um den zins den vride wider.

(08071.) des wâren sie alle vrô.

(08072.) Eine grôße sûche den meister dô

(08073.) bevienc an sînem lîbe.

(08074.) die dâchte er sô vertrîbe

(08075.) und vûr zû dûtschen landen wart.

(08076.) der wec von im wart ungespart.

(08077.) eß hatte in Nieflande

(08078.) gegân im wol zû hande:

(08079.) er was gewesen, daß ist wâr,

(08080.) meister dâ drittehalbeß jâr.

(08081.) dô er zû dûtschen landen quam

(08082.) und der meister in vernam,

(08083.) des amtes er in erließ,

(08084.) zû Marcburc er in varen hieß.

(08085.) dâ vûr er mit willen hin:

(08086.) in den konvent stûnt sîn sin.

(08087.) ein ander brûder wart gekorn.

(08088.) under des wâren verlorn

(08089.) zû Nieflande brûdere gût.

(08090.) zû Lettowen stûnt ir mût.

(08091.) vumfzehn was ir an der zal,

(08092.) alsus nâmen sie den val.

(08093.) die brûdere wolden schowen

(08094.) daß lant zû Lettowen,

(08095.) dâ wolden sie gewinnen gût.

(08096.) die Lettowen ouch den mût

(08097.) hatten in der brûdere lant.

(08098.) die wege wurden in bekant,

(08099.) die die brûdere ritten dar.

(08100.) sie jageten nâch mit starker schar.

(08101.) die brûdere wâren dô gelegen

(08102.) durch rûwe ein teil gemaches pflegen,

(08103.) die slûgen sie ungewarnet tôt.

(08104.) ein teil quam ir abe mit nôt,

(08105.) doch wart ir ein gevangen.

(08106.) sus was der strît ergangen.

(08107.) ein vromer helt wart ouch geslagen,

(08108.) den noch die cristen mûßen clagen:

(08109.) Suxe was er genant.

(08110.) er quam in der brûdere lant,

(08111.) dô entpfienc er den cristentûm

(08112.) durch got und nicht durch rûm.

(08113.) er hâtte maniche herevart

(08114.) geriten kegen Lettowen wart.

(08115.) er was von Lettowen gebora,

(08116.) ein helt kûne und ûß erkorn.

(08117.) mûter, maget Marîe

(08118.) edele unde vrîe

(08119.) hilf sîner sêle ûß aller nôt,

(08120.) er bleib in dîme dienste tôt!

(08121.) Die Lettowen wurden vrô.

(08122.) zû hant dar nâch sie sûchten dô

(08123.) des somers der brûdere lant.

(08124.) daß wart den brûderen bekant.

(08125.) sie jageten ernstlîchen nâch

(08126.) tag und nacht; in was vil gâch,

(08127.) biß daß sie sie quâmen an.

(08128.) strîtes man mit in began.

(08129.) dâ bliben sechs hundert tôt.

(08130.) die Lettowen durch die nôt

(08131.) vlohen hin zû lande.

(08132.) sie ließen dâ zû pfande

(08133.) von iren henden manchen man,

(08134.) der ich nicht genennen kan.

(08135.) sie ließen ouch die pferde dâ

(08136.) (der strît was ûf der Dubenâ:

(08137.) ich wil ûch allen tûn bekant,

(08138.) ein waßßer ist alsô genant)

(08139.) und liefen zû lande wider.

(08140.) der brûdere her daß teilte sider

(08141.) den roub, den sie dâ nâmen.

(08142.) dar nâch sie alle quâmen

(08143.) mit irme roube zû Rîge vrô.

(08144.) sie sageten gote von himele dô

(08145.) aller sîner genâden danc.

(08146.) er ist wert, daß man âne wanc

(08147.) im sage lob und êre

(08148.) nû und immer mêre.

(08149.) Der hôhe meister mit râte nam

(08150.) einen brûder lobesam

(08151.) und sante in hin zû Nieflant.

(08152.) daß amt er an sîne hant

(08153.) bevalch nâch des ordens site.

(08154.) dâ schîden sie sich mite.

(08155.) der meister von Nieflant

(08156.) kein sîme lande reit zû hant.

(08157.) dô er dô zû Rîge quam,

(08158.) zû meistere man in gerne nam,

(08159.) wan er was in wol bekant:

(08160.) brûder Ernst was er genant.

(08161.) er geviel den lûten wol,

(08162.) er was aller tugende vol;

(08163.) daß wart dicke von im schîn.

(08164.) er was ein trôst den vrûnden sîn,

(08165.) dêmûtik und wol gezogen.

(08166.) daß lant was gar unbetrogen

(08167.) die wîle er dâ meister hieß.

(08168.) an wârheit er sich vienden ließ.

(08169.) Meister Ernste an den mût

(08170.) quam ein gedanke, der was gût,

(08171.) den ließ er harte wol verstân

(08172.) sîne kummentûre sân.

(08173.) die kummentûre quâmen,

(08174.) dô sie die rede vernâmen,

(08175.) zû Rîge mit iren lûten dô.

(08176.) des was meister Ernst vrô.

(08177.) dô daß her zû samne quam,

(08178.) zû hant meister Ernst nam

(08179.) und vûr vaste die Dune hin:

(08180.) zû Duneburc stûnt sîn sin.

(08181.) er was an râte sô clûc,

(08182.) daß er vûrte spîse gnûc.

(08183.) dô daß her dô alleß quam

(08184.) um den berc, der meister nam

(08185.) mit sînen brûderen den rât:

(08186.) “mîn mût zû disem berge stât,

(08187.) dar ûf sal man bûwen

(08188.) eine burc, daß sal berûwen

(08189.) her nâch vil manchen heiden

(08190.) und ouch den kunic Thoreiden.”

(08191.) die burc wart vil drâte

(08192.) nâch der brûdere râte

(08193.) ûf den berc gebûwet gût.

(08194.) des vreute sich ir aller mût.

(08195.) armbruste unde pfîle

(08196.) in vil kurtzer wîle

(08197.) unde spîse genûc,

(08198.) alsô der burge was gevûc,

(08199.) brâchte man ûf die vesten.

(08200.) man satzte dar ûf die besten,

(08201.) die man vant in deme her

(08202.) und ouch tochten zû der wer,

(08203.) an brûderen und an knechten.

(08204.) welch lantman kunde vechten,

(08205.) der wart ûf die burc gelân.

(08206.) der meister mit dem here sân

(08207.) kârte kein Rîge wider.

(08208.) In vil kurtzer wîle sider

(08209.) quam der kunic Thoreiden,

(08210.) mit im vil manich heiden,

(08211.) vor Duneburc gerennet:

(08212.) er wolde sie hân verbrennet.

(08213.) dô er die burc sô vaste vant,

(08214.) er ließ bûwen zû hant

(08215.) vier blîden harte grôß.

(08216.) die ûf der burge des verdrôß.

(08217.) Rûßen schutzen wâren komen

(08218.) kunige Thoreiden zû vromen.

(08219.) sie wunten manchen mit ir bogen,

(08220.) doch wurden sie dar an betrogen:

(08221.) wer ûf der burge wart gewunt

(08222.) der wart schîre gesunt.

(08223.) die von der burge schußßen wider,

(08224.) manchen heiden sie dar nider

(08225.) velleten in vil kurtzer stunt,

(08226.) der wênic keiner wart gesunt.

(08227.) die blîden alle viere

(08228.) begunden werfen schiere;

(08229.) die wurfen tac und nacht

(08230.) grôße steine mit ir macht.

(08231.) die heiden vûrten steine zû

(08232.) beide spâte und vrû.

(08233.) vor wâr ich daß sprechen wil,

(08234.) sie wurfen abe der blancken vil

(08235.) alumme die burc her und dar.

(08236.) die brûdere nâmen des war

(08237.) und butzten vaste vure,

(08238.) daß man die burc icht verlure.

(08239.) der sturm werte endelîche

(08240.) tac und nacht gelîche

(08241.) gantzer vier wochen.

(08242.) vil manich houbet zubrochen

(08243.) sach man in der heiden her,

(08244.) daß quam von der brûdere wer.

(08245.) wunder was, daß genas

(08246.) wer vor in ûf der burge was,

(08247.) von der macht, die dar umme lac

(08248.) beide nacht und tac.

(08249.) Dô kunic Thoreiden wart gewar,

(08250.) daß er mit sîner grôßen schar

(08251.) der burc nicht mochte gewinnen

(08252.) mit alle sînen sinnen,

(08253.) er sprach: “nû mûß ich smertzen

(08254.) tragen an mînem hertzen.

(08255.) ir heiden mir getrûwet,

(08256.) diß hûs ist gebûwet

(08257.) mitten ûf daß hertze mîn.

(08258.) nû mûß ich immer lîden pîn

(08259.) die wîle ich lebe, sunder wanc;

(08260.) mîn vreude die ist wurden cranc.

(08261.) waß hilfet, daß ich lenger ligen?

(08262.) der heiden hant wil mîn verzigen

(08263.) und sint zû lande wider.

(08264.) howet nû die blîden nider,

(08265.) ich wil zû lande kêren.

(08266.) mîn sorge mûß sich mêren.”

(08267.) die Lettowen wurden vrô,

(08268.) sie trâten an die blîden dô

(08269.) und zuhiwen schiere

(08270.) die blîden alle viere

(08271.) und vûren zû lande

(08272.) mit jâmer mancher hande.

(08273.) Die brûdere alle wurden vrô,

(08274.) die ûf der burge wâren dô,

(08275.) und sageten gote der gnâden danc,

(08276.) daß den heiden nicht gelanc.

(08277.) ir burc die beßßerten sie wider

(08278.) und santen boten sider,

(08279.) den meister ließen sie verstân,

(08280.) wie eß den heiden was ergân.

(08281.) der meister was der rede vrô,

(08282.) er sprach zû sînen brûderen sô:

(08283.) “diß sturmen wirt vergulden wol.

(08284.) ist, daß ich leben sol,

(08285.) ich stifte eine herevart

(08286.) her nâch zû Lettowen wart.”

(08287.) der meister sint besante

(08288.) die kummentûre und mante,

(08289.) daß sie im helfe brêchten

(08290.) und dar an gedêchten,

(08291.) waß die heiden hetten getân

(08292.) der cristenheit. die boten sân

(08293.) riten in der brûdere lant:

(08294.) die mêre tâten sie bekant.

(08295.) Der meister vlîßeclîchen bat,

(08296.) der bete er nicht abe trat,

(08297.) von Revele ern Eilart,

(08298.) daß er in die herevart

(08299.) mit sînen lûten quême

(08300.) unde zû im nême,

(08301.) wer zû der reise tochte,

(08302.) und sô er beste mochte

(08303.) sînen vließ legete dar an.

(08304.) er Eilart der tet als ein man,

(08305.) er sprach: “meister, ich wil komen,

(08306.) eß ghê zû schaden oder zû vromen,

(08307.) mit ûch in die herevart.

(08308.) lîb und gût ist ungespart.”

(08309.) dâ wâren ouch andere rittere gût,

(08310.) die hatten den selben mût,

(08311.) von Thisenhûsen er Johan,

(08312.) ein vil tugenthafter man;

(08313.) von Frangen er Heinrîch

(08314.) was ein ritter hovelîch;

(08315.) die wâren der reise vrô.

(08316.) umme einen tac sie sprâchen dô,

(08317.) wan sie solden sîn bereit.

(08318.) der tac wart in dô geleit.

(08319.) die rede lâße wir bestân

(08320.) und sagen von der reise sân.

(08321.) Von Hôberc er Eilart

(08322.) machte sich ûf die vart.

(08323.) er was zû Revele houbetman.

(08324.) eine schône schar er gewan,

(08325.) zû Rîge quam er zû geriten.

(08326.) die andern ouch nicht enbiten,

(08327.) von Thisenhûsen er Johan

(08328.) quam dar mite als ein man,

(08329.) der der reise was vil vrô.

(08330.) der brûdere her gemeine dô

(08331.) was zû Rîge vor in komen;

(08332.) als ich die rede hân vernomen.

(08333.) der meister was ir aller vrô.

(08334.) mit deme here reit er dô

(08335.) vaste kegen Lettowen

(08336.) in dienste unser vrowen.

(08337.) der Kûren quâm ein michel schar,

(08338.) die Semegallen ouch aldar

(08339.) quâmen ouch mit vlîßen.

(08340.) dô sach man helme glîßen,

(08341.) brunjen blenken sam ein glas.

(08342.) daß her grôß und michel was.

(08343.) die rittere ritterlîchen dâ

(08344.) von Revele wâren îsgrâ

(08345.) gewâpent wol mit êren.

(08346.) daß her sach man kêren

(08347.) stoltz zû Kernowen.

(08348.) daß was leit den Lettowen.

(08349.) dô wart kuniges Thoreiden lant

(08350.) beroubet vil und verbrant.

(08351.) volkes slûc der brûdere her

(08352.) harte vil sunder wer

(08353.) in sînen landen.

(08354.) eß gienc in wol zû handen.

(08355.) daß her herte her und dar

(08356.) mit vil mancher stoltzen schar.

(08357.) zû samne sie dâ quâmen,

(08358.) den roub sie mit in nâmen;

(08359.) der was michel unde grôß.

(08360.) die Lettowen des verdrôß.

(08361.) der meister und die sîne,

(08362.) brûdere unde pilgerîne,

(08363.) er Eilart der houbetman,

(08364.) die riten ritterlîchen dan

(08365.) wider ûß dem lande.

(08366.) sie hatten vol ir hande.

(08367.) daß lantvolk zogete vaste hin,

(08368.) zû hûse stûnt in aller sin.

(08369.) Der Lettowen her zû samne quam,

(08370.) einen snellen rât eß nam.

(08371.) eß was michel unde starc,

(08372.) zû reisen wâren sie karc.

(08373.) der heiden here dem was gâch,

(08374.) sie zogeten den cristen nâch,

(08375.) in wûchs grobelîchen zû

(08376.) beide spâte unde vrû.

(08377.) der brûdere her daß hatte sich

(08378.) gelegert harte reiselîch.

(08379.) eß wart in vor bekant,

(08380.) daß der heiden her gerant

(08381.) quême vaste nâch in dar.

(08382.) dô was von der brûdere schar

(08383.) lantvolkes vil zû hûs geriten,

(08384.) mit deme wart nicht gestriten.

(08385.) Der heiden her gerennet quam

(08386.) alênzeln zû, als ich vernam;

(08387.) die solde man hân bestriten,

(08388.) dô wart zû lange gebiten:

(08389.) sie sûmeten sich zû beider sît.

(08390.) dô die heiden dûchte zît

(08391.) und ir grôßeß her zû quam,

(08392.) den drucht iß ûf die brûdere nam.

(08393.) dô gienc eß an ein strîten

(08394.) von ir beider sîten.

(08395.) die wunden hieb man dâ sô grôß,

(08396.) daß ir blût durch den snê vlôß.

(08397.) des sach man von in beiden

(08398.) von cristen und von heiden

(08399.) manchen unverzageten helt,

(08400.) beide rasch und ûß erwelt,

(08401.) sturtzen in den grimmen tôt.

(08402.) der snê was dâ von blûte rôt.

(08403.) doch slûc dâ der brûdere her

(08404.) die heiden gantz ûß irre wer.

(08405.) er Eilart ein degen gût

(08406.) der hatte ernsthaften mût

(08407.) gelîch ûf die heidenschaft.

(08408.) er jagete in nâch mit sîner craft

(08409.) unde slûc ir vile tôt.

(08410.) die heiden liden von im nôt.

(08411.) In disen dingen wart gestriten

(08412.) wol mit menlîchen siten

(08413.) von den brûderen, daß ist wâr;

(08414.) alleine wart eß in zû swâr.

(08415.) der heiden her daß hatte sich

(08416.) gekobert und was volkes rîch.

(08417.) dô gienc eß an ein howen

(08418.) von cristen und von Lettowen.

(08419.) man hieb sêre und stach,

(08420.) daß blût vlôß als ein bach

(08421.) durch die stêlîne ringe rôt.

(08422.) die brûdere die liden nôt.

(08423.) unser vrowen vane wart

(08424.) gehowen nider ungespart.

(08425.) den hatte ein ritter an der hant,

(08426.) er Johan was er genant,

(08427.) der bleib dar under tôt.

(08428.) got helfe im ûß aller nôt.

(08429.) von Thisenhûsen was der degen,

(08430.) sîner sêle mûßen pflegen

(08431.) die engele in himelrîche,

(08432.) wen er was tugentrîche.

(08433.) dô sie alle wâren geslagen,

(08434.) dannoch sach man nicht verzagen

(08435.) den meister und die brûdere sîn,

(08436.) sie liden ungevûgen pîn,

(08437.) der was in alzû vil,

(08438.) sie hielden ein vil sûriß spil,

(08439.) die brûdere liden ungemach.

(08440.) al die wîle man sach

(08441.) die Semegallen wîchen dan,

(08442.) sie enließen dâ nicht einen man

(08443.) von allen iren lûten dô.

(08444.) des wart der cristen her unvrô.

(08445.) die heidenschaft wart des gewar,

(08446.) sie trâten zû mit irre schar.

(08447.) der brûdere vane dar nider lac,

(08448.) daß was der cristenheit ein slac.

(08449.) dô lac meister Ernst tôt.

(08450.) bie im bliben in der nôt

(08451.) ein und sibenzic brûdere gût.

(08452.) durch got gußßen sie ir blût.

(08453.) Dô er Eilart hatte geslagen

(08454.) die heiden, als ir mich hôrtet sagen,

(08455.) dô er in was gerennet nâch,

(08456.) im was zû den brûderen gâch.

(08457.) dô er bie die walstat quam

(08458.) und er die mêre vernam,

(08459.) daß der strît was verlorn,

(08460.) im wart leit und zorn,

(08461.) und daß der meister was geslagen,

(08462.) er begunde in sêre clagen.

(08463.) ein rotte grôß der heiden

(08464.) hîlt zû den sîten beiden,

(08465.) dô er solde rîten hin.

(08466.) daß wart des heldes ungewin.

(08467.) er sprach sân den rittern zû:

(08468.) “ir sult durch mînen willen nû

(08469.) bie mir vlîßeclîchen wesen,

(08470.) mit mir sterben oder genesen:

(08471.) ich hân mich vermûdet gar.”

(08472.) brûdere ein teil an sîner schar

(08473.) wâren vaste mit im gerant,

(08474.) dâ mite sprengete er zû hant

(08475.) wider ûf der heiden her.

(08476.) die heiden griffen zû der wer.

(08477.) ern Eilarte ûf der widervart

(08478.) sîn urs im erschoßßen wart,

(08479.) er wart gewundet in den tôt.

(08480.) die andern mit grôßer nôt

(08481.) hiwen sich von dannen

(08482.) von den heidenischen mannen.

(08483.) er Eilart wart dâ tôt geslagen,

(08484.) daß mac man wêrlîchen clagen.

(08485.) er hatte getân wol sîne tât.

(08486.) sîner sêle mûße werden rât

(08487.) in immer wernder vreude dort!

(08488.) Nû wil ich aber sagen vort.

(08489.) der winter der was alsô kalt,

(08490.) daß es manich mensche entkalt

(08491.) von cristen und von heiden.

(08492.) dâ ervrôs von in beiden

(08493.) manich unverzageter helt,

(08494.) kûne und dâ bie ûß erwelt.

(08495.) diß bûch vor wâr mac kunden

(08496.) vienden und vrûnden,

(08497.) daß diser strît gestriten wart

(08498.) ernstlîch und ungespart

(08499.) tûsent und zwei hundert jâr

(08500.) nâch gotes geburt, daß ist wâr,

(08501.) und achte sibenzic jâr dar zû

(08502.) zû mittevaste, nicht vrû,

(08503.) eß was verre ûffen tac.

(08504.) nicht mê dâ von ich sagen mac,

(08505.) wen got der gebe in allen gût,

(08506.) die dâ gußßen ir blût

(08507.) durch in und ouch die mûter sîn.

(08508.) ir tôt stê vor ir helle pîn,

(08509.) des wunschet in gotes namen

(08510.) und sprechet alle âmen!

(08511.) Meister Ernst, daß ist wâr,

(08512.) der hatte gerâten sechs jâr.

(08513.) nicht lanc dar nâch wart er erslagen,

(08514.) als ir daß bûch hôret sagen.

(08515.) daß meister Ernst tôt gelac

(08516.) daß was dem lande ein grôßer slac;

(08517.) in clagete vrowen und man.

(08518.) doch was an sîner stat verlân

(08519.) brûder Gêrhart in der zît.

(08520.) zû Nieflant was sîn lop vil wît.

(08521.) er hieß von Katzenellenbogen

(08522.) und was hubesch und gezogen,

(08523.) ein vromer helt zû der nôt.

(08524.) in allen dingen er sich erbôt

(08525.) zû tugenden gar in rechtekeit.

(08526.) im was des landes schade leit.

(08527.) mit der brûdere râte

(08528.) sante er boten drâte

(08529.) kein dûtschen landen an der stunt.

(08530.) er tet dem hôen meistere kunt,

(08531.) daß meister Ernst was geslagen

(08532.) mit sibenzic brûderen. in begunde clagen

(08533.) der meister und vil manich man,

(08534.) wem der schade wart kunt getân.

(08535.) die kummentûre wâren besant

(08536.) gemeine uber alle dûtsche lant.

(08537.) die wâren zû Marburk komen,

(08538.) dô sie hatten vernomen

(08539.) von Nieflant die mêre,

(08540.) wie eß ergangen wêre.

(08541.) von Prûßen was ouch dar komen

(08542.) der marschalk, als ich hân vernomen,

(08543.) ouch von des landes nôt,

(08544.) wan ir meister der was tôt

(08545.) meister Hartman von Helderungen.

(08546.) die alden und die jungen

(08547.) brûdere er zû samne nam,

(08548.) als im von rechte wol gezam.

(08549.) dô sie zû samne wâren komen,

(08550.) als ir wol habt vernomen,

(08551.) der brûder stûnt ûf zû hant,

(08552.) der von Nieflande was gesant,

(08553.) und kundete sîne wort

(08554.) von dem ende biß ûf daß ort.

(08555.) der von Prûßen tet alsam

(08556.) getrûwelîch, als eß im gezam.

(08557.) sumelîche brûdere begonden sagen,

(08558.) eß solde uber ein tragen

(08559.) Prûßen und Nieflant,

(08560.) die viende solden zû hant

(08561.) sich vurchten deste sêrer.

(08562.) ouch wurde ir helfe mêrer,

(08563.) sprâchen sie algemeine dô.

(08564.) der meister wart des râtes vrô.

(08565.) dem meister quam daß in sîn danc,

(08566.) daß brûder Cûnrât von Vûchtewanc

(08567.) solde von deme râte gân.

(08568.) sie rieten algemeine sân

(08569.) daß man bevele in sîne hant

(08570.) Prûßen und Nieflant.

(08571.) dô rief man im wider în,

(08572.) wie nôte, erß tet, eß mûste sîn.

(08573.) dô er daß amt an sich nam

(08574.) vil manich brûder zû im quam

(08575.) und bôt sich mit im in daß lant.

(08576.) sîn hertze vreute sich zû hant,

(08577.) ires gûten willen was er vrô.

(08578.) er bat den hôen meister dô

(08579.) umme brûdere mit im in daß lant.

(08580.) der hôe meister sprach zû hant:

(08581.) “ir durfet keine sorge haben nû,

(08582.) ich wil ûch vûgen brûdere zû

(08583.) und entpfâhet selbe wen ir welt;

(08584.) ir vindet manchen rischen helt.”

(08585.) îdoch der meister nicht enließ,

(08586.) sumelîchen brûder er dô hieß

(08587.) zû Prûßen varen in daß lant.

(08588.) er wiste wol wô er sie vant,

(08589.) die willeclîchen vûren dar.

(08590.) ir wart ein hovelîche schar.

(08591.) sie vûren zû Prûßen in daß lant.

(08592.) meister Cûnrât vûr zû hant

(08593.) und entpfienc manchen man,

(08594.) mit den er reit selbe von dan

(08595.) zû Prûßen in vil kurtzer stunt.

(08596.) dô in die mêre wurden kunt,

(08597.) sie wâren algemeine vrô

(08598.) und entpfiengen in lieblîchen dô

(08599.) die brûdere al in Prûßen lant:

(08600.) wan in daß mêre wart bekant,

(08601.) daß ir meister quam geriten,

(08602.) wol nâch tugentlîchen siten

(08603.) was daß ir gewonheit,

(08604.) daß man schône kein im reit.

(08605.) Dô er daß lant vil wol besach,

(08606.) um ein capitel er dô sprach

(08607.) und hieß die kummentûre komen

(08608.) zûm Elwinge, als ich hân vernomen.

(08609.) die vogete wurden ouch besant

(08610.) von Natangen und Samelant.

(08611.) der brûdere was ein michel zal

(08612.) von deme lande uber al.

(08613.) ein brûder was von Nieflant

(08614.) an einer botschaft dar gesant.

(08615.) daß zû Semegallen was geschehen

(08616.) des wil ich ûch ein teil verjehen.

(08617.) dô meister Ernst tôt gelac

(08618.) und manich man von swertes slac

(08619.) der Semegallen wart nicht geslagen,

(08620.) man sach sie von dem strîte jagen.

(08621.) in einer vaste daß geschach.

(08622.) zû deme nêhesten grase dar nâch

(08623.) die Semegallen quâmen uber ein,

(08624.) daß sie verrieten Terwetein.

(08625.) die burc in irme lande lac.

(08626.) eß geschach ûf einen tac,

(08627.) der dâ zû bescheiden was.

(08628.) in dem vorburge nicht genas,

(08629.) eß wurde gevangen oder geslagen

(08630.) waß cristen namen wolde tragen.

(08631.) dâ was ein schale, der hieß Bertolt,

(08632.) dem wâren die Semegallen holt,

(08633.) wen er was ein schutze;

(08634.) er wart in sint vil nutze.

(08635.) deme ließen sie daß leben,

(08636.) ob er sich wolde zû in geben.

(08637.) er tet daß und was vrô.

(08638.) die Semegallen vunden dô

(08639.) in einer kurtzen wîle

(08640.) armbruste unde pfîle

(08641.) in dem vorburge gnûc.

(08642.) vil snelle man sie zû samne trûc.

(08643.) sie wâren der armbruste vrô.

(08644.) der bôse cristen der nam dô,

(08645.) sô manchen schutzen er ûß las,

(08646.) als vil der armbruste was.

(08647.) wer dar zû nicht kunde,

(08648.) lêren er den begunde

(08649.) spannen und schießen.

(08650.) des ließen sie in genießen.

(08651.) al die wîle die brûdere gût

(08652.) hatten die inren burc behût

(08653.) mit menlîchen sachen:

(08654.) die wolden sie bewachen

(08655.) und behalden in irre wer.

(08656.) al die wîle quam ein her

(08657.) vaste alumme zû gerant.

(08658.) Nameise hatte sie besant,

(08659.) der was ir aller houbetman.

(08660.) nicht vollen ich hesagen kan,

(08661.) waß êren und wirdekeit

(08662.) von brûderen was an in geleit.

(08663.) er dankete es in mit valsche sô,

(08664.) des sîn geslechte wart unvrô

(08665.) dar nâch in vil kurtzem zil.

(08666.) ir selbes bôsheit was sô vil:

(08667.) sumelîcher daß erwarb

(08668.) daß er von rechten schulden starb.

(08669.) Nameise rûmete ouch daß lant,

(08670.) als ûch her nâch wol wirt bekant.

(08671.) nû lege wir die rede nider

(08672.) und grîfen aber wider.

(08673.) Dô die Semegallen komen

(08674.) wâren, als ich hân vernomen,

(08675.) sie nâmen schilde und sper,

(08676.) ûf die burc was ir ger.

(08677.) vumfzehn was der brûdere zal

(08678.) in deme kovente uber al.

(08679.) der hatten sie geslagen ein teil.

(08680.) ir mût was ûf die anderen geil,

(08681.) die ûf der burge wâren.

(08682.) die kunden wol gebâren

(08683.) den vromen helden gelîch.

(08684.) wie wênic ir was, sie werten sich.

(08685.) mit schießen und mit steinen

(08686.) begunden sie die meinen,

(08687.) wer in quam zû mâßen.

(08688.) von in nicht wart gelâßen,

(08689.) sie trâten ûf die wer enpor,

(08690.) sie werten graben und tor.

(08691.) Nameise dô nicht enließ,

(08692.) sîne schutzen er schießen hieß.

(08693.) daß was den brûderen unkunt,

(08694.) daß der ungetrûwe hunt

(08695.) was den cristen abe gestân;

(08696.) sie hatten dar ûf keinen wân,

(08697.) daß iemant solde schießen,

(08698.) des wolden sie genießen.

(08699.) sie blôsten sich deste baß.

(08700.) Bertolt was nicht zû laß,

(08701.) er machte in vil kurtzer stunt

(08702.) mit schießen sumelîchen wunt,

(08703.) daß er der were gar vergaß.

(08704.) die anderen hûten sich deste baß

(08705.) und wurfen und schußßen,

(08706.) daß sie irre wer genußßen

(08707.) wol biß ûf den vierden tac.

(08708.) vor wâr man daß wol sagen mac,

(08709.) ir menje was ein teil zû klein.

(08710.) îdoch sie quâmen uber ein,

(08711.) sie wolden wâgen daß leben

(08712.) und der burge sich begeben.

(08713.) ein vromer helt genante,

(08714.) daß er die mulen brante,

(08715.) die lac von deme hûse ein teil.

(08716.) die brûdere ließen ûf ein heil

(08717.) und trûgen vaste vûer an.

(08718.) dô die burc wol enpran

(08719.) nâch ir aller willen gar,

(08720.) eine vrowe die wart des gewar.

(08721.) die was ein swestir begeben

(08722.) und wolde vristen ir leben,

(08723.) sie wolde deme tôde entwanken.

(08724.) vil snel uber die planken

(08725.) wolde sie gevallen sîn.

(08726.) zwischen zwên bolen în

(08727.) vîl sie. dô verbrant sie tôt.

(08728.) got helfe irre sêle ûß aller nôt.

(08729.) Die brûdere tâten ûf ir tor,

(08730.) dâ vunden sie ir viende vor

(08731.) in grimme vor der burge stân.

(08732.) dâ was vil manich man

(08733.) bie den brûderen an der schar.

(08734.) dâ ir Nameise wart gewar,

(08735.) er sprach den sînen vaste zû:

(08736.) “stolzen helde, tretet nû

(08737.) vrîlîchen ûf der brûdere schar.”

(08738.) eß was sîn ernst, daß ist wâr.

(08739.) die Semegallen wâren vrô,

(08740.) daß eß in was gevallen sô,

(08741.) daß die burc vor in bran.

(08742.) ouch sâhen sie die brûdere an,

(08743.) die stûnden an vil kleiner schar,

(08744.) sie wurden underdrungen gar.

(08745.) die brûdere werten sich gnûc,

(08746.) zû jungest man sie nider slûc.

(08747.) sumelîcher wart gevangen.

(08748.) sus was der strît ergangen.

(08749.) der Semegallen wille geschach.

(08750.) in kurtzen stunden dar nâch

(08751.) hielden sie ein teiding,

(08752.) sie machten einen wîten ring,

(08753.) dâ mûste ein brûder în gêhn,

(08754.) man sach sie alumme stêhn,

(08755.) dâ wart er zuhowen.

(08756.) ein teil kein Lettowen

(08757.) wart der brûdere hin gesant.

(08758.) daß hûs sie bûweten zû hant,

(08759.) daß der brûdere was gewesen,

(08760.) als ich vor hân gelesen,

(08761.) und triben daß urlouge als êr.

(08762.) waß sal ich dâ von sagen mêr?

(08763.) dô man daß zû Rîge vernam,

(08764.) vil snelle brûder Gêrhart quam,

(08765.) der an des meisters stat was,

(08766.) die brûdere er zû samne las.

(08767.) nâch ir aller râte

(08768.) einen brûder drâte

(08769.) sante er hin kein Prûßen lant.

(08770.) zûm Elbinge er den meister vant,

(08771.) dâ was ein capitel grôß.

(08772.) die botschaft warb brûder Clôß,

(08773.) der ich vor ein teil began

(08774.) und nû mit rede geendet hân.

(08775.) daß zû Semegallen was geschehn,

(08776.) des hôrte man offenbâr in jehn.

(08777.) dô er die rede hatte getân,

(08778.) er hûb ein ander botschaft an

(08779.) und lût den meister in daß lant.

(08780.) mit worten tet er im bekant:

(08781.) wolde man daß lant erweren,

(08782.) daß eß die heiden icht verheren,

(08783.) man solde brûder senden dar,

(08784.) sie wurden anders wol gewar

(08785.) andere mêre in kurtzer stunt.

(08786.) alsô tet er in allen kunt.

(08787.) der meister was ein sêlic man,

(08788.) vil wol der rede er sich versan.

(08789.) brûder Cûnrât von Vûchtewanc,

(08790.) in gote was al sîn gedanc,

(08791.) er sprach: “ich wil sie trôsten sô,

(08792.) daß sie des alle werden vrô,

(08793.) die zû Nieflande sint.

(08794.) eß lebet doch mancher mûter kint,

(08795.) die alle varen gerne dar.”

(08796.) zû hant nam er die brûdere gar,

(08797.) die von dûtschen landen komen

(08798.) wâren, als ir habt vernomen.

(08799.) die sante er hin vil drâte

(08800.) mit der brûdere râte.

(08801.) ouch wurden brûdere ûß gelesen,

(08802.) die zû Prûßen wâren gewesen.

(08803.) sie wurden kein Nieflant

(08804.) mit jenen brûdern gesant,

(08805.) die mit dem meistere wâren komen

(08806.) nûwelîch, als ir habt vernomen.

(08807.) sie vûren vrôlîch ûf den strant

(08808.) kein Rîge hin durch Kûrlant.

(08809.) dô sie zû Rîge quâmen,

(08810.) die brûdere daß vernâmen,

(08811.) die entpfiengen lieblîche

(08812.) beide arm unde rîche.

(08813.) Der des meisters stat dô wîlt

(08814.) lieblîch er die brûdere hîlt.

(08815.) dô ir mûde was gelegen

(08816.) und ir pferde wol gepflegen,

(08817.) zû hant dô er gebôt,

(08818.) dô riten sie, dô ir was nôt.

(08819.) meister Cûnrât dannoch was

(08820.) zû Prûßen als ich vor las,

(08821.) in deme lande wol ein jâr.

(08822.) daß ich ûch sage, daß ist wâr.

(08823.) er solde der zweier lande pflegen

(08824.) und begunde an sînem herzen wegen,

(08825.) er mochte ir beider nicht bewarn,

(08826.) und dâchte kein dûtschen landen varn.

(08827.) nâch den kummentûren wart gesant

(08828.) von im. die quâmen al zû hant.

(08829.) er sagete in sînes herzen grunt.

(08830.) dô in die mêre wurden kunt,

(08831.) sie widerredeten eß genûc.

(08832.) meister Cûnrât was sô clûc,

(08833.) er bôt in alsô sûße wort,

(08834.) daß sie gâben volbort.

(08835.) mit râte er einen brûder nam,

(08836.) der deme lande eben quam,

(08837.) und ließ den an sîner stat.

(08838.) al die kummentûre er bat,

(08839.) daß sie dem brûdere hulfen sô,

(08840.) daß sie des lônes wurden vrô

(08841.) an deme jungesten tage.

(08842.) er schiet von dan mit grôßer clage

(08843.) und machte sich ûf die vart

(08844.) hin kein dûtschen landen wart.

(08845.) dô er zû dem hôen meistere quam

(08846.) und er sîne wort vernam,

(08847.) meister Hartman nicht enließ,

(08848.) sînen boten er îlen hieß

(08849.) nâch den kummentûren uber al.

(08850.) ir quam zû hant ein michel zal.

(08851.) dar nâch in vil kurtzer stunt

(08852.) meister Cûnrât tet in kunt,

(08853.) daß zû Nieflant was geschehen.

(08854.) dô in des alles was verjehen

(08855.) und von den Semegallen,

(08856.) dô sprach vor in allen

(08857.) brûder Cûnrât von Vûchtewanc:

(08858.) “ich bin den landen alzû kranc,

(08859.) ich enmac ir beider nicht bewarn;

(08860.) lâßet einen vor mich varn.”

(08861.) doch wolde man in senden wider.

(08862.) sie enkunden in nicht wenden wider,

(08863.) er enwolde des amtes werden lôs.

(08864.) mit râte man einen brûder kôs

(08865.) hin zû Prûßen al zû hant.

(08866.) er wart kein Nieflant gesant

(08867.) mit brûderen in einer stolzen schar

(08868.) vier und drîßec, daß ist wâr.

(08869.) Er hûb sich hin zû Rîge dô.

(08870.) sie wâren algemeine vrô,

(08871.) die sîne geverten wâren.

(08872.) er kunde wol gebâren

(08873.) lieblîch zû in allen.

(08874.) eß was alsô gevallen,

(08875.) daß sie quâmen sunder clage

(08876.) an sente Margarêthen tage

(08877.) vrôlîch in Duneschâr

(08878.) mit zwein kocken, daß ist wâr.

(08879.) die Dune ein waßßer ist genant

(08880.) und ist manchem wol bekant,

(08881.) dâ ist die Rîge bie gelegen,

(08882.) daß wißßen die dâ wonens pflegen.

(08883.) dar quam ein bote hin gerant

(08884.) und tet den brûdern bekant,

(08885.) daß ir meister komen was.

(08886.) ir pferde wâren ûf deme gras.

(08887.) schiere wart nâch den gesant.

(08888.) den burgêren wart eß ouch bekant:

(08889.) die wurden sîner kumfte vrô

(08890.) und riten mit den brûderen dô

(08891.) kein dem meistere ûf den sant.

(08892.) daß velt ist manchem bekant.

(08893.) sie entpfiengen in lieblîchen.

(08894.) den armen und den rîchen

(08895.) dankte er, als im gezam,

(08896.) wer mit grûße zû im quam.

(08897.) sus reit mit im mancher man

(08898.) hin zû sente Juriân.

(08899.) der hof ist in der stat gelegen,

(08900.) dô die brûdere wonens pflegen.

(08901.) Der meister dô nicht enließ,

(08902.) die brûdere er sitzen hieß.

(08903.) man schankete in wîn und mete,

(08904.) mit grôßen gunsten man daß tete.

(08905.) dar nâch sie riten an gemach.

(08906.) in kurtzen tagen eß geschach,

(08907.) daß im die brûdere rîten daß,

(08908.) er solde daß lant besehen baß.

(08909.) dâ reit er kein Nieflant.

(08910.) vil gûte burge er dô vant

(08911.) mit brûdern rechte wol behût.

(08912.) dar umme was vil vrô sîn mût,

(08913.) daß er daß lant sô êrlîch vant.

(08914.) nû wil ich machen ûch bekant,

(08915.) waß in Kûrlant geschach.

(08916.) meister Cûnrât quam dar nâch,

(08917.) er was dannoch in dûtschem lant,

(08918.) der name was im doch benant,

(08919.) daß er Nieflandes meister hieß.

(08920.) nû hôret, war ich die rede ließ,

(08921.) dô ich von den dingen sprach,

(08922.) daß in Nieflande geschach.

(08923.) Kûren und Nieflant

(08924.) die sint uber ein genant

(08925.) in vremden landen, daß ist wâr.

(08926.) wer mochte daß geschrîben gar,

(08927.) wie ieclîch gegende ist genant?

(08928.) man heißet eß alleß Nieflant.

(08929.) Von eime helde ich sagen wil,

(08930.) und wêre der rede nicht zû vil,

(08931.) sô mochte ich lange mêre sagen,

(08932.) waß er manheit bie sînen tagen

(08933.) in Nieflande hât begân:

(08934.) dar von mûß ich die rede lân,

(08935.) wan sîner manheit was sô vil,

(08936.) des namen ich nu nûmen wil.

(08937.) in Lettowen und in Rûßen lant

(08938.) was sîn lob vil wol bekant.

(08939.) brûder Johan von Ochtenhûsen er hieß,

(08940.) in tugenden er sich vienden ließ;

(08941.) kûsch und zuchtec was sîn leben.

(08942.) dô er zûm êrsten wart begeben,

(08943.) dô wart er zû Kûrlant

(08944.) von sîner meistirschaft gesant.

(08945.) er tet dâ manche vromekeit,

(08946.) dâ wart sîn lob zûm êrsten breit.

(08947.) eß ist hîr nâch ein teil beschriben,

(08948.) waß er zû Nieflande hât getriben,

(08949.) dar er doch nicht bie namen stât.

(08950.) ein mêre von im nû an gât.

(08951.) Zû Goldingen was der helt.

(08952.) er wart zû vogete dâ erwelt,

(08953.) dâ er der Kûren solde pflegen.

(08954.) er was von manheit ein degen,

(08955.) er tet den heiden dicke schaden,

(08956.) sie wâren mit im uberladen.

(08957.) die wege wâren im wol kunt:

(08958.) er rante in vil mancher stunt

(08959.) zû Semegallen in daß lant

(08960.) und stifte roub unde brant

(08961.) vor Doblên und vor Terwetein.

(08962.) des quam er dicke uber ein,

(08963.) daß er die viende wackete vrû;

(08964.) er satzte in endelîchen zû.

(08965.) zû einem mâle eß geschach,

(08966.) daß er um eine reise sprach.

(08967.) mit der brûdere râte

(08968.) besante er die Kûren drâte.

(08969.) dô sie daß vernâmen,

(08970.) vil schiere sie zû im quâmen.

(08971.) er nam brûdere eine cleine zal:

(08972.) viere wâren ir uber al.

(08973.) dô hûb er sich ûf die vart

(08974.) hin kein Doblêne wart.

(08975.) bôse wege und dicken walt

(08976.) vûrte er manchen degen balt

(08977.) zû pferde und ouch zû vûße.

(08978.) sie hatten ouch unmûße

(08979.) mit sumelîcher brucke.

(08980.) dâ trûc ûfme rucke

(08981.) manich man sîn spîse.

(08982.) ir voget der was sô wîse:

(08983.) dô sie quâmen durch den hagen,

(08984.) der vor daß lant was geslagen,

(08985.) er hieß die spîse lâßen ligen,

(08986.) daß sie ir gentzlîch verzigen.

(08987.) er nam der lûte eine cleine schar

(08988.) und einen brûder, daß ist wâr.

(08989.) im was kein Doblênen gâch,

(08990.) sin her im vaste zogete nâch.

(08991.) er quam gerant vor ir tor:

(08992.) dâ vant er rasche helde vor,

(08993.) sie trâten kein im ûf das velt,

(08994.) er brâchte in daß widergelt

(08995.) gar vormeßßelîchen.

(08996.) sie enwolden im nicht entwîchen,

(08997.) ir menje die was in zû grôß.

(08998.) den voget des vil sêre verdrôß.

(08999.) er hatte bie im vumfzic man

(09000.) und reit sie doch vrîlîchen an,

(09001.) daß sie den wich nâmen

(09002.) und in ir pforten quâmen.

(09003.) in vertrûc sîn manheit,

(09004.) vil dicke er in die pforten reit

(09005.) sô verre vor der Kûren schar.

(09006.) die Semegallen wurden sîn gewar

(09007.) des tages vil dicke in ir tur.

(09008.) zû lest lief ein helt her vur

(09009.) und warf den voget an den helm,

(09010.) daß er viel in den melm.

(09011.) ein brûder dannoch bie im was,

(09012.) der erbeißete an daß gras

(09013.) von dem urse zû der stunt,

(09014.) er tet dem vogete helfe kunt.

(09015.) al die wîle quam daß her

(09016.) und redeten iren voget mit wer.

(09017.) dar nâch sie trâten vor daß tor,

(09018.) dâ hielden sie sperwechsel vor

(09019.) wol biß ûffe den mitten tac.

(09020.) sumelîch dar under tôt gelac.

(09021.) an beider sîte was grôße wer,

(09022.) ie doch genas des vogetes her.

(09023.) ein teil der Kûren wurden wunt,

(09024.) die brûdere bliben gesunt,

(09025.) die mit dem vogete wâren komen

(09026.) zû Doblên, als ich hân vernomen.

(09027.) die brûdere mit irre schar

(09028.) trâten vor der burge gar

(09029.) ûf einen wunneclîchen plân.

(09030.) die burc sie ließen aldâ stân.

(09031.) man machte rossebâre

(09032.) den gewunten zwâre.

(09033.) dem vogete was ein wênic baß,

(09034.) ie doch ûf ein ros er saß.

(09035.) sîn her wart ordenlîch geschart,

(09036.) mit afterhûte wol bewart.

(09037.) sie kârten wider in ir lant.