(07059.) Eine burc lac in nâhen bie,

(07060.) die enwâren ouch nicht sorgen vrie,

(07061.) Ampille was sie genant.

(07062.) sie vlohen dâ von al zû hant

(07063.) hine kegen Lettowen.

(07064.) sint mochte man sie schowen

(07065.) dicke vor der Mimele hern.

(07066.) die brûdere mûsten vaste wern

(07067.) sich an allen sîten.

(07068.) sperwechseln und strîten

(07069.) des wart vil von in getân.

(07070.) sie sint des selden noch erlân,

(07071.) sie sitzen vor der heidenschaft.

(07072.) entête got mir sîner craft,

(07073.) sie enmochten nicht blîben.

(07074.) der eß solde schrîben

(07075.) waß dâ wunders ist geschehen,

(07076.) der mochte sich wol umme sehen

(07077.) nâch den kalbes hûten.

(07078.) solde ich eß rechte dûten,

(07079.) sô mûste ich gedanken hân.

(07080.) sie haben wunders vil getân

(07081.) zû Schalowe in dem lande

(07082.) mit roube unde mit brande;

(07083.) sie haben den Lettowen

(07084.) vil dicke abe gehowen

(07085.) ettelîche stoltze schar,

(07086.) der man zû hûs unsamfte enpar.

(07087.) die Mimele ist lange zît gehert

(07088.) und hât sich doch ernert

(07089.) mit gotes hulfe in mancher nôt.

(07090.) manich helt ist dâ gelegen tôt.

(07091.) Nû lege wir die rede nider

(07092.) und grîfen aber wider,

(07093.) wie der meister von Nieflant

(07094.) (brûder Werner was er genant),

(07095.) quam in michel ungemach.

(07096.) von ungelucke daß geschach,

(07097.) ein tobende brûder wundete in

(07098.) der was leider sunder sin,

(07099.) er was ûß den witzen komen:

(07100.) got selbe hatte sie im genomen.

(07101.) eß was den brûderen leit genûc,

(07102.) der meister doch den schaden trûc.

(07103.) er mochte den lîp noch lenger sparn,

(07104.) zû dûtschen landen wolde er varn.

(07105.) mit râte der brûdere daß geschach.

(07106.) er clagete nicht sîn ungemach,

(07107.) vrôlîch vûr er in dûtsche lant,

(07108.) dâ er den hôhen meister vant.

(07109.) dâ bat er sich des amtes lôs,

(07110.) daß er in Nieflande verkôs

(07111.) der meisterschefte, daß ist wâr.

(07112.) er hatte gerâten zwei jâr.

(07113.) dar nâch wart er des amtes lôs.

(07114.) mit râte man einen anderen kôs.

(07115.) brûder Cûnrât was sîn name.

(07116.) er was rechter zuchte ein schame,

(07117.) von Manderen was er geborn.

(07118.) dô er zû meistere wart erkorn,

(07119.) wes man von zuchten pflegen sol,

(07120.) daß kunde sîn reine tugent wol.

(07121.) Myndowe der gecrônet was

(07122.) von meister Andrês, als ich las,

(07123.) der hatte gelebet an dise zît.

(07124.) ein ander Lettowe der trûc nît

(07125.) ûf in heimelîche;

(07126.) der was ouch alsô rîche

(07127.) und der vrûnde alsô grôß,

(07128.) daß es Myndowe nicht genôß.

(07129.) der mordete Myndowen

(07130.) den konic von Lettowen

(07131.) unde wolde besitzen

(07132.) daß kunicrîche mit witzen.

(07133.) dô Myndowe gemordet wart,

(07134.) zû hant dô hûb sich ûf die vart

(07135.) ein Lettowe drâte

(07136.) von der besten râte

(07137.) und rante hin kein Rûßen lant,

(07138.) Myndowen sune tet erß bekant.

(07139.) dô er die mêre vernam,

(07140.) vil schiere er gerant quam

(07141.) zû Lettowen in daß lant

(07142.) und sûchte zû hant

(07143.) die sînem vater wâren wider.

(07144.) an den meister sante er sider

(07145.) und bat in, daß er brêchte

(07146.) im hulfe unde gedêchte,

(07147.) daß er ouch ein cristen wêre.

(07148.) zû hant quâmen die mêre

(07149.) dem meister von Nieflant.

(07150.) dô im die mêre wurden bekant,

(07151.) er wart des von hertzen vrô.

(07152.) zû hant er besante dô

(07153.) die kummentûre und die vogete gar.

(07154.) die bat er, daß sie mit irre schar

(07155.) quêmen im ûf einen tac,

(07156.) als man noch pflît und pflac.

(07157.) sie besanten al in lant,

(07158.) die reise tâten sie bekant.

(07159.) In den zîten eß geschach,

(07160.) daß man Myndowen sun sach

(07161.) lâßen die cristen lôs.

(07162.) zû miete er nicht dar umme kôs,

(07163.) wan gotes hulde alleine.

(07164.) der ließ sie algemeine

(07165.) vrôlîch ûß ir bande.

(07166.) sie hûben sich zû lande,

(07167.) dâ sie wâren vor gewesen,

(07168.) als ich ûch hân nû gelesen.

(07169.) daß was Myndowen sune ein tugent,

(07170.) die er begienc in sîner jugent,

(07171.) daß er sô grôßer erbarmekeit

(07172.) an die cristen hatte geleit,

(07173.) als ich ûch nû hân verjehen.

(07174.) daß was zû Lettowen geschehen.

(07175.) der meister hatte die wîle besant

(07176.) vil manchen helt in Nieflant.

(07177.) der quam im ein michel schar

(07178.) mit mancher brunjen liechtvar.

(07179.) ir helme wâren rîche.

(07180.) ouch quâmen williclîche

(07181.) alle die brûdere, die gewalt

(07182.) hatten, beide junc und alt,

(07183.) ich meine die kummentûre.

(07184.) die brâchten im zû stûre

(07185.) manchen helt ûß erlesen,

(07186.) die wol bie vienden kunden wesen.

(07187.) dô daß her zû Rîge quam,

(07188.) in den zîten man vernam

(07189.) von Lettowen boten komen,

(07190.) als ich die mêre hân vernomen.

(07191.) sie wurben an den meister sô:

(07192.) Myndowen sun wêre vrô,

(07193.) daß im die sêlde was geschehen,

(07194.) daß er die trûwe hette gesehen,

(07195.) die der meister hette zû im.

(07196.) sie sprâchen: “hêrre, nû vernim,

(07197.) er saget dir sô grôßen danc,

(07198.) daß er immer âne wanc

(07199.) wil gantze vrûntschaft mit dir haben.

(07200.) er hât harte wol entsaben,

(07201.) daß ir in mit trûwen meinet.

(07202.) nû hât er sich vereinet

(07203.) mit sînen lûten, daß ist wâr;

(07204.) sie hân im gehuldet gar

(07205.) und ist ein sûne worden

(07206.) gantz nâch der heiden orden.

(07207.) dâ von moget ir blîben wol.

(07208.) der kunic ûch gerne danken sol.”

(07209.) Dô daß der meister hatte vernomen,

(07210.) was umme die boten wâren komen,

(07211.) der samenunge wolde er nicht lân

(07212.) sunder reise dô vergân.

(07213.) die boten schickete e drâte

(07214.) mit sîner brûdere râte

(07215.) wider zû Lettowen lant.

(07216.) dar nâch sante er zû hant

(07217.) vumftehalb hundert man geriten.

(07218.) von den wart nicht gebiten,

(07219.) sie riten hin zû Kûrlant

(07220.) vaste bie des meres strant

(07221.) biß sie zû Goldingen quâmen.

(07222.) ûß deme konvente sie nâmen

(07223.) brûdere unde knechte,

(07224.) die in quâmen rechte,

(07225.) und Kûren ouch dâ mite;

(07226.) die westen wol des landes site

(07227.) und die wege kein Gresen wart.

(07228.) sus hûben sie sich ûf die vart.

(07229.) sie waren algemeine vrô

(07230.) und ir mût der stûnt alsô,

(07231.) daß eß in solde wol ergân.

(07232.) in viel vil dicke wol ir spân,

(07233.) ir vogel in vil wol sanc:

(07234.) sô prûveten sie, daß in gelanc.

(07235.) dô sie dâ wâren ûf der vart

(07236.) vaste kein Gresen wart,

(07237.) sie vunden bôser wege genûc,

(07238.) dâ kûme ein pfert sich eine trûc,

(07239.) durch brûch und manche bôse bach.

(07240.) vil cleine hatten sie gemach.

(07241.) dô quâmen sie eines morgens vrû

(07242.) mit irme here zû Gresen zû,

(07243.) daß eß in der veste

(07244.) niekein man enweste.

(07245.) Die ûf der burge wâren dô,

(07246.) die hatten sich bereitet sô,

(07247.) daß sie zû Goldingen wolden hern.

(07248.) sie enwesten nicht, daß man in wern

(07249.) alsô drâte wolde daß.

(07250.) der brûdere her baß und baß

(07251.) trat der burge vaste zû.

(07252.) eß was dannoch harte vrû.

(07253.) daß her in die burc trat,

(07254.) niemant eß zû gaste bat,

(07255.) bereitet alzû mâle wol,

(07256.) als ich verwâre sprechen sol.

(07257.) dô wart in sneller île

(07258.) in vil kurtzer wîle

(07259.) der wirte vil geslagen tôt

(07260.) und ouch gebrâcht in sulche nôt,

(07261.) daß sie dar nider sâßen

(07262.) und Goldingen gar vergâßen,

(07263.) daß sie wolden hân gehert.

(07264.) daß wart in bitterlîch gewert.

(07265.) welch wirt von der burge quam,

(07266.) den wec er hin zû pusche nam,

(07267.) als im der tûvel jagete nâch:

(07268.) zû loufene was im gâch.

(07269.) die brûdere nâmen zû hant

(07270.) al den roub zû ir hant,

(07271.) der ûf der burge was gewesen

(07272.) (was mac ich mêr dâ von gelesen?),

(07273.) und branten in der selben stunt

(07274.) die vesten in den tiefen grunt.

(07275.) nicht lenger sûmeten sie dar nâch,

(07276.) mit irme roube was in gâch

(07277.) vaste hin zû lande.

(07278.) sie hatten vol ir hande

(07279.) roubes ûf der burc genomen

(07280.) zû Gresen, dar sie wâren komen.

(07281.) Die brûdere von Goldingen

(07282.) mit iren jungelingen,

(07283.) die sie hatten dâ vil stoltz,

(07284.) kârten durch ein michel holtz.

(07285.) die von Rîge kârten sider

(07286.) vaste kein dem mere wider.

(07287.) dô sie ûf daß mer quâmen,

(07288.) ir rûwe sie dâ nâmen

(07289.) mit allerleie getregede.

(07290.) man, wîb und megede,

(07291.) rinder unde pferde

(07292.) vûrten sie vil werde

(07293.) gebunden und gevangen.

(07294.) wol was eß in ergangen.

(07295.) dô ließ sich der brûdere her

(07296.) nider bie daß wilde mer.

(07297.) dô diß her zû Kûrlant

(07298.) aller êrst wart gesant,

(07299.) dô hûb sich mit den sînen

(07300.) brûdern und pilgerînen

(07301.) meister Cûnrât ûf die vart

(07302.) hine kein Semegallen wart.

(07303.) er hatte lantvolkes vil,

(07304.) die wâren willic âne zil.

(07305.) dô daß her quam in daß lant,

(07306.) er roubete und slûc zû hant

(07307.) waß er mochte begrîfen.

(07308.) doch sach man entslîfen

(07309.) manchen Semegallen klûc,

(07310.) der ein bitter hertze trûc

(07311.) ûf die brûdere und ûf ir her.

(07312.) sint satzten sie sich zû der wer.

(07313.) sie verhageten die wege

(07314.) grôß und cleine in stêter pflege.

(07315.) die hagene machten sie sô grôß,

(07316.) daß manchen cristen sint verdrôß.

(07317.) dô der meister hatte gehert

(07318.) die Semegallen ungewert,

(07319.) dô solde er zû lande wider

(07320.) mit sînem here kêren sider.

(07321.) er quam geriten vor den hagen,

(07322.) der in zû schaden was geslagen.

(07323.) dô wart er starke an gerant

(07324.) von sînen vienden zû hant.

(07325.) der meister und die pilgerîn

(07326.) und dar zû die brûdere sîn,

(07327.) die knechte und daß lantvolk gar

(07328.) machten eine starke schar

(07329.) und satzten vaste sich zû wer

(07330.) kein der Semegallen her.

(07331.) doch wurden in der selben stunt

(07332.) der brûdere lûte vil gewunt.

(07333.) grimmeclîche in der nôt

(07334.) sechs hundert man dâ lâgen tôt

(07335.) und zwênzik brûdere dâ bie.

(07336.) wie ouch ir aller name sie,

(07337.) sô mûße sie got trôsten dort.

(07338.) nû wil ich aber sagen vort.

(07339.) wer von der nôte dô entquam,

(07340.) den wec er zû lande nam

(07341.) an manchen enden durch den walt.

(07342.) doch quam manich helt balt

(07343.) mit menlîchen sachen dan.

(07344.) die Semegallen manchen man

(07345.) ließen dâ zû pfande wider.

(07346.) der brûdere lûte kârten sider

(07347.) vaste hin zû Rîge wart;

(07348.) der wec wênic wart gespart.

(07349.) Dô der meister dô quam

(07350.) zû Rîge wider, man nam

(07351.) einen boten drâte

(07352.) mit der brûdere râte.

(07353.) der selbe bote al zû hant

(07354.) kârte kegen des meres strant.

(07355.) vil balde rante er und reit

(07356.) vaste bie dem mere breit,

(07357.) biß er quam ûf den strant,

(07358.) dô er der brûdere her vant.

(07359.) dô die brûdere sâhen

(07360.) den boten zû in nâhen,

(07361.) ein teil ir ranten im enkegen

(07362.) und entpfiengen den degen.

(07363.) sie vrâgeten umme mêre,

(07364.) wie eß ergangen wêre

(07365.) dâ zû Semegallen.

(07366.) er sprach: “ich sage ûch allen,

(07367.) wir hân verlorn dâ den strît.

(07368.) nû machet ûch ûf, eß ist zît:

(07369.) hie ist der Semegallen her

(07370.) gerennet kein ûch ûf daß mer.”

(07371.) zû hant daß her bereite sich

(07372.) unde zogete algelîch

(07373.) bie des meres strande,

(07374.) biß eß quam zû lande.

(07375.) daß her gar unbestriten reit

(07376.) ûf die Dune sunder leit

(07377.) mit allem sînem roube dô.

(07378.) des wart daß her gemeine vrô.

(07379.) sint riten sie zû Rîge wider.

(07380.) alle ir sorge die lac nider.

(07381.) man, wîb unde kindere,

(07382.) pferde unde rindere

(07383.) teilten sie glîche

(07384.) alle vreuden rîche

(07385.) und riten an ir gemach.

(07386.) harte liebe dô geschach

(07387.) al der armen cristenheit.

(07388.) gestillet wart ein teil ir leit

(07389.) und lobeten glîche

(07390.) got von himelrîche.

(07391.) In dem anderen jâre

(07392.) der meister aber zwâre

(07393.) mit einem grôßen here reit,

(07394.) daß was lanc unde breit,

(07395.) hin kein Semegallen wart.

(07396.) er hatte zû der selben vart

(07397.) lange sich bereitet wol,

(07398.) als ich ûch nû sagen sol.

(07399.) er ließ vier mîle nâ

(07400.) ûf der Semegaller Â

(07401.) vor Semegallen bûwen dô

(07402.) ein hûs, des wurden unvrô

(07403.) alle die Semegallen;

(07404.) sie ließen dô ir schallen.

(07405.) daß hûs Mytowe ist genant

(07406.) und liet vor Semegallen lant.

(07407.) den Semegallen den wart sân

(07408.) leides vil dar abe getân.

(07409.) der meister ließ dâ brûdere vil

(07410.) unde knechte, die daß spil

(07411.) vrielîchen torsten trîben,

(07412.) die ließ er dâ blîben

(07413.) unde reit zû Rîge wider.

(07414.) die Semegallen alle sider

(07415.) vlohen ûf ir vesten

(07416.) vor den vremden gesten.

(07417.) daß wâren die brûdere mit ir schar.

(07418.) die brâchten in vil dicke dar

(07419.) von der Mytowe schaden zû

(07420.) beide spâte unde vrû.

(07421.) Meister Cûnrât von Manderen

(07422.) der wolde aber wanderen

(07423.) in der Semegallen lant.

(07424.) den brûderen tet erß bekant.

(07425.) die quamen im vil drâte.

(07426.) dô reit er mit ir râte

(07427.) und mit ir helfe hin:

(07428.) zû Semegallen stûnt sîn sin.

(07429.) dô er mit sînem here quam

(07430.) zû Semegallen, er nam

(07431.) roubes mit sînem volke vil.

(07432.) er tet ouch schaden âne zil

(07433.) in deme selben lande

(07434.) mit ungevûgem brande.

(07435.) man brante ir dorf und alle ir korn.

(07436.) daß was den Semegallen zorn.

(07437.) meister Cûnrât kârte dô

(07438.) kein Nieflande harte vrô

(07439.) mit sînem here, daß was gût.

(07440.) dem meistere quam in sînen mût,

(07441.) daß er wolde besîten

(07442.) vor deme here rîten

(07443.) und beßßern die wege

(07444.) beide brucken und stege.

(07445.) er sprach einem brûdere zû:

(07446.) “ich wil hinnen rîten nû

(07447.) mit ûwerem willen. ich wil nemen

(07448.) die mir zû hulfe wol gezemen,

(07449.) und machen wider die brucken,

(07450.) die zubrochen sint zû stucken.

(07451.) kumet der Semegallen her

(07452.) ûf ûch, sô setzet ûch zû wer

(07453.) und blâset sân mîn horn,

(07454.) daß zû dem zeichen ist erkorn,

(07455.) sô kome ich mit mînen roten.

(07456.) ir endurfet anders keiner boten

(07457.) dan als ich nû hân gesaget:

(07458.) rîtet samfte, nicht enjaget.”

(07459.) Der meister dô von dannen reit

(07460.) uber eine heide breit.

(07461.) im was zû der arbeit gâch,

(07462.) sîn her im zogete vaste nâch.

(07463.) dô er von den sînen quam,

(07464.) die Semegallen er vernam

(07465.) mit zorne komen durch den walt.

(07466.) sie brâchten manchen helt balt

(07467.) zwischen den meister und sîn her.

(07468.) die brûdere satzten sich zû wer.

(07469.) er enmochte in nicht zû helfe komen,

(07470.) der wec was im undernomen.

(07471.) daß was im von hertzen leit.

(07472.) mit sîner rotte er dô reit.

(07473.) die bie im wâren an der stunt,

(07474.) die rieten im, daß er gesunt

(07475.) kegen der Mytowe rite

(07476.) unde sînes heres aldâ bite

(07477.) unde nicht enkêrte wider.

(07478.) des volgete er in, eß row in sider.

(07479.) in grôßeme smertzen reit er dô

(07480.) kegen der Mytowe unvrô.

(07481.) nû wil ich machen ûch bekant,

(07482.) wie eß den brûderen gienc in hant,

(07483.) die in dem walde bliben dort,

(07484.) als ir vor habt gehôrt.

(07485.) ir nôt kan ich nicht vollen sagen:

(07486.) vil pfert wart in erslagen.

(07487.) dô trâten sie zû vûße nider,

(07488.) die wer begriffen sie dâ wider.

(07489.) der heiden craft was in zû grôß.

(07490.) daß lantvolk sêre des verdrôß

(07491.) und vlohen durch den walt von in.

(07492.) die brûdere hatten doch den sin,

(07493.) daß sie manchem dûtschen man

(07494.) hulfen ritterlîchen dan.

(07495.) doch lâgen dâ drie dûtsche tôt.

(07496.) die brûdere bliben in der nôt

(07497.) unde satzten sich zû wer

(07498.) vaste kein der heiden her.

(07499.) waß mac ich mêr dâ von sagen?

(07500.) zehen brûdere wurden dâ geslagen,

(07501.) sie verluren manchen helt balt,

(07502.) sie mûsten wîchen in den walt.

(07503.) die veigen lâgen dô dar nider

(07504.) die andern die quâmen sider

(07505.) dar nâch in vil kurtzer stunt

(07506.) zûr Mytowe alle wol gesunt.

(07507.) meister Cûnrât was des vrô.

(07508.) kein der Rîge kârte er dô.

(07509.) dô wart er wol entpfangen.

(07510.) sus was die reise ergangen.

(07511.) wer in der reise leit den tôt,

(07512.) des sêle helfe got ûß nôt.

(07513.) ich wil ûch ein cleineß ding sagen,

(07514.) des enmac ich nicht verdagen:

(07515.) bie sînen zîten eß geschach,

(07516.) daß man ein hûs bûwen sach,

(07517.) daß ist geheißen Wîßenstein

(07518.) und ist der besten burge ein,

(07519.) die in Nieflande liget.

(07520.) vil cleine ir iemant an gesiget.

(07521.) die burc ist rîch von gûte

(07522.) und stêt in grôßer hûte.

(07523.) sie ist gebûwet vor daß lant,

(07524.) daß dâ Jerwen ist genant.

(07525.) sie spîset andere burge vil.

(07526.) nicht mêr ich dâ von sprechen wil.

(07527.) Der meister von Nieflant,

(07528.) der ûch dicke ist genant,

(07529.) mit der brûdere râte

(07530.) sante er boten drâte,

(07531.) dô man den hôhen meister vant.

(07532.) mit brîven tet er im bekant

(07533.) alleß lieb und alleß gût,

(07534.) als ein vrûnt dem andern tût,

(07535.) und ließ in vlîßeclîchen biten,

(07536.) daß er nâch brûderlîchen siten

(07537.) in des amtes erließe

(07538.) und einen anderen hieße

(07539.) meister in dem lande wesen.

(07540.) dô die brîve wurden gelesen,

(07541.) nâch der brûdere râte

(07542.) sante er vil drâte

(07543.) boten kegen Nieflant.

(07544.) mit brîven tet er in bekant,

(07545.) daß sie einen meister dar

(07546.) koren nâch irem willen gar.

(07547.) dô in die botschaft komen was

(07548.) und man die brîve gelas,

(07549.) mit râte man einen andern kôs.

(07550.) meister Cûnrât wart dô lôs.

(07551.) er hatte gerâten, daß ist wâr,

(07552.) in Nieflande drie jâr.

(07553.) er vûr zû dûtschen landen wider.

(07554.) ein vromer helt der riet sider,

(07555.) meister Otto was er genant.

(07556.) man wart sîn vrô in Nieflant.

(07557.) er was vil mancher tugende rîch,

(07558.) dêmûteclîchen hielt er sich,

(07559.) er was getrûwe unde gût

(07560.) und achte nicht ûf ubermût.

(07561.) er was ein vil gût sûneman,

(07562.) doch hielt er herteclîchen an,

(07563.) wâ man bie vienden solde wesen.

(07564.) er was ein helt ûß erlesen,

(07565.) des wîsete er in deme lande vil.

(07566.) sîn lob stûnt gar âne zil.

(07567.) Bie sînen zîten eß geschach,

(07568.) daß man die Rûßen rîten sach

(07569.) stoltzlîch in des kuniges lant.

(07570.) sie vrometen roub und brant

(07571.) mit eime kreftigen her.

(07572.) sie prûveten selben sich zûr wer

(07573.) wol ûf drîßec tûsent man:

(07574.) nicht vorder man sie zelen kan.

(07575.) wer sie sach, dem wârn ir genûc,

(07576.) got selbe ir vil dar nider slûc

(07577.) durch ire vil grôße hôchvart.

(07578.) sie quâmen zû vil starc geschart

(07579.) mit mancher banier liechtgevar.

(07580.) ouch was von Darbet komen dar

(07581.) der bischof Allexander,

(07582.) mit im vil manich ander

(07583.) der cristenheit gar zû vromen,

(07584.) als ich die mêre hân vernomen.

(07585.) waß mac ich sprechen mêre?

(07586.) die rote mûete sêre

(07587.) alle die Rûßen, daß ist wâr,

(07588.) daß wîseten sie sint offenbâr.

(07589.) von Velîn wâren brûdere dâ

(07590.) nicht vile, der meister anderswâ

(07591.) mit here kegen den vienden lac,

(07592.) daß wante den Rûßen manchen slac,

(07593.) der in wol mochte wurden sîn.

(07594.) daß wart dâ offenbâre schîn.

(07595.) von Lêal quâmen brûdere dar,

(07596.) doch nicht ein alzû grôße schar.

(07597.) von Wîßenstein ouch mâßen vil.

(07598.) wer rechte ir zal wißßen wil:

(07599.) viere und drîßec uber al

(07600.) sach man an der brûdere zal.

(07601.) lantvolkes hatten die brûdere gnûc,

(07602.) daß alleß gûten willen trûc

(07603.) zû strîtene mit der Rûßen schar.

(07604.) Dô daß volk was komen dar,

(07605.) daß bie den brûderen solde wesen,

(07606.) zû hant begunde man ûß lesen

(07607.) daß lantvolk ûf die linken sît:

(07608.) die solden halden dâ den strît.

(07609.) von dûtscher art die grôßeren schar

(07610.) des kuniges man brâchten dar:

(07611.) die hielden dâ zûr rechten hant.

(07612.) dâ wart mit êren an gerant.

(07613.) die brûdere und ouch ire man

(07614.) allenthalben hiwen an.

(07615.) dô bleib in der nôt

(07616.) bischof Allexander tôt.

(07617.) zwei teil der Rûßen quam kein in,

(07618.) die slûgen sie gar vluchtic hin

(07619.) ûf deme velde her und dar.

(07620.) die Rûßen wichen mit ir schar

(07621.) daß velt ûf unde nider;

(07622.) sie kârten sich dicke wider,

(07623.) doch was ir vrome cleine dar an:

(07624.) sie ließen dâ vil manchen man.

(07625.) der brûdere hant mit êren rach

(07626.) waß in leides ie geschach

(07627.) von den Rûßen lange zît.

(07628.) daß velt was breit und wît,

(07629.) der Rûßen val der was grôß,

(07630.) des strîtes sêre sie verdrôß:

(07631.) man sach vlîhen unde jagen.

(07632.) der Rûßen wart dâ vil geslagen.

(07633.) dâ was gotes hulfe zît:

(07634.) ein dûtscher mûste geben strît

(07635.) wol sechzic Rûßen, daß ist wâr,

(07636.) daß wil ich sprechen offenbâr.

(07637.) der kunic Dimitre was ein helt,

(07638.) vumf tûsent Rûßen ûß erwelt

(07639.) mit den begreif er dô die wer.

(07640.) entriten was sîn ander her.

(07641.) Nû moget ir hôren, wie eß gienc.

(07642.) der brûdere vane die were gevienc

(07643.) kegen in ûf eine bôse bach.

(07644.) dâ er der brûdere her besach.

(07645.) der brûdere volkes was alsô vil,

(07646.) als ich ûch nû sagen wil:

(07647.) sechzic unde hundert man,

(07648.) dâ mûste in genûgen an.

(07649.) dâ wâren vûßgenger mite,

(07650.) die trâten wol nâch heldes site

(07651.) hin vor an eine brucken stân.

(07652.) eß wart vil gût von in getân.

(07653.) der was bî nâ achzic man.

(07654.) sie pflichten mit den brûderen an

(07655.) und hiwen sich von den Rûßen dô,

(07656.) des manich Rûße wart unvrô.

(07657.) alsô quâmen die brûdere wider

(07658.) mit grôßen êren zû lande sider.

(07659.) den achzic mannen sage ich danc,

(07660.) daß ir swert sô wol clanc

(07661.) in den selben zîten

(07662.) bie der brûdere sîten.

(07663.) nû wil ich lâßen von der nôt.

(07664.) vumf tûsent Rûßen lâgen tôt

(07665.) ûf der selben walstat.

(07666.) die andern vluchtic und mat

(07667.) jageten hin zû lande.

(07668.) in tet vil wê die schande.

(07669.) sint clagete manich rûßisch wîb

(07670.) ires lieben mannes lîb,

(07671.) der in dem strîte sîn ende nam

(07672.) und nimmer mêr zû lande quam.

(07673.) sus was ergangen der strît.

(07674.) des tragen noch die Rûßen nît

(07675.) ûf die brûdere, daß ist wâr.

(07676.) der hât gewert vil manich jâr.

(07677.) Der meister dô des landes nôt

(07678.) den besten einen tac enpôt,

(07679.) mit den er zû râte wart

(07680.) zû Rûßen eine herevart.

(07681.) des kuniges man des wâren vrô.

(07682.) dar zû bereite man sich dô

(07683.) volleclîch uber al daß lant.

(07684.) daß volk gemeine wart besant,

(07685.) Letten, Lîven, Eisten gnûc.

(07686.) ir aller wille sie dar trûc.

(07687.) der meister brâchte brûdere dar

(07688.) waß er mochte an sîner schar

(07689.) wol achzic und hundert dô.

(07690.) des was daß volk gemeine vrô.

(07691.) daß her man dô schatzen began

(07692.) ûf achzehn tûsent man,

(07693.) die mit pferden wâren dâ.

(07694.) vil manche kopertûre grâ

(07695.) sach man dâ nâch ritters site.

(07696.) dâ wâren schiflûte mite

(07697.) vil nâ nûn tûsent man:

(07698.) alsus man prûven die began.

(07699.) dô sie quâmen vor daß lant,

(07700.) daß dâ Rûßen ist genant,

(07701.) man rotte daß her vil gar

(07702.) an maniche stoltze schar.

(07703.) dâ mite reit er al zû hant

(07704.) menlîch in der Rûßen lant.

(07705.) man herte her unde dar

(07706.) mit vil mancher rischen schar.

(07707.) Îseburc dâ wart verbrant

(07708.) aber von der brûdere hant.

(07709.) die burc hôrte den Rûßen zû,

(07710.) die ûch ist genennet nû.

(07711.) Der brûdere her daß kârte hin,

(07712.) zû Plezcowe stûnt sîn sin,

(07713.) dar quam eß menlîchen zû.

(07714.) daß dûchte die Rûßen alzû vrû.

(07715.) die brûdere trâten ûf daß lant.

(07716.) zû hant die Rûßen mit ir hant

(07717.) ir stat branten in den grunt

(07718.) und trâten in der selben stunt

(07719.) ûf ire burc, die was gût

(07720.) und von den Rûßen wol behût.

(07721.) die burc ist Plezcowe genant.

(07722.) dar umme liet ein schôneß lant.

(07723.) die brûdere legeten sich dâ vor.

(07724.) die Rûßen machten wol ir tor,

(07725.) wen ire burc die ist sô gût:

(07726.) die wîle sie haben einen mût,

(07727.) daß sie nicht zweien under sich,

(07728.) sô ist die burc ungewinlich.

(07729.) den selben Rûßen was komen

(07730.) helfe. harte cleinen vromen

(07731.) mochten sie von den gehân,

(07732.) sie entorsten der brûdere nicht bestân.

(07733.) die helfe, die ich hân genant,

(07734.) die was von Nôgarten in gesant

(07735.) und hulfen in ire vesten

(07736.) weren vor den gesten.

(07737.) sie hatten rischer lûte vil,

(07738.) dâ von ich nicht mêr sprechen wil.

(07739.) daß weter was naß unde kalt,

(07740.) daß kein sturmen nicht enstalt.

(07741.) dô vûr daß her mit râte dan,

(07742.) zû schiffe gienc vil manich man.

(07743.) der brûdere her vûr uber dô,

(07744.) des wurden al die Rûßen vrô.

(07745.) ein rûßisch vurste quam gerant,

(07746.) der was Juries genant.

(07747.) er was an des kuniges stat.

(07748.) den meister er vil tûre bat,

(07749.) daß er zû im quême

(07750.) und sîne rede vernême.

(07751.) der meister der was nicht laß,

(07752.) in ein schif zû hant er saß

(07753.) mit sumelîchen sînen,

(07754.) brûderen und pilgerînen,

(07755.) er hatte bie im schutzen gût:

(07756.) mit den ließ er sich uber die vlût.

(07757.) dô er uber daß waßßer quam,

(07758.) er Juries den meister nam

(07759.) und machte einen vride gût.

(07760.) des vreute sich der Rûßen mût.

(07761.) dô der vride was volgân,

(07762.) der meister und die sînen sân

(07763.) giengen hin zû schiffe wider.

(07764.) der meister kundete sider

(07765.) den vride sînen mannen.

(07766.) zû hant sie riten dannen,

(07767.) ie der man zû lande wart.

(07768.) sus ante sich die herevart.

(07769.) Dar nâch uber daß ander jâr

(07770.) dô warb der meister offenbâr

(07771.) zû sînen vrûnden allen

(07772.) ein her kegen Semegallen.

(07773.) dâ mite quam er vor daß lant.

(07774.) im wurden andere mêre bekant

(07775.) von den Lettowen.

(07776.) die ließen sich schowen

(07777.) mit einem schônen here breit

(07778.) ân der brûdere wißßenheit.

(07779.) sie hatten brâcht in einen walt

(07780.) von Lettowen manchen helt balt:

(07781.) sie wolden heren Nieflant.

(07782.) daß wart dem meistere bekant.

(07783.) des nachtes quam ein man geriten,

(07784.) er tet nâch vrûntlîchen siten,

(07785.) der gab dem meistere dô den rât,

(07786.) er sprach: “meister, nû lât

(07787.) ûwer her kêren wider,

(07788.) eß geliebet ûch sider:

(07789.) die Lettowen an diser nacht

(07790.) sint hie bie mit grôßer macht

(07791.) und wollen sûchen ûwer lant.”

(07792.) dô daß dem meistere wart bekant,

(07793.) der warnunge was er vrô.

(07794.) mit deme here kârte er dô

(07795.) nâch sîner brûdere râte wider.

(07796.) an dem dritten tage sider

(07797.) quam der Lettowen her

(07798.) geweldeclîchen ûf daß mer:

(07799.) kegen Osele stûnt ir sin.

(07800.) kurtzelîchen quâmen sie dar hin.

(07801.) die wîle sie herten Osellant,

(07802.) meister Otte hatte gesant

(07803.) sîne boten uber al:

(07804.) kegen Darbet unde Lêal,

(07805.) und wâ er helfe sich versach,

(07806.) dô sante er sînen boten nâch.

(07807.) Meister Otto nicht enließ,

(07808.) sîn her er sich bereiten hieß,

(07809.) daß mit im gekêret was

(07810.) zû Rîge, als ich itzunt las.

(07811.) mit deme here kârte er hin:

(07812.) nâch den heiden stûnt sîn sin.

(07813.) dâ sie geriten wâren vor,

(07814.) dâ volgete er ûf irme spor.

(07815.) daß lantvolk quam vaste zû

(07816.) beide spâte unde vrû.

(07817.) alsus reit er vil manchen stîc,

(07818.) ê dan er quam in die Wîc.

(07819.) alle die er hatte besant

(07820.) die quâmen zû im in daß lant.

(07821.) die Wîc die ist bie dem mere gelegen,

(07822.) daß wißßen, die dâ wonens pflegen.

(07823.) des kuniges man quâmen ouch dar

(07824.) mit mancher êrlîchen schar.

(07825.) von Darbet bischof Vriderîch

(07826.) der quam wol einem helde glîch

(07827.) mit allen, die er mochte hân.

(07828.) der legete sînen vlîß dar an:

(07829.) er quam mit sînen lûten gar

(07830.) willeclîchen an die schar.

(07831.) der meister brâchte ein michel her

(07832.) mit sînen ûf daß wilde mer.

(07833.) der winter der was alsô kalt,

(07834.) des mancher mûter kint enkalt.

(07835.) der heiden der was wider komen

(07836.) von Osele, als ich hân vernomen,

(07837.) und hatten vol ir hant

(07838.) und ein teil daß lant verbrant.

(07839.) die her lâgen sô nâhen,

(07840.) daß sie einander sâhen

(07841.) zû beider sîten ûf dem mer.

(07842.) zû hant der Lettowen her

(07843.) mit sînen slitten wîslîch

(07844.) vaste zingelten umme sich.

(07845.) sie prûveten beider sîten,

(07846.) daß sie mûsten strîten.

(07847.) daß ies, daß ûf dem mere lac

(07848.) der grôßen burden nicht erschrac,

(07849.) die eß zû beiden sîten trûc:

(07850.) eß was in allen vaste gnûc.

(07851.) Von Darbet und von Lêal,

(07852.) meister Otto an der zal,

(07853.) ouch dar zû des kuniges man,

(07854.) die ich nicht alle genennen kan,

(07855.) sunder einen ritter gût,

(07856.) der hatte eines lewen mût,

(07857.) der was Sîverîth genant,

(07858.) und was uber des kuniges lant

(07859.) zû Revele ein houbtman,

(07860.) (in allen ich wol gûtes gan)

(07861.) dise hêrren drâte

(07862.) mit eime snellen râte

(07863.) manten al gelîche dô

(07864.) ir volk, daß sichß stelte sô,

(07865.) eß solde strîten sunder wanc.

(07866.) daß her gemeine dô ûf dranc.

(07867.) die bischove ûf der linken sît

(07868.) solden halden dô den strît.

(07869.) den tet man rischer brûdere gnûc,

(07870.) als zû nôten was gevûc.

(07871.) von Revele er Sîverîth

(07872.) der solde halden den strît

(07873.) mit sînen zû der rchten hant.

(07874.) sie wâren alle des gemant,

(07875.) daß sie zû beiden sîten

(07876.) daß her solden bestrîten.

(07877.) die brûdere sprenkten zû

(07878.) an die heiden alzû vrû.

(07879.) dô sie quâmen zû gerant,

(07880.) die heiden trâten al zû hant

(07881.) in die slitten mit ir schar.

(07882.) die brûdere gâheten nâch in dar.

(07883.) dô sie an sie quâmen gerant,

(07884.) die êrsten brûdere al zû hant

(07885.) mit irre banier sturtzeten dô

(07886.) in die slitten; des wurden vrô

(07887.) die heiden und stâchen ir orse tôt.

(07888.) der brûdere ein teil in der nôt

(07889.) lâgen dâ geslagen nider.

(07890.) die anderen brûdere dar wider

(07891.) satzten sich mit mannes hant.

(07892.) al die wîle quam gerant

(07893.) daß grôße her der cristen:

(07894.) eß enmochte nicht lenger vristen.

(07895.) dâ mochte man wol schowen

(07896.) ein ungevûgeß howen

(07897.) von den heren beiden,

(07898.) von cristen und von heiden.

(07899.) der strît was starc und grôß,

(07900.) daß blût ûf dem îse vlôß

(07901.) von ir beider sîten.

(07902.) dô gienc eß an ein strîten,

(07903.) dô sach man manchen rischen man

(07904.) ellenthaften howen an.

(07905.) dâ wart geslagen in der nôt

(07906.) der gûte meister Otte tôt

(07907.) und zwêne und vumfzic brûdere gût:

(07908.) die gußßen dâ durch got ir blût.

(07909.) dâ viel ouch manich vromer helt

(07910.) von beiden sîten ûß irwelt.

(07911.) lantvolkes viel ein teil.

(07912.) got der gebe ir sêle heil!

(07913.) die lebenden brûdere liden nôt,

(07914.) ir urs bliben meistic tôt,

(07915.) des mûsten sie dâ stân zû vûß.

(07916.) daß tet den heiden sorgen bûß.

(07917.) waß ir doch zû urse bliben,

(07918.) von den wart heldes werc getriben

(07919.) ûf dem îse her und dar.

(07920.) sie hiwen sich durch manche schar.

(07921.) der bischof von Darbete quam,

(07922.) die sîne er alle zû im nam.

(07923.) der bischof ouch von Lêal

(07924.) quam an der brûdere zal.

(07925.) alsus erkoberte daß her

(07926.) der brûdere aber zû der wer.

(07927.) die rittere quâmen zû hant

(07928.) von Revele ouch zû gerant.

(07929.) die brûdere mûsten strîten

(07930.) zû den selben zîten

(07931.) under einem wâpencleide.

(07932.) sie tâten dâ vil leide

(07933.) den heiden ûf des meres îs.

(07934.) die jageten durch einen prîs

(07935.) ûf dem mere her und dar

(07936.) mit vil mancher rischen schar.

(07937.) der heiden wart vil geslagen.

(07938.) die durch prîs solden jagen,

(07939.) der lâgen sechzehn hundert tôt.

(07940.) die walstat was von blûte rôt.

(07941.) dâ wart zû der selben stunt

(07942.) von Lêal der bischof wunt.

(07943.) sechs hundert der cristen her

(07944.) wurden geslagen ûf dem mer.

(07945.) der brûdere her von dannen reit,

(07946.) daß was den heiden nicht leit,

(07947.) wan sie behielden daß îs

(07948.) und dar zû des siges prîs.

(07949.) die heiden vûren zû lande.

(07950.) sie hatten vol ir hande

(07951.) bejaget in deme strîten

(07952.) zû den selben zîten.

(07953.) meister Otte, daß ist wâr,

(07954.) der hatte gerâten drie jâr,

(07955.) sechs mânde mêre,

(07956.) wol mit gûter lêre

(07957.) in Nieflande die sîner zît.

(07958.) sîn lob was breit und wît.

(07959.) dô der helt wart geslagen

(07960.) man hôrte in vlîßeclîchen clagen

(07961.) uber alle Nieflant.

(07962.) brûder Anders zû hant

(07963.) von der brûdere râte

(07964.) wart gesetzet drâte,

(07965.) daß er des amtes wîlde

(07966.) und an sîner pflege hîlde,

(07967.) wen in ein ander wurde gesant

(07968.) zû meister wider in daß lant.

(07969.) al die wîle daß geschach,

(07970.) daß man die Lettowen sach

(07971.) heren in der brûdere lant.

(07972.) dô im daß wart bekant,

(07973.) er jagete in menlîchen nâch,

(07974.) ûf die heiden was im gâch.

(07975.) sîn her was cleine gnûc,

(07976.) der gûte wille in doch trûc.

(07977.) der brûdere her von mûdekeit

(07978.) hatte sich dar zû bereit,

(07979.) daß eß wolde rûwe pflegen.

(07980.) an gemach was eß gelegen.

(07981.) den heiden was daß rasch bekant.

(07982.) ûf die brûdere zû hant

(07983.) quâmen sie gerant dô.

(07984.) des wart der brûder her unvrô.

(07985.) waß sal ich mêr dâ von sagen?

(07986.) brûder Andrês wart geslagen

(07987.) und zwênzic brûdere dar zû.

(07988.) sie sturben leider alzû vrû.

(07989.) dô wart aber die rûwe

(07990.) und die clage nûwe:

(07991.) uber alle Nieflant

(07992.) wart der selbe val bekant.

(07993.) sint wart daß lant getrôstet wol,

(07994.) als ich ûch vil wol sagen sol.

(07995.) Ein vromer helt der wart gesant

(07996.) zû meister hin zû Nieflant.

(07997.) er hatte sinnenclîchen rât,

(07998.) daß sult ir hôren an der tât,

(07999.) die er tet bie sîner zît.

(08000.) sîn name was grôß und wît

(08001.) uber alle die lant.

(08002.) brûder Walter was er genant

(08003.) von Nortecken geborn.

(08004.) den Semegallen tet er zorn,

(08005.) als ich nû wol sagen mac.

(08006.) im quâmen ûf einen tac

(08007.) sîne kummentûre gar

(08008.) mit mancher êrlîchen schar.

(08009.) den hatte er boten vor gesant

(08010.) uber alle sîne lant.

(08011.) von Revele brâchte er eine schar

(08012.) harte ritterlîchen dar.

(08013.) dô daß her zû samne quam,

(08014.) des meisters willen man vernam.

(08015.) dâ mite vûren sie zû hant

(08016.) in der Semegallen lant.

(08017.) dô er vor Terweten quam

(08018.) mit dem here, er vernam

(08019.) und trat selbe an das wal.

(08020.) daß her im volgete âne zal.

(08021.) Terweten man dô gewan.

(08022.) dar ûffe sie slûgen manchen man,

(08023.) daß er des lebenes vergaß.

(08024.) der brûdere craft daß hûs besaß.

(08025.) daß wart dô gespîset wol,

(08026.) als man die burge spîsen sol.

(08027.) der meister reit zû Rîge wider

(08028.) mit sînem her. er dâchte sider

(08029.) um eine andere herevart

(08030.) hin kegen Mezoten wart.