(06027.) Die brûdere nicht enließen,

(06028.) ir volk sie alleß hießen

(06029.) sich bereiten, eß wêre zît,

(06030.) sie wolden brengen in den strît

(06031.) die von Lettowen wâren komen.

(06032.) der brûdere her wart dô genomen

(06033.) und geordenieret wol,

(06034.) als man kein den strîten sol.

(06035.) dô der brûdere her dô was

(06036.) bereitet, als ich itzunt las,

(06037.) die besten drungen bie den vanen,

(06038.) niemant durfte den anderen manen:

(06039.) sie wâren alle gemanet wol,

(06040.) als ich itzunt sagen sol.

(06041.) Der brûder her die heidenschaft

(06042.) bestûnt mit menlîcher craft

(06043.) und brâchten in strîtes genûc.

(06044.) die heiden wâren ouch sô clûc,

(06045.) daß sie daß widergulden gar.

(06046.) der heiden nam sich ûß ein schar

(06047.) ûf einem ende, dâ sie striten

(06048.) mit vil menlîchen siten.

(06049.) der slûgen sie ein teil dar nider.

(06050.) daß lantvolk vlôch vaste sider

(06051.) in vil kurtzer wîle dan.

(06052.) dâ vlôch man uber man.

(06053.) die heiden wâren nicht sô laß,

(06054.) sie enrûrten sich ie baß

(06055.) in zorne kein der cristen schar.

(06056.) die durchhiwen sie gar,

(06057.) sie machten einen rûm vil grôß,

(06058.) des die cristen alle verdrôß.

(06059.) dô daß her durchhowen was

(06060.) von den heiden, als ich las,

(06061.) der brûder und der pilgerîn,

(06062.) dô enmochteß anders nicht gesîn,

(06063.) sie enmûsten von der walstat

(06064.) wîchen, wen sie wâren mat

(06065.) von den heiden wurden al.

(06066.) dâ nam die cristenheit den val.

(06067.) die pilgerîme gar unvrô

(06068.) kein der Rîge wichen dô,

(06069.) wen sie treib dar zû die nôt.

(06070.) sie sâhen vor iren ougen tôt

(06071.) vil manchen jungen rischen man.

(06072.) sus kârten die pilgerîm von dan.

(06073.) dô die brûdere wurden gewar,

(06074.) daß sô wênic was ir schar

(06075.) und ir zehene lâgen tôt,

(06076.) dô twanc sie die grôße nôt,

(06077.) daß sie mûsten wîchen dâ nâch.

(06078.) von der walstat was in gâch.

(06079.) daß spil daß was vergoßßen gar,

(06080.) des nâmen sie vil gûte war

(06081.) und wichen zû Lenewarten hin.

(06082.) betrûbet was ir aller sin,

(06083.) daß ir helfe was sô crank:

(06084.) sie mûsten wîchen sunder dank.

(06085.) die heiden nâmen roubes vil,

(06086.) mêr, dan ich ûch sagen wil,

(06087.) und gâben schônen teil

(06088.) iren goten, daß sie in heil

(06089.) und helfe hatten brâcht.

(06090.) zû hant dô kârten wol bedâcht

(06091.) die heiden hin zû lande.

(06092.) sie hatten vol ir hande

(06093.) roubes alle dâ genomen,

(06094.) als ich von wârheit hân vernomen.

(06095.) die cristen wurden alle dô

(06096.) von deme strîte gar unvrô.

(06097.) die rede lâße wir nû wesen.

(06098.) der veigen mac keiner genesen.

(06099.) Ein alt sprichwort hân ich vernomen,

(06100.) daß manchem zû der tur ist komen:

(06101.) wan eß dem manne missegât,

(06102.) daß nôte ein schade eine stât,

(06103.) er enbrenge zwêne oder drî.

(06104.) der rede nû geswigen sî.

(06105.) Die Oselêre wâren vrô,

(06106.) daß die brûdere hatten sô

(06107.) bie der Dune den strît verlorn,

(06108.) daß was in liep und nicht zorn.

(06109.) sie wurden des zû râte

(06110.) mit einander drâte,

(06111.) daß sie vrielîch wurden leben

(06112.) und wider die gotes rittere streben.

(06113.) in was dô von hertzen leit,

(06114.) daß die reine cristenheit

(06115.) in irme lande hatte behalt.

(06116.) sich tet umme junc und alt,

(06117.) waß der Oselêre was.

(06118.) der cristen bie in nicht genas

(06119.) in irme lande uber al.

(06120.) des quam vil mancher sint in val,

(06121.) als in selben ist bekant.

(06122.) die wîle was zû Nieflant

(06123.) ein brûder an des meisters stat,

(06124.) der rechtekeite nie abe entrat.

(06125.) der vernam die mêre,

(06126.) daß al die Oselêre

(06127.) hetten den touf geleit hin.

(06128.) daß dûchte in grôß ungewin.

(06129.) sîne boten al zû hant

(06130.) wurden wol mit vlîße gesant

(06131.) an des koniges dienstman.

(06132.) helfe er bat mit trûwen hân

(06133.) von den ritteren, daß ist wâr.

(06134.) die boten wurben offenbâr

(06135.) zû Revele die botschaft.

(06136.) dâ wart gelobt mit mannes craft,

(06137.) daß die rittere wolden komen

(06138.) durch der gotes rittere vromen

(06139.) und ouch durch die cristenheit.

(06140.) zû hant ein tad in wart geleit

(06141.) ûf des kalden winters tage.

(06142.) vor wâr ich ûch daß allen sage.

(06143.) die boten kârten dô wider

(06144.) zû Rîge, der meister sider

(06145.) sante in al der brûdere lant

(06146.) und tet in offenbâr bekant,

(06147.) daß er zû Osele wolde hern:

(06148.) niemant mochte daß bewern

(06149.) denne got alleine.

(06150.) sint half die tugende reine

(06151.) und ir kint Jhêsus Crist,

(06152.) daß dar nâch ir kurtzer vrist

(06153.) wart ein winter alsô kalt,

(06154.) des manich Oselêr entkalt.

(06155.) des winters macht die was sô grôß,

(06156.) daß sie die wilden sêhe beslôß

(06157.) ân aller hande stucke,

(06158.) sam eß wêre ein brucke

(06159.) zwischen Osele und Eistlant.

(06160.) dô wurden al zû hant besant

(06161.) von Revele manich helt gût.

(06162.) zû reisene stûnt ir aller mût.

(06163.) der brûdere man ouch quâmen,

(06164.) dô sie die mêr vernâmen,

(06165.) alle willeclîchen gar,

(06166.) rîch und arm mit mancher schar.

(06167.) die bischove nicht enließen,

(06168.) mit trûwen sie hießen

(06169.) ir lûte reisen vaste mite.

(06170.) daß was dô ir aller site.

(06171.) Dô daß her zû samne quam,

(06172.) einen grôßen wec eß nam

(06173.) kein der Oselêre lant.

(06174.) daß wart in harte snel bekant.

(06175.) ir lant liet zwû mîle in dem mere,

(06176.) dar quâmen die brûder mit ir here.

(06177.) zû hant sach man den brant vil grôß,

(06178.) sîn rouch als ein sturmweter dôß

(06179.) uber al der Oselêre lant.

(06180.) ir jâmer mêrte sich zû hant.

(06181.) man sach ouch manche rische schar

(06182.) heren her und ouch dar,

(06183.) dâ von die Oselêre

(06184.) wurden vreuden lêre.

(06185.) waß ir immer wart berant,

(06186.) daß leben ließen sie vor ein pfant.

(06187.) dâ tet man in vil grôßen schaden,

(06188.) roubes wart dô vil geladen.

(06189.) Letten, Lîven, Eisten

(06190.) nâmen wol den meisten

(06191.) roub, der ie genomen wart.

(06192.) daß tâten sie gar ungespart:

(06193.) sie nâmen al ir slitten vol,

(06194.) als ich die wârheit sagen sol.

(06195.) dâ mite kârten sie zû hant

(06196.) vor einen hagen, der ist genant

(06197.) Carmele, mit mannes craft.

(06198.) der meister hatte iß sô geschaft,

(06199.) daß man des suntages vrû

(06200.) trête deme hagen zû.

(06201.) dô der suntac dô quam,

(06202.) ie der man sîn wâpen nam.

(06203.) dâ mite trâten sie an den hagen.

(06204.) sie wurden risch dar abe geslagen.

(06205.) ergrimmet wâren sêre

(06206.) alle die Oselêre.

(06207.) die cristen triben aber wider

(06208.) in den hagen mit slegen sider

(06209.) die Oselêre zû der stunt.

(06210.) dâ wart sumelîcher wunt,

(06211.) daß er ûf die erden saß

(06212.) unde strîtes immer vergaß.

(06213.) Diß triben sie verre ûf den tac.

(06214.) der Oselêre ein teil dâ lac

(06215.) tôt vor deme hagen nider.

(06216.) doch satzten sich zûr were wider

(06217.) die in deme hagen wâren,

(06218.) sie kunden wol gebâren

(06219.) menlîch zû der nôt.

(06220.) zû hant der meister gebôt,

(06221.) daß man die gûten schutzen

(06222.) solde dâ benutzen.

(06223.) die schutzen rische nâmen

(06224.) ir armbruste und quâmen

(06225.) vor den hagen mit grimme.

(06226.) dâ hôrte man jâmerstimme

(06227.) schrîen die Oselêre uber al.

(06228.) die cristen machten einen schal

(06229.) und trâten an den hagen,

(06230.) der umme die Oselêre was geslagen.

(06231.) den gewunnen sie mit gewalt

(06232.) und slûgen beide junc und alt.

(06233.) daß in dem hagen was gewesen,

(06234.) des sach man mâßen vil genesen.

(06235.) Dô der Oselêre hagen

(06236.) was von den brûderen ûß geslagen,

(06237.) dâ sach man roubes alsô vil,

(06238.) daß der roub was âne zil,

(06239.) den die cristenheit dar nam.

(06240.) daß her gentzlîchen quam

(06241.) bie den hagen, der dâ was

(06242.) gewunnen, als ich itzunt las.

(06243.) dâ lâgen die brûdere mit irre macht

(06244.) gewaldeclîchen zwû nacht.

(06245.) die cristen trûgen unde triben

(06246.) waß in dem hagen was bliben

(06247.) mit gûtem vlîße in daß her.

(06248.) die Oselêre hatten keine wer.

(06249.) dô eß quam an den dritten tac,

(06250.) der brûder, der des heres pflac,

(06251.) der was in eime râte.

(06252.) dô quam ein bote drâte

(06253.) von den Oselêren dar,

(06254.) er sprach: “wir sîn alle gar

(06255.) von disme here verdrucket,

(06256.) unser macht ist uns entzucket.

(06257.) wir hân gesehn, daß er gesiget

(06258.) der der brûder her nû pfliget,

(06259.) wâ er sich hine kêret.

(06260.) wir sîn alsô gesêret,

(06261.) daß wir daß ummer mogen clagen.

(06262.) volkes ist uns vil geslagen.

(06263.) nû wîset mich wâ der meister sie.”

(06264.) sie sprâchen alle: “er ist hie bie,”

(06265.) und wîseten in dar mit der hant.

(06266.) dô dem meistere wart bekant,

(06267.) daß ein Oselêre quam,

(06268.) zû hant er einen brûder nam,

(06269.) den hieß er gêhn vil drâte

(06270.) nâch der brûdere râte

(06271.) und brengen den Oselêr vor sich.

(06272.) dô gienc der brûder tugende rîch

(06273.) nâch deme Oselêre

(06274.) und hôrte sîne mêre.

(06275.) dô er in wol hatte vernomen,

(06276.) er hieß in vor den meister komen.

(06277.) Der Oselêr quam zû hant,

(06278.) er sprach: “hêrre, ich bin gesant

(06279.) zû dir durch einen gantzen vride,

(06280.) den gelobe wir dir bie der wide.

(06281.) breche wir immer mêre

(06282.) wider dîne lêre,

(06283.) sô tû mit uns waß dû wilt.

(06284.) dû salt wesen unser schilt

(06285.) und unser rechter hêrre als ê.

(06286.) eß engeschiet uns nimmer mê.”

(06287.) der meister antwurte im dô:

(06288.) “sage den Oselêren sô,

(06289.) daß sie in mîme vride komen

(06290.) zû mir, eß mac in wol vromen.”

(06291.) der Oselêre wider quam,

(06292.) al sîne besten er zû sich nam

(06293.) und kârte zû dem meistere wider.

(06294.) zû hant dô wart geleget nider

(06295.) die vêde von in beiden.

(06296.) dô gienc eß an ein scheiden.

(06297.) der meister der nam gîsele gût,

(06298.) wen er hatte einen wîsen mût,

(06299.) und kârte dô zû lande wider.

(06300.) ich weiß wol, daß selden sider

(06301.) sô grôß roub genomen wart.

(06302.) eß kârten wider ouch ûf der vart

(06303.) die rittere die dar wâren komen

(06304.) von Revele durch der brûder vromen.

(06305.) sie hatten alle vol ir hant

(06306.) und riten wider in ir lant.

(06307.) der bischove dienstman

(06308.) kârten ouch vrôlîchen dan

(06309.) in ir lant gemeine

(06310.) grôß unde cleine

(06311.) und brâchten roubes gnûc.

(06312.) der brûdere man wâren sô clûc,

(06313.) daß sie ir slitten hetten vol

(06314.) roubes; daß tet in vil wol.

(06315.) Der meister mit den sînen

(06316.) brûderen und pilgerînen

(06317.) kârten hin zû Rîge vrô.

(06318.) ir mût der stûnt in allen hô.

(06319.) dô sie zû Rîge quâmen wider,

(06320.) dô lac ir trûren alleß nider.

(06321.) brûder Juries was gewesen

(06322.) zû Nieflande, als ich hân gelesen,

(06323.) meister an des meisters stat.

(06324.) des amtes er nicht abe trat

(06325.) biß daß meister Werner quam

(06326.) von dûtschen landen und nam

(06327.) die meisterschaft an sîne gewalt.

(06328.) in liebte beide junc und alt.

(06329.) der hôe meister Anne hatte in gesant

(06330.) zû meister dar zû Nieflant

(06331.) mit sîner brûdere râte.

(06332.) er riet vrû unde spâte,

(06333.) als sînen êren wol gezam.

(06334.) in disen dingen dô vernam

(06335.) kunic Myndowe mêre,

(06336.) die wâren im vil swêre,

(06337.) wen er dannoch cristen was,

(06338.) als ich vor von im las.

(06339.) von Sameiten wâren gesant

(06340.) boten in der Lettowen lant

(06341.) an den kunic Myndowen,

(06342.) der dâ riet zû Lettowen,

(06343.) und an Traniâten.

(06344.) besunder sie den bâten,

(06345.) daß er ir botschaft wurbe

(06346.) daß sie in nicht verturbe.

(06347.) Traniâte sprach zû in:

(06348.) “saget mir ûwern sin.”

(06349.) die boten sprâchen alsô:

(06350.) die Sameiten wêren vrô,

(06351.) daß kunic Myndowe wolde lân

(06352.) die cristen under im vergân

(06353.) und wurde wider heiden.

(06354.) sus solde er sich scheiden

(06355.) von der toufe, die er hât:

(06356.) daß wêre der Sameiten rât.

(06357.) Traniâte zû in sprach:

(06358.) “ir Sameiten habt gemach,

(06359.) wir gân hin an Myndowen

(06360.) und vlêhen unde drowen

(06361.) sô lange, daß im wirdet leit

(06362.) zû aller sîner cristenheit.”

(06363.) zû hant sie sich beviengen

(06364.) mit handen unde giengen

(06365.) an den konic Myndowen

(06366.) und Marthen sîne vrowen.

(06367.) Traniât und die Sameiten

(06368.) nicht lenger sie beiten,

(06369.) dô sie zû im quâmen,

(06370.) an eine stat sie in nâmen

(06371.) unde sprâchen alsô:

(06372.) “die Sameiten sint unvrô

(06373.) durch dich und durch dîn êre:

(06374.) du salt nû ir lêre

(06375.) volgen, sich, daß wirt dir gût.

(06376.) von irenthalben wirt behût

(06377.) alleß daß dir gehôric ist,

(06378.) daß du lâßest varen Crist,

(06379.) dâ mite du bist betrogen.

(06380.) eß ist vêrlîchen gelogen

(06381.) waß dich die brûdere hân gelârt,

(06382.) von dînen goten dich hân bekârt.

(06383.) dîn vater was ein kunic grôß,

(06384.) bie den zîten sînen genôß

(06385.) mochte man nicht vinden:

(06386.) wiltu nû dînen kinden

(06387.) und dir machen ein joch

(06388.) alsô wol als du doch

(06389.) mochtes ummer wesen vrie!

(06390.) dir wonet ein grôße tôrheit bie.

(06391.) wanne die cristen hânt verdrucket

(06392.) die Sameiten, sô ist entzucket

(06393.) dîn êre und al dîn rîche:

(06394.) sô mûstu endelîche

(06395.) eigen wesen und dîne kint.

(06396.) wie bistu sô rechte blint!

(06397.) du bist ein wîser kunic genant,

(06398.) daß ist dir doch unbekant.

(06399.) wiltu der cristen werden vrie,

(06400.) sô stân dir die Sameiten bie,

(06401.) die dich mit trûwen meinen.

(06402.) du salt dich des vereinen

(06403.) und kêre dich von der cristenheit.

(06404.) lâß dir mit trûwen wesen leit,

(06405.) daß du ein kunic lobelîch

(06406.) gewaldic und dar bie rîch

(06407.) hâst dîne gote verlân,

(06408.) die dînen eldern hân gestân

(06409.) bie in manchen sachen.

(06410.) wiltu die gote swachen

(06411.) und dich halden zû der cristenheit?

(06412.) tû hin und lâß dir wesen leit,

(06413.) daß du des ie gedâchtes

(06414.) und ouch ie vor gebrâchtes!

(06415.) du salt mit trûwen wesen bie

(06416.) den Sameiten, wie eß sie

(06417.) umme den cristentûm gestalt.

(06418.) daß râten beide junc und alt,

(06419.) die dir êren gunnen.

(06420.) die sinne sint dir entrunnen.

(06421.) wir hân verwâr daß vernomen,

(06422.) daß êrste daß wir mit dir komen

(06423.) zû Letten und zû Nieflant,

(06424.) sô komen sân in dîne hant

(06425.) die lant von in beiden:

(06426.) sie wollen werden heiden.”

(06427.) Dô der kunic sô vernam,

(06428.) den cristen wart er wider gram

(06429.) und volgete gar irs râtes mite

(06430.) und hielt sich an der heiden site.

(06431.) daß was der vrowen alsô zorn.

(06432.) den sie zû vrûnde hatte erkorn,

(06433.) der was brûder Sievert genant,

(06434.) geborn was er von Duringen lant,

(06435.) deme tet sie die rede kunt

(06436.) und sprach zû der stunt:

(06437.) “ich wil an den kunic gân

(06438.) und wil in biten, daß er sân

(06439.) dich mit vride lâße varn

(06440.) zû lande. ouch wil ich nicht sparn,

(06441.) waß ich dir gehelfen mac.

(06442.) owê, daß ich disen tac

(06443.) ie gelebete, daß ist mir leit!

(06444.) grôß hertzeleit ist mir bereit.”

(06445.) die vrowe gienc al zû hant

(06446.) dô sie kunic Myndowen vant.

(06447.) der bete sie alsus began:

(06448.) “hêrre, sende disen man

(06449.) zû Rîge sînem meister wider

(06450.) und lege dan den vride nider:

(06451.) daß ist vil wol dîn êre.”

(06452.) “ich volge dîner lêre,”

(06453.) sprach der kunic al zû hant.

(06454.) sus wart der brûder dô gesant

(06455.) zû Nieflande drâte

(06456.) mit vrowen Marthen râte.

(06457.) kunic Myndowe ließ zû hant

(06458.) uber alle sîne lant

(06459.) alle die cristen vâhen

(06460.) und ouch ein teil erslahen.

(06461.) er hatte boten ouch gesant

(06462.) an den kunic zû Rûßen lant.

(06463.) die quâmen im drâte wider

(06464.) und sageten im sider,

(06465.) daß die Rûßen wêren vrô,

(06466.) daß sîn gemûte stûnt alsô.

(06467.) der Rûßen boten wurden zû hant

(06468.) an kunic Myndowen ouch gesant.

(06469.) die gelobten im helfe grôß.

(06470.) den kunic der mêre nicht verdrôß.

(06471.) Zû hant Myndowe began

(06472.) einer reise, sam ein man,

(06473.) dem sîn gemûte ist bittere,

(06474.) ûf die gotes rittere.

(06475.) dô der tac der reise quam

(06476.) den Myndowe mit den Rûßen nam,

(06477.) dô kârte er hin vil drâte

(06478.) mit sînem mâgen Traniâte.

(06479.) sie hatten ein vil grôßeß her

(06480.) unde wolden sunder wer

(06481.) al der gotes rittere lant

(06482.) zû Letten und zû Nieflant

(06483.) verwûsten und verterben

(06484.) und ouch ir volc ersterben.

(06485.) zû hant daß her sich strackete hin

(06486.) kein der Dune durch gewin.

(06487.) Myndowe hatteß sô vernomen,

(06488.) die Rûßen solden kein im komen.

(06489.) die Rûßen die quâmen nicht,

(06490.) ich enweiß durch waß geschicht.

(06491.) zû hant dô Myndowe quam

(06492.) vor Wenden und daß vernam,

(06493.) daß in die Rûßen alle wîs

(06494.) hetten geleitet ûf ein îs

(06495.) (daß sult ir alsô verstân:

(06496.) daß sie in wolden eine lân

(06497.) heren in deme lande

(06498.) mit roube unde mit brande),

(06499.) er sprach: “Traniâte, sage,

(06500.) du bôser man und rechter zage,

(06501.) nû hân die Rûßen mir gelogen,

(06502.) den meister hâstu mir gezogen

(06503.) zû einem unvrûnde zû:

(06504.) waß râtes gibestu mir nû?

(06505.) Letten, Lîven und die lant,

(06506.) die du gelobtes in mîne hant,

(06507.) die kêren sich an mich nicht ein hâr:

(06508.) diß reisen mac mir werden swâr.

(06509.) ich wil kêren al zû hant

(06510.) wider in mîn eigen lant

(06511.) und wil an mîn reisen lân.”

(06512.) sîn her brach ûf alleß sân

(06513.) und vûr hin zû lande wider.

(06514.) eß mochte in sêre rûwen sider,

(06515.) daß er Traniâtes rât

(06516.) ie gevolgete mit der tât.

(06517.) dô er dô zû lande quam,

(06518.) sîn vrowe in lieblîchen nam

(06519.) ûf ein ende unde sprach:

(06520.) “dô ich mit ougen dich gesach

(06521.) komen von der herevart,

(06522.) dô sach ich, daß dîn lîb vil zart

(06523.) was betrûbet harte;

(06524.) nû weste ich gerne, arme Marthe,

(06525.) wie diß heren wêre ergân:

(06526.) daß lâß mich, hertzelieb, verstân.”

(06527.) Der kunic sprach al zû hant:

(06528.) “dô ich quam in Letten lant

(06529.) vor ein wîchbilde mâßen grôß

(06530.) und mir daß niemant ûf slôß,

(06531.) als Traniâte

(06532.) mir gelobet hâte,

(06533.) und die lant wider mich

(06534.) algemeine satzten sich,

(06535.) dô wart betrûbet mir der mût.

(06536.) ouch dûchte mich daß mâßen gût,

(06537.) daß die Rûßen quâmen nicht.

(06538.) mit den ich stân an stêter pflicht

(06539.) an mînem gelubde, daß ich tete

(06540.) mit aller mîner vrûnde bete

(06541.) und ouch durch Traniâten,

(06542.) der mir daß wolde râten:

(06543.) dar umme mûß ich betrûbet sîn.”

(06544.) “Nû prûve, liebe hêrre mîn,

(06545.) daß ich dir arme Marthe sagen.

(06546.) diß mûoß ich von schulden clagen,

(06547.) daß du Traniâtes rât

(06548.) hâst volvûret mit der tât,

(06549.) daß dich vil wol mac rûwen.

(06550.) ich sage dirß entrûwen:

(06551.) hettes du gevolget mir,

(06552.) eß wêre nû geliebet dir.

(06553.) der meister hât geêret dich

(06554.) und al dîn volc und ouch mich

(06555.) mit mancher hande sachen:

(06556.) er ließ dir gesmîde machen

(06557.) nâch kuniclîchen êren,

(06558.) die rechtekeit er lêren

(06559.) ließ dich sîne pfaffen.

(06560.) nû volgestu einem affen,

(06561.) ich meine Traniâten,

(06562.) der dich hât verrâten.

(06563.) noch bekêre dînen mût

(06564.) und volge mir, eß wirt dir gût.”

(06565.) der kunic zû der vrowen sprach,

(06566.) dô er ir stêtekeit gesach:

(06567.) “vrowe, diß hân ich getân.

(06568.) dise rede lâß bestân,

(06569.) sie enkan dir nicht gevromen

(06570.) noch mir zû keinem vromen komen.

(06571.) ich hân versmeit die cristenheit,

(06572.) eß sie dir lieb oder leit.

(06573.) den meister den hân ich verlorn

(06574.) und die heidenschaft erkorn.

(06575.) eß ist nû zû spâte.

(06576.) ich bin dînem rate

(06577.) unhôric gar zû dirre stunt.

(06578.) vrowe, nû habe dînen munt.

(06579.) eß kêre war eß kêre.

(06580.) Traniâten lêre

(06581.) und der Sameiten wil volgen ich,

(06582.) des sich endelîch an mich.

(06583.) ich weiß wol, daß ich hân

(06584.) tôrlîchen genûc getân.

(06585.) des sol alles werden rât.

(06586.) dîn lêre nû ein ende hât.”

(06587.) Myndowen was liebes vil geschehen,

(06588.) als ûch hie vor ist verjehen:

(06589.) des hatte er gar vergeßßen.

(06590.) er hatte nicht gemeßßen,

(06591.) waß êren unde wirdekeit

(06592.) der meister hatte an in geleit,

(06593.) dô er im die crône irwarb.

(06594.) die wirdekeit an im vertarb,

(06595.) daß er Traniâten rât

(06596.) vollenbrâchte mit der tât,

(06597.) daß er meister Werner

(06598.) entpfienc alsô mit sînem her.

(06599.) Bie des zieten eß geschach,

(06600.) daß Myndowe den vride brach.

(06601.) der meister was ein wîse man,

(06602.) er greif sîn ding menlîchen an

(06603.) unde legete hûte vor daß lant.

(06604.) waß im der stîge wart bekant,

(06605.) die von Lettowen giengen dar,

(06606.) der ließ er aller nemen war.

(06607.) al zû hant dô diß geschach,

(06608.) der Rûßen her man wol besach.

(06609.) daß wolde zû Darbeten in daß lant.

(06610.) dô daß dem meister wart bekant,

(06611.) er sante rische brûdere dar

(06612.) und manchen helt, daß ist wâr.

(06613.) dô sie zû Darbete wâren komen,

(06614.) der Rûßen her wart vernomen

(06615.) bie der stat mit mancher schar.

(06616.) die îlten sêre, daß ist wâr.

(06617.) ê dan daß volc quam zûr wer,

(06618.) die Rûßen machten mit irme her

(06619.) des tages manchen man unvrô.

(06620.) Darbeten sie gewunnen dô

(06621.) und branten an der selben stunt

(06622.) die stat vil gar in den grunt.

(06623.) eine burc in nâhen bie was:

(06624.) wer dar ûf quam, der genas.

(06625.) tûmhêrren und der bischof

(06626.) quâmen ûf der burge hof.

(06627.) die dûtschen brûdere quâmen ouch dar,

(06628.) man wart irre hulfe wol gewar.

(06629.) der Rûßen her was vil grôß.

(06630.) den bischof sêre daß verdrôß.

(06631.) daß her sich kein der burge bôt.

(06632.) die pfaffen vurchten sêre den tôt.

(06633.) daß was ie ir alder site

(06634.) und wonet in noch vil vaste mite.

(06635.) sie jehen, man sulle sich vaste wern:

(06636.) mit vlîhen sie sich gerne nern.

(06637.) die brûdere trâten an die wer,

(06638.) sie schußßen kein der Rûßen her,

(06639.) daß ander volc sie riefen an.

(06640.) ûf der burc was manich man,

(06641.) die zû der were griffen dô.

(06642.) des wâren die tûmhêrren vrô.

(06643.) die Rûßen sêre des verdrôß,

(06644.) daß man sô vaste ûf sie schôß;

(06645.) ir schutzen schußßen vaste wider.

(06646.) von der burc sie kârten sider,

(06647.) sie wâren der reise vrô.

(06648.) lûte und gût sie nâmen dô

(06649.) und îlten wider in ir lant.

(06650.) Der meister hatte die wîle gesant

(06651.) in sîn lant uber al.

(06652.) im was volkes âne zal

(06653.) mit manchem rischen brûdere komen,

(06654.) als ich vur wâr hân vernomen.

(06655.) mit dem here hûb er sich hin

(06656.) kein Darbeten ûf den selben sin,

(06657.) er wolde der Rûßen her bestân.

(06658.) sîn wille mochte nicht ergân:

(06659.) die Rûßen wâren in ir lant.

(06660.) dô daß dem meistere wart bekant,

(06661.) er was der mêre gar unvrô,

(06662.) daß im daß her entran alsô.

(06663.) Darbet ist ûch vil genant,

(06664.) nû wil ich machen ûch bekant

(06665.) mit mîner rede in kurtzer vrist,

(06666.) wô die stat gelegen ist.

(06667.) ir habt hie vor wol vernomen,

(06668.) wie der cristentûm ist komen

(06669.) mit gotes helfe in Nieflant:

(06670.) nû wil ich ûch tûn bekant

(06671.) von dem lande in kurtzer vrist,

(06672.) wie daß underscheiden ist.

(06673.) Von Rîge ein bischof ist genant,

(06674.) der hât burge unde lant

(06675.) in sînem gestifte wol gelegen,

(06676.) daß wißßen, die dâ wonens pflegen.

(06677.) Sêlen, Lîven, Letten lant

(06678.) stêt ein teil in sîner hant.

(06679.) daß andere teil wart gegeben

(06680.) an daß geistlîche leben

(06681.) den brûderen von dem dûtschen hûs.

(06682.) die haben burge vor die clûs

(06683.) gebûwet in die selben lant,

(06684.) die ûch itzunt sint genant.

(06685.) des gûtes ist nicht bliben,

(06686.) die lantbescheidunge sie beschriben.

(06687.) die stat zû Rîge ir vrîheit hât,

(06688.) als an iren brîven stât.

(06689.) dô man daß alleß wol beschreib,

(06690.) daß des nichtes nicht beleib,

(06691.) und der cristentûm was komen

(06692.) zû Nieflant, als ir hât vernomen,

(06693.) dô bûwete man durch den cristentûm

(06694.) in daß lant zwei bischtûm.

(06695.) Darbet eineß ist genant,

(06696.) daß liet bie der Rûßen lant;

(06697.) daß andere heißet Lêal.

(06698.) in ist gegeben wol ir zal

(06699.) an lûten und an gûte

(06700.) den stiften zû hûte.

(06701.) der andere teil der brûdere ist.

(06702.) daß wart hie vor mit grôßer list

(06703.) mit brîven underscheiden wol,

(06704.) als man die lant teilen sol.

(06705.) wâ heide wechset oder clê,

(06706.) acker, walt oder sê,

(06707.) des ist zû Eistlant nicht bliben,

(06708.) eß sie alleß wol beschriben.

(06709.) dâ wonet ouch grâwer munche leben,

(06710.) den ist ir vrîheit dâ gegeben,

(06711.) daß in dar an genûget wol.

(06712.) got man an in êren sol.

(06713.) wâ der orden ist gegeben

(06714.) dô halden sie vil wol ir leben.

(06715.) Revele daß gûte lant

(06716.) gehôret an des koniges hant,

(06717.) der Denemarken hât gewalt.

(06718.) daß lant ist alsô gestalt:

(06719.) eß liet nâhen bie dem mere

(06720.) und ist hie vor mit manchem here

(06721.) von Denemarken uberriten.

(06722.) der selbe kunic hât eß erstriten,

(06723.) daß eß der kunige eigen ist

(06724.) und hât gewesen lange vrist.

(06725.) daß lantvolc Eisten sint genant,

(06726.) die dienen in des kuniges hant.

(06727.) der hât dar inne burge gût,

(06728.) dâ von daß lant ist wol behût,

(06729.) dar ûffe ist vromer rittere vil,

(06730.) als ich die wârheit sprechen wil.

(06731.) die hât der kunic belênet wol.

(06732.) wer daß gût besitzen sol,

(06733.) der mac wol êrlîchen varn.

(06734.) sie helfen wol daß lant bewarn.

(06735.) dâ ist ouch manich vromer knecht,

(06736.) der wol verdienet sîn lêhenrecht.

(06737.) sie heißen al des kuniges man

(06738.) und haben dicke schîn getân

(06739.) ir helfe kein der heidenschaft.

(06740.) ir houbtman der hât die craft,

(06741.) wan er wil von des landes wegen,

(06742.) er brenget manchen stoltzen degen

(06743.) zû den brûderen an ir schar.

(06744.) man wirt irre helfe wol gewar

(06745.) an manchen stunden in der nôt.

(06746.) ir ist geleget mancher tôt

(06747.) bie den brûderen als ein helt.

(06748.) sie sint kûne und ûß erwelt.

(06749.) wan sie in die reise komen,

(06750.) ir helfe wirt vor gût genomen.

(06751.) etteswenne ist daß geschehen,

(06752.) daß man die Rûßen hât gesehen

(06753.) heren in des koniges lant:

(06754.) die brûdere hulfen in zû hant

(06755.) ûf die Rûßen mit ir her,

(06756.) sô wart zû kranc der Rûßen wer.

(06757.) die bischove, die ich hân genant,

(06758.) (ich wil sie ûch aber tûn bekant:

(06759.) von Rîge und von Lêal,

(06760.) von Darbet ist des dritten zal)

(06761.) sie hulfen wol mit irre craft

(06762.) urlougen ûf die heidenschaft.

(06763.) wan sie der meister leit verstân,

(06764.) sô senden sie des stiftes man

(06765.) und irs lantvolkes vil.

(06766.) als ich die wârheit sprechen wil,

(06767.) sô ist dicke daß geschehen,

(06768.) daß man sie selben hât gesehen

(06769.) in der reise, daß ist wâr,

(06770.) heren mit der brûdere schar

(06771.) durch got von himelrîche;

(06772.) der lôntes in êwiclîche.

(06773.) nû ist ûch ein teil bekant,

(06774.) wie geteilet sint die lant,

(06775.) wie die brûdere um sich heren

(06776.) und mûßen vor den heiden weren

(06777.) mit gotes helfe ire lant.

(06778.) nû wil ich machen ûch bekant,

(06779.) dô ich die rede hie vor ließ.

(06780.) meister Werner er hieß,

(06781.) der zû Nieflande riet,

(06782.) dô die ungetrûwe diet

(06783.) Myndowe und Traniât

(06784.) gâben ûf die cristen rât,

(06785.) die wolden sie vertrîben gar:

(06786.) des wâren sie voreinet gar.

(06787.) Sameiten unde Kûren

(06788.) wâren bôse nâkebûren

(06789.) bie Goldingen und zûr Mimele.

(06790.) doch half in got von himele,

(06791.) daß sie verwûsten Kûrlant,

(06792.) als ûch her nâch wol wirt bekant.

(06793.) Der gûte meister Werner

(06794.) sante boten um ein her

(06795.) in Nieflande uber al.

(06796.) im quam volkes michel zal

(06797.) von den landen manche schar

(06798.) hin zû Rîge, daß ist wâr.

(06799.) dô daß her was alleß komen

(06800.) zû Rîge, als ir habt vernomen,

(06801.) der meister wart des liebes kranc.

(06802.) des was betrûbet sîn gedanc,

(06803.) doch sach er gotes willen an:

(06804.) der im die sûche hatte getân,

(06805.) an den ließ er al sîn dinc.

(06806.) eß was vil manich jungelinc

(06807.) von brûderen in die reise komen.

(06808.) der wart einer dâ genomen,

(06809.) daß er des heres solde pflegen.

(06810.) sie hûben sich in gotes segen

(06811.) bie daß mer ûf den strant

(06812.) und quâmen hin zû Kûrlant.

(06813.) zû Goldingen wart eß vernomen,

(06814.) daß von Rîge ein her was komen.

(06815.) die brûdere wurden alle vrô.

(06816.) nicht lange sûmeten sie sich dô,

(06817.) der kummentûr nicht enließ,

(06818.) sîne brûdere er sich wâpen hieß.

(06819.) ir wâpen wurden an geleit.

(06820.) mit sîner schar er snelle reit

(06821.) dâ er daß her von Rîge vant.

(06822.) im wâren die wege wol bekant.

(06823.) dô die von Goldingen wâren komen,

(06824.) sie wurden gerne mite genomen

(06825.) vor Lasen; sus was eine burc genant,

(06826.) die lac dannoch in Kûrlant.

(06827.) dô kârte hin der brûdere her.

(06828.) die Kûren satzten sich zû wer.

(06829.) eß quam in doch cleinen vromen.

(06830.) dô daß her was alleß komen,

(06831.) ein harter sturm wart erhaben,

(06832.) man trûc daß vûer an den graben.

(06833.) den brûderen liebes vil geschach.

(06834.) der Kûren burc man burnen sach

(06835.) nicht anders, dan eß wêre strô.

(06836.) daß her wart algemeine vrô.

(06837.) die burc zû Lasen man gewan.

(06838.) der Kûren wênic icht entran,

(06839.) ir wart geslagen mancher tôt,

(06840.) sumelîcher sich gevangen bôt.

(06841.) ûf der burge nicht bleib,

(06842.) wîb und kint man dannen treib.

(06843.) daß her nam roubes vol die hant.

(06844.) die burc wart in den grunt gebrant.

(06845.) daß her wart algemeine vrô,

(06846.) ein ander burc sie sûchten dô

(06847.) gewaldeclîchen mit ir her.

(06848.) dâ vunden sie vil grôße wer.

(06849.) Merkes die burc hieß.

(06850.) sturmes man sie nicht erließ,

(06851.) man schôß der Kûren manchen tôt.

(06852.) zû jungest vorchten sie die nôt,

(06853.) die zû Lasen was geschehen.

(06854.) daß was in alleß wol verjehen.

(06855.) des wart ir hertze gar unvrô.

(06856.) um einen vride bâten sie dô.

(06857.) der wart mit râte in gegeben:

(06858.) man ließ den Kûren dô daß leben.

(06859.) die burc sie mûsten lâßen stên,

(06860.) man hieß sie alle dar ûß gên,

(06861.) ir gesinde und ouch ir gût.

(06862.) die brûdere wurden wol behût,

(06863.) daß eß vor dem her genas.

(06864.) der an des meisters stat dâ was

(06865.) der hieß die burc verbrennen gar.

(06866.) dar nâch kârten sie mit der schar

(06867.) vor eine burc, die hieß Grubîn.

(06868.) dô enmochteß anders nicht gesîn,

(06869.) sie enmûsten mit gedinge leben

(06870.) und sich von der burge geben:

(06871.) dar zû twanc sie der brûdere craft.

(06872.) man ließ sie dâ nicht wonhaft.

(06873.) die burc wart verbrennet blôß,

(06874.) der arbeit nîmande dâ verdrôß.

(06875.) sus wâren die drî burge verbrant

(06876.) mit der reise in Kûrlant.

(06877.) die mit gedinge wâren komen

(06878.) zûn brûderen, als ir habt vernomen,

(06879.) die wurden brâcht in kurtzer stunt

(06880.) zû Goldingen alle wol gesunt.

(06881.) die ließ man dâ blîben

(06882.) mit kinden und mit wîben.

(06883.) Dô gote die êre was geschehen,

(06884.) als ûch itzunt ist verjehen,

(06885.) der brûdere her gemeine ûf brach.

(06886.) wol geordent man eß sach

(06887.) gewaldeclîch durch Kûrlant

(06888.) rîten wider ûf den strant.

(06889.) sie quâmen zû Rîge wol gesunt.

(06890.) dâ wurden in andere mêre kunt.

(06891.) die wîle sie wâren ûß gewesen

(06892.) in Kûrlant, als ich hân gelesen,

(06893.) und hetten burge dâ verbrant,

(06894.) sô was von Lettowen lant

(06895.) hin zû Nieflande komen

(06896.) ein her, als ich hân vernomen:

(06897.) daß brâchte Traniâte dar.

(06898.) er kârte hin mit mancher schar

(06899.) bôse wege und smalen stîc,

(06900.) biß er quam in die Wîc.

(06901.) er herte in deme lande

(06902.) mit roube und mit brande.

(06903.) er mochte vrîlîchen hern:

(06904.) die im sîn reisen solden wern,

(06905.) die wâren hin zû Kûrlant

(06906.) mit der brûdere her gesant.

(06907.) Der meister, der zû Rîge was

(06908.) des liebes cranc, als ich las,

(06909.) wâ er sich hulfe versach,

(06910.) dâ sante er sîne boten nâch.

(06911.) zû Sigewalde wart gesant.

(06912.) die brûdere quâmen in zû hant

(06913.) willeclîchen mit ir wer.

(06914.) die wîle was Traniâten her

(06915.) von der Wîc her wider komen.

(06916.) dô daß der meister hatte vernomen,

(06917.) er sante sîn her kegen in.

(06918.) die burgêre durch der sêle gewin

(06919.) quâmen zû der brûdere schar

(06920.) mit manchem helde, daß ist wâr.

(06921.) des wâren die brûdere alle vrô.

(06922.) sie kârten von der Rîge dô.

(06923.) daß her zû Dunemunde quam,

(06924.) die legirstat iß dâ bie nam:

(06925.) ein clôster ist alsô genant

(06926.) und liet ûf des meres strant.

(06927.) ê danne eß wurde mitte nacht,

(06928.) Traniât quam mit sîner macht

(06929.) geriten ûf der brûdere her.

(06930.) sie satzten sich kein im zû wer.

(06931.) der brûdere her gemeine ûf brach,

(06932.) zû strîte man nicht wol gesach,

(06933.) ie doch mûste eß daß selbe sîn:

(06934.) sie striten bie des mânes schîn.

(06935.) der heiden wart ein teil geslagen.

(06936.) wer kan dâ von die wârheit sagen,

(06937.) ob ein vrûnt den anderen stach?

(06938.) der strît in der nacht geschach.

(06939.) die walstat wart von blûte rôt,

(06940.) dâ lâgen nûn brûdere tôt,

(06941.) der burgêre wart ein teil geslagen.

(06942.) man hôrte die helde sêre clagen.

(06943.) die veigen lâgen dâ dar nider.

(06944.) Traniâten her kârte sider

(06945.) wider zû Lettowen.

(06946.) dâ wart er von Myndowen

(06947.) harte wol entpfangen dô.

(06948.) des was Traniâte vrô

(06949.) und sagete Myndowen mêre,

(06950.) wie eß irgangen wêre.

(06951.) Ich wil ûch sagen von Kûrlant,

(06952.) wie eß den brûderen gienc in hant.

(06953.) mit urlouge was ir arbeit grôß,

(06954.) durch got sie cleine des verdrôß.

(06955.) die Kûren hatten burge gnûc,

(06956.) bie wîlen man sie dar ûß slûc,

(06957.) daß in der kopf zubrochen wart.

(06958.) man vûr maniche herevart

(06959.) von der Dune zû Kûrlant.

(06960.) eß gienc in dicke wol in hant.

(06961.) der kurtzewîle man pflac

(06962.) in Kûrlande manchen tac.

(06963.) die Mimele was zû verre gelegen,

(06964.) got der mûste ir selbe pflegen,

(06965.) in quam nicht helfe von Eistlant.

(06966.) spîse wart dâ hin gesant,

(06967.) brûdere, wâpen unde pfert.

(06968.) sie kosten mancher marke wert.

(06969.) mit vienden wâren sie verladen,

(06970.) die brâchten vil dicke schaden:

(06971.) sie guldenß in vil dicke wider.

(06972.) sus gienc eß ûf unde nider,

(06973.) als daß urlouge tût.

(06974.) gelucke ist zû allen dingen gût:

(06975.) des hatten sie vil dicke ein teil,

(06976.) got gab in schaden und heil.

(06977.) In was ein burg gelegen bie

(06978.) uber gûter mîlen drie,

(06979.) Kretênen was daß hûs genant.

(06980.) vil dicke quâmen sie gerant

(06981.) zûr Mimele vor daß burgetor.

(06982.) sperwechsel hielden sie dâ vor.

(06983.) die brûdere sêre des verdrôß,

(06984.) daß ir hôchvart was sô grôß.

(06985.) einer reise wart von in gedâcht,

(06986.) die wart mit râte vollenbrâcht.

(06987.) kein Kretênen stûnt ir sin.

(06988.) der kummentûr selbe vûr dâ hin

(06989.) mit brûderen eine gevûge schar

(06990.) und rische knechte, daß ist wâr.

(06991.) sie quâmen vor die burc gerant,

(06992.) die Kretêne was genant.

(06993.) eß was den von der burge leit,

(06994.) daß man sô nâhen zû in reit.

(06995.) nicht lenger wart von in gebiten,

(06996.) beide zû vûß unde geriten

(06997.) quâmen sie kreftic dar

(06998.) mit zorne ûf der brûdere schar.

(06999.) die brûdere satzten sich zû wer.

(07000.) in was zû starc der heiden her.

(07001.) waß sal ich mêr dâ von sagen?

(07002.) dâ wart ein vromer helt geslagen,

(07003.) Veltemus der selbe hieß,

(07004.) in manheit er sich vinden ließ.

(07005.) zwêne brûdere lâgen bie im tôt,

(07006.) die anderen liden grôße nôt.

(07007.) doch half in got von himele,

(07008.) daß si quâmen zûr Mimele.

(07009.) sie verlorn gûter knechte ein teil.

(07010.) got der gebe irre sêle heil!

(07011.) zwêne brûdere viengen sie,

(07012.) ich wil sagen, wie eß den ergie.

(07013.) der kummentûr der einer was.

(07014.) durch iren haß er nicht genas,

(07015.) sie satzten in ûf einen rôst.

(07016.) der ander, der wart sint gelôst:

(07017.) brûder Cûnrât Wirschinc

(07018.) hieß der selbe jungelinc.

(07019.) Dô die reise was ergân,

(07020.) als ich nû gesaget hân,

(07021.) die von Kretênen wâren stoltz.

(07022.) sie sprachen: “nû ist dem starken holtz

(07023.) die wurtzele undene ûß gegraben.

(07024.) wir mogen unsen willen haben

(07025.) mit den anderen deste baß.”

(07026.) die brûdere wol vernômen daß.

(07027.) sie wurden grimmes mûtes gar

(07028.) und machten eine reise dar

(07029.) beide arm unde rîch.

(07030.) durch got sie vûren willeclîch.

(07031.) ir macht was alle ûß geweget.

(07032.) mit râte ein lâge wart geleget,

(07033.) ir jegere schûfen sie hin vor.

(07034.) die quâmen vor daß burgetor,

(07035.) die Kretênen was genant.

(07036.) dô daß den vienden wart bekant,

(07037.) sie wâren der brûdere kumfte vrô.

(07038.) sie jageten algemeine dô

(07039.) biß sie in die lâge ranten.

(07040.) die brûdere dô sprancten.

(07041.) dô sie quâmen sô nâhen,

(07042.) daß sie die lâge sâhen,

(07043.) in was kegen der burge gâch.

(07044.) die brûdere jageten in nâch

(07045.) zû Kretênen in die veste.

(07046.) die ernsthaften geste

(07047.) ir wirte slûgen sie alle tôt.

(07048.) wîb und kinder liden nôt,

(07049.) die giengen mit den anderen hin.

(07050.) sus gulden sie den gewin,

(07051.) den sie hetten vor nomen.

(07052.) in wâren sulche geste komen,

(07053.) der sie genußßen cleine.

(07054.) ir gût algemeine

(07055.) vûrte man zûr Mimele dô.

(07056.) die cristen wâren alle vrô,

(07057.) sie hatte got dâ hine gesant.

(07058.) daß hûs wart in den grunt gebrant.