Saturs

Ðîs sadaïas teksta tulkojums latvieðu valodâ (09037.-10042.rinda)

Iepriekðçjâ sadaïa vidusaugðvâcu valodâ (08031.-09037.rinda)

Nâkamâ sadaïa vidusaugðvâcu valodâ (10041.-11031.rinda)

Livlädische Reimchronik (09038.-10040.)

(09038.) Nameise quam dar nâch gerant

(09039.) und brâchte manchen raschen man.

(09040.) ir zal ich ûch nicht gesagen kan.

(09041.) er was ir houbet zû Terwetein.

(09042.) er quam des schiere uber ein,

(09043.) er wolde den brûderen jagen nâch.

(09044.) im was ûf den wec vil gâch.

(09045.) die besten lûte er zû sich las,

(09046.) waß ir zû Doblênen was.

(09047.) der wec wart nicht gespart,

(09048.) nâch den brûderen ûf die vart

(09049.) ranten sie unde liefen,

(09050.) vil wênic sie dô sliefen.

(09051.) sie quâmen die afterhûte an.

(09052.) daß wart dem vogete kunt getân.

(09053.) er was dannoch sêre kranc,

(09054.) des was trûric sîn gedanc.

(09055.) got der gab im sînen trôst,

(09056.) daß er von sêrde wart erlôst.

(09057.) daß er die craft an im vernam,

(09058.) sîn hertze in grôße vreude quam.

(09059.) zû hant er ordente sîn her

(09060.) kein den vienden zû wer.

(09061.) zû vûze wurden sie geschart,

(09062.) ir pferde wâren wol bewart,

(09063.) sie enwolden vlîhen nicht von dan.

(09064.) Nameise und manich man

(09065.) quâmen gerant al durch ein holtz;

(09066.) sie wâren grim und dâ bie stoltz.

(09067.) al die mit im wâren komen,

(09068.) dô sie hatten wol vernomen,

(09069.) daß der voget mit sîme her

(09070.) satzte sich kein in zû wer,

(09071.) waß ir dâ geriten was

(09072.) die erbeißeten an daß gras.

(09073.) ir her was snelle komen nâch.

(09074.) dô wart in ûf die brûdere gâch.

(09075.) der voget was vor sîner schar.

(09076.) dô er der viende wart gewar,

(09077.) er lief ûf einem und stach:

(09078.) dar mite daß her zû samne brach.

(09079.) waß sol ich dâ von sagen mêr?

(09080.) den Semegallen wart vil sêr

(09081.) ir her gar durchschrôten.

(09082.) sie ließen vumfzic tôten

(09083.) ligen ûf der walstat.

(09084.) die anderen wâren strîtes sat

(09085.) und vlogen kein irme lande.

(09086.) sie ließen dâ zû pfande

(09087.) wol zwei hundert schilde.

(09088.) rechte als sie wêren wilde

(09089.) die Semegallen vlohen hin.

(09090.) die brûdere teilten iren gewin

(09091.) mit den Kûren uber al,

(09092.) waß ir was an der zal.

(09093.) Baboten was ein burc genant,

(09094.) die was in alder zît verbrant.

(09095.) bie dem wale was der strît,

(09096.) walt und velt dâ bie schône lît.

(09097.) die brûdere und die Kûren dô

(09098.) hûben sich zû lande vrô.

(09099.) dâ wurden sie wol entpfangen.

(09100.) sus was der strît ergangen.

(09101.) man lobete dar umme Jhêsum Crist,

(09102.) der alles lobes wirdic ist.

(09103.) Dar nâch nicht lange eß geschach,

(09104.) daß man um eine reise sprach,

(09105.) der kummentûr und der voget.

(09106.) nicht lenger wart dar nâch gezoget,

(09107.) die brûdere wurden dô besant.

(09108.) sie rîten dar ûf al zû hant

(09109.) man solde der Semegallen nicht sparn

(09110.) unde hin zû Doblênen varn.

(09111.) zû Goldingen was der rât,

(09112.) die burc in Kûrlande stât.

(09113.) dô wurden boten ûß gesant

(09114.) nâch den Kûren sân zû hant.

(09115.) in wart die reise kunt getân.

(09116.) sie brâchten manchen rischen man

(09117.) vor ein holtz ûf ein gras,

(09118.) dâ in hin bescheiden was.

(09119.) der kummentûr und der voget

(09120.) mit brûderen quâmen nâch gezoget

(09121.) zû den Kûren ûf daß gras,

(09122.) dâ ir samenunge was.

(09123.) der knappen was ein michel schar,

(09124.) die mit den brûderen quâmen dar.

(09125.) dô daß her was alleß komen,

(09126.) leitsagen wurden dâ genomen

(09127.) und machten sich ûf die vart

(09128.) hin keit Doblênen wart.

(09129.) sie vunden bôser wege vil,

(09130.) brûch und welde âne zil.

(09131.) sie quâmen durch den lesten walt:

(09132.) eß was dannoch sô gestalt,

(09133.) daß eß dem tage nâhe was.

(09134.) ein teil man rascher lûte ûß las,

(09135.) die mit dem here wâren komen.

(09136.) ouch wurden brûdere mit genomen;

(09137.) man hieß sie mit dem vogete gên.

(09138.) ir pferde ließen sie dâ stên,

(09139.) in was kein Doblênen gâch.

(09140.) ir pferde quâmen in dâ nâch.

(09141.) der voget gienc mit sîner schar,

(09142.) daß man ir nicht ê wart gewar,

(09143.) ê dan sie quâmen an den berc

(09144.) und stigen in daß hachelwerc.

(09145.) sie wecketen manchen, der dâ slief,

(09146.) daß er dâ nâch nicht lûte enrief,

(09147.) und viengen und slûgen tôt

(09148.) wol drie hundert in der nôt

(09149.) beide vrowen und man.

(09150.) waß ûf die burc nicht entran,

(09151.) daß quam in der cristen hant.

(09152.) ir hachelwerc wart ouch verbrant.

(09153.) da wart roubes vil genomen.

(09154.) nû was der kummentûr ouch komen

(09155.) zû Doblênen mit sîner macht.

(09156.) ir pferde wurden dâ brâcht

(09157.) den, die zû vâße wâren komen

(09158.) zû Doblênen, als ir habt vernomen.

(09159.) dô ie der man sîn pfert genam

(09160.) und der roub zû samne quam,

(09161.) daß her wart ordenlîch geschart.

(09162.) kein Goldingen ûf die vart

(09163.) kârten sich die brûdere dô

(09164.) mit irme here und wâren vrô.

(09165.) man treib vrowen und kint,

(09166.) dar zû pferde und manich rint

(09167.) von Doblênen zû Kûrlant.

(09168.) sie hatten roubes vol ir hant

(09169.) in deme hachelwerke genomen.

(09170.) dô sie zû lande wâren komen,

(09171.) den teilten sie gelîche;

(09172.) der arme und der rîche,

(09173.) waß ir was an der zal,

(09174.) die nâmen bûtunge uber al.

(09175.) durch got sie gaben ouch ein teil

(09176.) und lobeten sêre um daß heil.

(09177.) dâ sie zû lande wâren komen

(09178.) von Doblên, als ir habt vernomen,

(09179.) daß lantvolc kârte an gemach.

(09180.) die brûdere man dô rîten sach

(09181.) kein Goldingen mit ir schar.

(09182.) dô man ir kumfte wart gewar,

(09183.) die zû hûse wâren blieben,

(09184.) der sorge was ein teil vertrieben.

(09185.) sie lobeten alle gelîche

(09186.) got von himelrîche.

(09187.) den Semegallen was vil leit,

(09188.) daß man sô dicke zû in reit

(09189.) von Kûrlant zû Doblên.

(09190.) sie enmochtens doch nicht ummegên:

(09191.) man brâchte in mancher hande schâch,

(09192.) daß was in allen ungemach.

(09193.) Nameise quam des uber ein,

(09194.) der houbet was zû Terwetein,

(09195.) er wolde der Semegallen leit

(09196.) rechen. kein der Dune er reit.

(09197.) er nam rasche helde mite

(09198.) gewâpent nâch der lande site.

(09199.) die reise wart zûr Mittowe kunt.

(09200.) sie santen boten an der stunt

(09201.) zû Rîge und ließen verstân.

(09202.) dem marschalc wart eß kunt getân.

(09203.) brûder Gêrhart was sîn name,

(09204.) vor wâr er trûc in sunder schame,

(09205.) und hieß von Katzenellebogen.

(09206.) er was kûne und wol gezogen.

(09207.) er hette die wârheit wol vernomen

(09208.) wen Nameise solde komen.

(09209.) er was der warnunge vrô.

(09210.) nâch den brûderen sante er dô

(09211.) und hieß sie snelle sîn bereit.

(09212.) ir wâpen wurden an geleit

(09213.) in kurtzen stunden, dô man sie eß hieß.

(09214.) die brûdere man dô rîten ließ

(09215.) ûf daß velt mit irre schar.

(09216.) der marschalc quam ouch selbe dar.

(09217.) eß wart den pilgerînen kunt.

(09218.) die quâmen in vil kurtzer stunt.

(09219.) Von Wenden was zû Rîge komen

(09220.) zûr lantwer, als ich hân vernomen,

(09221.) ein brûder und wol hundert man:

(09222.) den wart daß mêre kunt getân.

(09223.) die quâmen hovelîchen dar

(09224.) mit einer banier rôtgevar,

(09225.) daß was mit wîße durch gesniten

(09226.) hûte nâch wendischen siten.

(09227.) Wenden ist ein burc genant,

(09228.) von den die banier wart bekant,

(09229.) und ist in Letten lant gelegen,

(09230.) dâ die vrowen rîtens pflegen

(09231.) nâch den siten, als die man.

(09232.) vor wâr ich ûch daß sagen kan,

(09233.) die banier der Letten ist.

(09234.) der was in der selben vrist

(09235.) hundert hin zû Rîge komen

(09236.) zûr lantwer, als ir hât vernomen.

(09237.) ein brûder was in houbtman.

(09238.) sie wâren im gerne undertân.

(09239.) der was mit sîner schar ouch komen

(09240.) zû dem marschalc, als ir hât vernomen.

(09241.) der marschalc kôs im eine stat,

(09242.) sîn her er dâ hin rîten bat.

(09243.) dâ was ein hof bie gelegen,

(09244.) dâ wênic lûte wonens pflegen,

(09245.) er lac nicht verre von der stat.

(09246.) daß her tet alleß, daß er bat;

(09247.) sie lâgen dô, biß sie verdrôß.

(09248.) daß velt was kalt und blôß.

(09249.) wartlûte wurden ûß gesant.

(09250.) Nameise quam ûf die gerant,

(09251.) der einer wart gevangen.

(09252.) eß wêre im ubele ergangen,

(09253.) wêre er Nameisen unbekant

(09254.) gewesen. der vrâgete zû hant

(09255.) und bat in sagen mêre,

(09256.) wie eß um die brûdere wêre.

(09257.) er lôkente sêre durch die nôt,

(09258.) wen er vorchte den harten tôt.

(09259.) Eß was des tages nicht alzû vrû.

(09260.) sie îlten kein der Rîge zû.

(09261.) Nameise mit sîner schar

(09262.) wart der banier wol gewar

(09263.) und der brûdere schilde

(09264.) uber daß gevilde.

(09265.) in was zû vlihene alsô gâch,

(09266.) daß ir kein den wartman stach:

(09267.) sie kârten kein irm lande wider.

(09268.) sumelîche wurfen ir schilde nider,

(09269.) sie kunden sich nicht baß bewarn,

(09270.) und vlogen hin an zwein scharn.

(09271.) Nameise der vlôch uber lant,

(09272.) sîn ander her quam gerant

(09273.) ûf ein waßßer, daß heißet die Â.

(09274.) nû was der wartman sô nâ,

(09275.) daß er der brûder banier sach.

(09276.) im was zû sînen hêrren gâch,

(09277.) er rief und wenkte mit der hant.

(09278.) der marschalc quam zû im gerant

(09279.) und vrâgete in der mêre,

(09280.) wie eß im ergangen wêre,

(09281.) ob er die viende hette gesehn:

(09282.) des bat er im der wârheit jehn.

(09283.) er sprach: “ich hân sie wol vernomen,

(09284.) ich bin mit nôten von in komen:

(09285.) sie hatten mich gevangen.

(09286.) eß wêr mir ubele ergangen,

(09287.) hette mich Nameise nicht ernert.

(09288.) der wolde haben hîr gehert

(09289.) mit der Semegallen schar.

(09290.) dô er der banier wart gewar,

(09291.) dô vrâgete er mich der mêre.

(09292.) wie grôß daß her wêre.

(09293.) ich sprach: hîr ist der brûdere macht

(09294.) von Eistlant und von Letten brâcht.

(09295.) daß begunde in missehagen,

(09296.) sie wolden haben mich geslagen:

(09297.) Nameise dâ wider sprach.

(09298.) in was zû vlîhen alsô gâch,

(09299.) daß sie mich ließen rîten.”

(09300.) “wir suln nicht lenger bîten,”

(09301.) sprach daß her gemeine dô:

(09302.) “der gûten mêre sie wir vrô.”

(09303.) Snelle wart daß her geschart

(09304.) nâch den heiden ûf die vart.

(09305.) der marschalc rante vaste vor

(09306.) und quam ûf der heiden spor,

(09307.) die ûf die  wâren gerant.

(09308.) die banier volgeten im zû hant.

(09309.) sie jageten al gelîche

(09310.) sô unbescheidenlîche,

(09311.) daß vil manich pfert irlac.

(09312.) ê dan eß quam ûf mitten tac,

(09313.) als ich die mêre hân vernomen,

(09314.) der marschalc was sô nâhen komen,

(09315.) daß er der viende wart gewar.

(09316.) er jagete zû mit sîner schar.

(09317.) dô wart in zû lande gâch.

(09318.) ein gelucke in doch geschach:

(09319.) ir vieln wol drîßec in daß îs,

(09320.) sie wâren der sinne doch sô wîs,

(09321.) daß sie irre pferde gar verzigen

(09322.) und ließen sie in dem îse ligen

(09323.) und vlohen trûric kein dem stade.

(09324.) niemant volgete irem pfade.

(09325.) ich sage ûch, war von daß geschach.

(09326.) der in daß îs nicht enbrach,

(09327.) dem was keim lande gâch,

(09328.) den volgete der marschalc nâch:

(09329.) er kârte sich nicht an den roub.

(09330.) sumelîche wâren der sinnen toub,

(09331.) daß sie der brûdere verzigen.

(09332.) dâ sie pferde sâhen ligen

(09333.) in deme waßßere vließen,

(09334.) der wolden sie genießen.

(09335.) der marschalc wart nicht gewar,

(09336.) daß sô gevûge was sîn schar.

(09337.) vumf brûder was an sîner zal,

(09338.) nûne was ir uber al,

(09339.) drie knechte und ein ritter gût,

(09340.) der hatte tugenthaften mût

(09341.) zû gote und kein den lûten.

(09342.) ein wort wil ich bedûten,

(09343.) daß er vor der Rîge sprach,

(09344.) dô man den vienden jagete nâch:

(09345.) “ich wil noch hûte nône

(09346.) vor dem himelthrône

(09347.) bie unser vrowen nâhen

(09348.) mîne spîse enpfâhen.”

(09349.) der pilgerîme voget was er genant

(09350.) und was von Westevâlen lant.

(09351.) des urs bleib vor mûde stân,

(09352.) er mûste den brûderen abe gân.

(09353.) Nameise der vlôch uber lant

(09354.) und quam ûf daß îs gerant.

(09355.) dâ er des ritters wart gewar,

(09356.) er jagete zû mit sîner schar,

(09357.) der ritter wart von im geslagen:

(09358.) man hôrte den helt sider clagen.

(09359.) Nameise was zû lande gâch.

(09360.) dâ er die achte vor im sach

(09361.) und der brûdere wart gewar,

(09362.) er jagete zû mit sîner schar.

(09363.) er hatte bie im wol drîßec man,

(09364.) die achte rante er vrîlîch an.

(09365.) die brûder wurden nicht gewar,

(09366.) daß nâch in quam der viende schar.

(09367.) Nameise mit zorne ûf sie stach,

(09368.) dâ von geschach in ungemach.

(09369.) drie brûdere wurden tôt geslagen,

(09370.) die zwêne mûsten mite jagen,

(09371.) die vûrten sie kein Terwetein;

(09372.) des landes marschalc was der ein.

(09373.) die mit der banier jageten nâch,

(09374.) nâch den vienden was in gâch.

(09375.) dô sie quâmen sô nâhen,

(09376.) daß sie die pferde sâhen,

(09377.) die ûß dem îse wâren genomen,

(09378.) sie vrâgeten: “wô ist der marschalc komen?”

(09379.) die lûte sprâchen: “er jaget nâch.

(09380.) helde lât ûch wesen gâch:

(09381.) mit cleiner macht ist er geriten.”

(09382.) dô wart lenger nicht gebiten,

(09383.) manch ros wart mit den sporn genomen.

(09384.) sie wâren snelle dâ hin komen,

(09385.) dâ der ritter lac geslagen:

(09386.) daß begunde in missehagen.

(09387.) des jagens sie nicht ê verzigen,

(09388.) êr sie die tôten sâhen ligen

(09389.) und der marschalc was verlorn.

(09390.) daß was in leit und zorn,

(09391.) sie hetten gerne dâ gestriten,

(09392.) hetten ir die heiden dâ gebiten.

(09393.) sie jageten eine wîle sider

(09394.) und kârten kein der Rîge wider.

(09395.) des landes marschalc der wart sider

(09396.) in daß lant hin nider

(09397.) kunic Thoreiden gesant,

(09398.) der hêrre in Lettowen was genant.

(09399.) dâ vacht er einen kampf durch nôt,

(09400.) die kempfen bliben beide tôt.

(09401.) brûder Gêrhart starb alsô,

(09402.) got mache sîne sêle vrô

(09403.) dort in himelrîche:

(09404.) des wunschet im al gelîche.

(09405.) Nû habet ir hie vor vernomen

(09406.) wie meister Cûnrât was komen

(09407.) mit brûdern zû Nieflant:

(09408.) nû wil ich machen ûch bekant,

(09409.) wie er die zît dâ vertreib,

(09410.) die wîle er meister bleib.

(09411.) dô er daß lant wol besach,

(09412.) mit den bischoven er sprach,

(09413.) die in dem lande wâren.

(09414.) er kunde wol gebâren,

(09415.) daß sie im alle wâren holt:

(09416.) vor wâr ir daß gelouben solt.

(09417.) dô er des kuniges man gesach

(09418.) und mit dem houbtman gesprach,

(09419.) dô bôt er in sô sûße wort,

(09420.) daß sie gâben volbort:

(09421.) wes er von in gerte,

(09422.) vil gerne man in gewerte.

(09423.) ich wil langer rede dagen

(09424.) und wil kurtzelîchen sagen.

(09425.) dô er die vrûntschaft vernam,

(09426.) sîn hertze in grôße vreude quam.

(09427.) mit der brûder râte

(09428.) besante er vil drâte

(09429.) boten uber al daß lant.

(09430.) ein tac wart in benant,

(09431.) wenne sie zû Rîge solden komen.

(09432.) dô sie hatten daß vernomen,

(09433.) ieclîch voget mit siner schar

(09434.) quâmen willeclîchen dar.

(09435.) Vriderîch ein bischof hieß,

(09436.) den sîn tugent nicht enließ,

(09437.) er vûre selber an die schar

(09438.) mit sînen rittern, daß ist wâr.

(09439.) von Haseldorf was er geborn

(09440.) und was in daß stifte gekorn,

(09441.) daß Darbete ist genant.

(09442.) die stat is manchem wol bekant.

(09443.) der houbtman sante dar

(09444.) des kuniges man ein êrlîch schar.

(09445.) dâ sie zû Rîge wâren komen,

(09446.) als der tac was genomen,

(09447.) dâ wurden sie entpfangen wol,

(09448.) als man liebe geste sol.

(09449.) wes man zûn êren solde pflegen,

(09450.) des bleib nicht under wegen.

(09451.) dar nâch wart daß her geschart

(09452.) nâch mancher banier ûf die vart

(09453.) und quâmen zû Semegallen in daß lant.

(09454.) Doblên was eine burc genant,

(09455.) die wurden dâ mit in verladen,

(09456.) sie tâten in vil grôßen schaden.

(09457.) waß in dem hachelwerke was

(09458.) vil wênic des icht genas,

(09459.) daß ûf die burc nicht entran,

(09460.) daß mûste den lîp zû pfande lân.

(09461.) eine blîde die wart ûf gehaben

(09462.) und wart gesatzt vor den graben.

(09463.) Dô quâmen ander mêre,

(09464.) daß ein her wêre

(09465.) von Lettowen komen dar.

(09466.) dô man der wârheit wart gewar,

(09467.) Doblên sie ließen stân,

(09468.) die burc wart sturmes erlân.

(09469.) die blîden hiwen sie dar nider

(09470.) und scharten ir her wider

(09471.) kegen den Lettowen zûr wer.

(09472.) dô quam der heiden her

(09473.) ûf ein gegende gerant,

(09474.) Slackenkappen ist sie genant.

(09475.) der brûdere her was wol geschart

(09476.) und hûb sich kein in ûf die vart.

(09477.) dô sie quâmen sô nâhen,

(09478.) daß sie einander sâhen,

(09479.) die heiden wurden des gewar,

(09480.) daß creftic was der cristen schar.

(09481.) dô wart in zû lande gâch.

(09482.) der marschalc sprengete und jagete in nâch.

(09483.) daß her quam an ein bôse grunt,

(09484.) dô was in der selben stunt

(09485.) daß brûch dannoch ungevrorn.

(09486.) dem her was leit und zorn,

(09487.) daß in der viende her entreit.

(09488.) daß was bischof Vriderîchen leit,

(09489.) daß man ir kunde nicht abe jagen.

(09490.) waß sol ich lange rede sagen?

(09491.) sie kârten kein der Rîge wider,

(09492.) dar quâmen sie gesunt sider.

(09493.) dô man die mêre vernam,

(09494.) daß daß her wider quam,

(09495.) dô wart gelobet Jhêsus Crist,

(09496.) der alles lobes wirdic ist,

(09497.) und die liebe mûter sîn,

(09498.) Marîâ die vrowe mîn.

(09499.) der meister und der bischof

(09500.) quâmen ûf der brûder hof.

(09501.) pilgerîn und des kuniges man

(09502.) wart dâ liebes vil getân.

(09503.) der meister und bischof Vriderîch

(09504.) dar nâch mit liebe schîden sich.

(09505.) wanne ie der man was komen dar,

(09506.) der vûr zû hûse, daß ist wâr.

(09507.) In dem wintere diß geschach.

(09508.) des andern jâres dar nâch

(09509.) der meister dô zû râte wart

(09510.) aber umme eine herevart

(09511.) zû Semegallen in daß lant.

(09512.) der meister selbe reit zû hant

(09513.) zû den bischoven und des kuniges man,

(09514.) mit bete er die an sich gewan.

(09515.) sie lobeten im zû helfen gar,

(09516.) sie hieldenß im, daß ist wâr,

(09517.) von Darbet und von Lêal,

(09518.) von Rîge was des dritten zal.

(09519.) ein tac wart in geleit,

(09520.) wen sie solden sîn bereit.

(09521.) boten wurden dô gesant

(09522.) uber al der brûdere lant.

(09523.) lantvolk und des hûses man

(09524.) wart die zît wißßen lân,

(09525.) wen sie zû Rîge solden komen.

(09526.) die samenunge wart dar genomen.

(09527.) dô die zît was volant,

(09528.) als ûch hie vor ist bekant,

(09529.) der houbetman brâchte dar

(09530.) des kuniges man ein êrlîche schar.

(09531.) her Odewart was er genant.

(09532.) manich banier wart bekant:

(09533.) von deme lande uber al

(09534.) quam ir zû Rîge ein michel zal.

(09535.) brûder was ouch komen dar

(09536.) von deme lande ein êrlîche schar.

(09537.) burger von Rîge wâren mite:

(09538.) daß von alder was ir site.

(09539.) waß pilgerîm zû Rîge was komen,

(09540.) die wurden gerne mite genomen.

(09541.) der hêrre von Rûwen quam aldar

(09542.) mit einer hovelîchen schar.

(09543.) Dô daß her was bereit

(09544.) alsô die zît was ûf geleit,

(09545.) von Rîge vûren sie zû hant

(09546.) mit schiffen und ouch uber lant

(09547.) und quâmen zûr Mitowen

(09548.) ûf ein schône owen.

(09549.) ûf eine wise, die was breit,

(09550.) wart daß her wol geleit.

(09551.) dô wurden sie entpfangen wol,

(09552.) als man liebe vrûnde sol.

(09553.) die nacht hatten sie gut gemach.

(09554.) des morgens, dô der tac ûf brach,

(09555.) in deme her man messe sanc.

(09556.) meister Cûnrât von Vûchtewanc

(09557.) was des geres houbetman,

(09558.) der legete sînen vlîß dar an.

(09559.) dô daß her was wol geschart

(09560.) nâch mancher banier ûf die vart,

(09561.) daß her quam vor Terwetein.

(09562.) die heiden wurden des in ein,

(09563.) sie liefen kein in ûf daß velt.

(09564.) dâ wart in daß widergelt:

(09565.) sie wurden wider în getriben.

(09566.) ein Semegal was tôt bliben.

(09567.) dâ wart geslagen manich gezelt

(09568.) vor Terwetein ûf ein schôneß velt.

(09569.) sie herten um sich mit gewalt.

(09570.) eß was die zît alsô gestalt,

(09571.) daß ir korn zîtic was:

(09572.) daß slûc man nider als daß gras.

(09573.) daß korn wart in daß her brâcht.

(09574.) dâ eß quam nâch mitter nacht,

(09575.) die heiden tâten dô ein werc,

(09576.) sie branten selbe ir hachelwerc

(09577.) um die rechte burc gar blôß.

(09578.) daß her was michel und grôß,

(09579.) daß hette sich um daß hûs geleit.

(09580.) des andern tages wart bereit

(09581.) ein ebenhôe und ûf gehaben

(09582.) und wart getriben an den graben.

(09583.) der meister hette vor gesant

(09584.) nâch deme her von Kûrlant.

(09585.) die wâren zû Doblên komen.

(09586.) sie wurden ungerne dâ vernomen,

(09587.) wan sie tâten ungemach

(09588.) den Semegallen wê und ach.

(09589.) ir hachelwerc sie branten nider

(09590.) und kârten von der burge wider.

(09591.) die quâmen zû des meisters here

(09592.) wol bereit mit irre were.

(09593.) dô was des heres an der zal

(09594.) vierzehn tûsent uber al.

(09595.) nû was die ebenhôe komen,

(09596.) als ir hie vor habt vernomen,

(09597.) mit manchem ribalde ûf den graben.

(09598.) dô wart ein harter sturm erhaben.

(09599.) dô was holtzes zû der tracht

(09600.) manich hundert vûder brâcht:

(09601.) man bûste alumme vûer an.

(09602.) die burc an manchen enden bran,

(09603.) daß leschten sie mit heldes hant.

(09604.) Êr der sturm wart volant,

(09605.) die Semegallen bâten dô,

(09606.) daß der meister tête alsô

(09607.) und ließe iren kunic zu im komen

(09608.) durch der cristenheite vromen

(09609.) sie wolden gerne zins geben

(09610.) und halden vridelîcheß leben

(09611.) mit dem cristentûm alsô ê.

(09612.) dem meistere tet die rede wê,

(09613.) wan er sich des wol versan,

(09614.) daß nicht trûwe was dar an.

(09615.) sie hatten dicke vor gelogen

(09616.) und den cristentûm betrogen.

(09617.) nû was ein êrlîch ritter dar.

(09618.) dô sie wurden des gewar

(09619.) (der hêrre von Rûwen was er genant),

(09620.) an den riefen sie zû hant,

(09621.) daß er sô wol tête

(09622.) und den meister bête,

(09623.) daß er in vride wolde geben,

(09624.) sie wolden halden rechteß leben.

(09625.) der probest von Rîge was ouch dar

(09626.) und prediger brûder, daß ist wâr.

(09627.) der von Rûwen die zû sich nam,

(09628.) mit in er zû dem meistere quam,

(09629.) vor die Semegallen er bat.

(09630.) die brûder sprâchen ûf der stat:

(09631.) “uns geschît dâ von ein leit,

(09632.) sie geren zû der cristenheit.”

(09633.) der hêrre von Rûwen sprach alsô:

(09634.) “des sult ir wesen gerne vrô

(09635.) und beweget ûwern mût:

(09636.) daß dunket uns allen gut.”

(09637.) waß iemant dâ wider sprach,

(09638.) der Semegallen wille geschach:

(09639.) in wart vride dô gegeben,

(09640.) daß sie solden zins geben

(09641.) und kegen der cristenheit

(09642.) nimmer getûn kein leit.

(09643.) der vride wart bestêtiget wol,

(09644.) als man mit gelubde sol.

(09645.) nicht lange sûmete man dar nâch,

(09646.) daß her gemeine ûf brach.

(09647.) man hieb die ebenhôe nider

(09648.) und kârten kegen lande wider.

(09649.) dô daß her zû Rîge quam,

(09650.) der meister die geste nam

(09651.) und sagete in lieblîchen danc.

(09652.) meister Cûnrât von Vûchtewanc

(09653.) der was êre und tugende vol,

(09654.) daß sach vil manich ritter wol:

(09655.) lieblîchen er die zû gaste bat.

(09656.) der ertzebischof von der stat

(09657.) der mûste mit den gesten sîn

(09658.) und manch êrlîch pilgerîn.

(09659.) her Odewart und des kuniges man

(09660.) den wart êren vil getân.

(09661.) dô ir mûde was gelegen

(09662.) und in vrûntschaft was gepflegen,

(09663.) we ûß der reise komen was

(09664.) von Semegallen, als ich ê las,

(09665.) die quâmen kurzelîchen sider

(09666.) vrôlîchen zû lande wider.

(09667.) In deme owste diß geschach.

(09668.) des nêhesten herbestes dar nâch

(09669.) dô wart ein her kein Prûßen lant

(09670.) von Lettowen gesant.

(09671.) kunic Thoreide der sante eß dar.

(09672.) Nameise was an der schar.

(09673.) Kirsburc ist ein hûs genant

(09674.) und liget noch in Prûßen lant.

(09675.) man hôrte in dâ und sach,

(09676.) dâ mite er den vride brach,

(09677.) den er machte zû Terwetein.

(09678.) sîn gelubde daß was unrein.

(09679.) er quam nicht mêr in daß lant,

(09680.) daß Semegallen ist genant.

(09681.) der vride wart gebrochen dô

(09682.) mit den Semegallen sô.

(09683.) eß was dô vor nicht alzû lanc,

(09684.) daß meister Cûnrât von Vûchtewanc

(09685.) irwarb daß mit sîner bete,

(09686.) daß man sînen willen tete:

(09687.) daß Prûßen und Nieflant

(09688.) quam in eines meisters hant,

(09689.) der hieß brûder Manegolt.

(09690.) man was im von rechte holt,

(09691.) wen er was ein geistlîch man.

(09692.) im was gerne undertân

(09693.) der meister von Nieflant.

(09694.) nû wil ich machen ûch bekant,

(09695.) wie wol sie trûgen uber ein,

(09696.) als an irre liebe schein:

(09697.) wes ir ein den andern bat

(09698.) daß geschach ûf der stat;

(09699.) des wâren sie beide vrô.

(09700.) sînen boten sante dô

(09701.) der meister von Nieflant.

(09702.) mit brîven tet er bekant,

(09703.) daß meister Manegolt solde komen

(09704.) zû im durch des landes vromen.

(09705.) dô im daß mêre wart geseit,

(09706.) willeclîchen wart er bereit;

(09707.) mit sîner brûdere râte

(09708.) hûb er sich vil drâte,

(09709.) bie daß mer ûf den strant

(09710.) vûr er hin durch Kûrlant.

(09711.) dô man zû Rîge vernam,

(09712.) daß meister Manegolt quam,

(09713.) dô wart er entpfangen wol,

(09714.) als man einen meister sol.

(09715.) war er in die hûser quam,

(09716.) die vrûntschaft er gerne nam.

(09717.) dô er daß lant wol besach

(09718.) und mit den brûderen gesprach,

(09719.) die in deme lande wâren,

(09720.) er kunde sô wol gebâren,

(09721.) daß sie sîn wâren vrô.

(09722.) meister Cûnrât bat in dô,

(09723.) lieblîch er die bete began,

(09724.) er wolde des antes sîn erlân.

(09725.) waß iemant dâ wider sprach,

(09726.) von sîner bete daß geschach,

(09727.) Nieflandes man in erließ,

(09728.) daß er nicht mêr dâ meister hieß.

(09729.) er hatte gerâten, daß ist wâr,

(09730.) in deme lande drittehalb jâr.

(09731.) alsô wart er des amtes lôs.

(09732.) einen brûder man dô kôs

(09733.) zû meister uber Nieflant:

(09734.) brûder Willekîn was er genant.

(09735.) der selbe tugenthafte helt

(09736.) wart zû Velîn erwelt.

(09737.) dô die welunge geschach,

(09738.) meister Manegolt vûr dar nâch

(09739.) mit sînen brûdern sider

(09740.) vrôlîch zû Prûßen wider.

(09741.) Boten wurden dô gesant

(09742.) von Akers hin zû Prûßen lant,

(09743.) die saiten im des ordens nôt:

(09744.) der hôe meister wêre tôt

(09745.) und hießen in zû Akers komen.

(09746.) dô er daß hette vernomen,

(09747.) snel er brîve schrîben hieß,

(09748.) zû Nieflant er die vûren ließ,

(09749.) des landes meistere er enpôt

(09750.) dise vor genante nôt

(09751.) und hieß im brûdere senden dar,

(09752.) die wol vûgeten an die schar,

(09753.) daß sie zû Akers solden komen.

(09754.) drie brûdere wurden dô genomen

(09755.) und wurden willeclîch gesant

(09756.) mit brîven hin zû Prûßen lant.

(09757.) dô der meister hette vernomen,

(09758.) daß die von Nieflant wâren komen,

(09759.) kurtzelîch wart er bereit.

(09760.) alsô der tac was ûf geleit,

(09761.) mit brûderen, die er mit sich nam,

(09762.) vrôlîch er zû Akers quam.

(09763.) von manchem lande wâren dar

(09764.) wîse brûdere, daß ist wâr,

(09765.) zû der welunge komen.

(09766.) dô wart ein vromer helt genomen

(09767.) und wart zû hôemeistere erwelt.

(09768.) der selbe êrlîche helt

(09769.) brûder Burkart was er genant:

(09770.) im wart vrôlîch in die hant

(09771.) ein ingesigel und ein vingerlîn

(09772.) beval man ûf die trûwe sîn.

(09773.) dô die wele was volant,

(09774.) meister Manegolt bat zû hant,

(09775.) daß man Nieflandes in verließ.

(09776.) zû Prûßen man in varen hieß.

(09777.) der dâ vor gekoren was

(09778.) zû Velîn, als ichß hîr vor las,

(09779.) mit brîven der bestêtiget wart.

(09780.) dar nâch hûb sich ûf die vart

(09781.) von Akers manich êrlîch man.

(09782.) sumelîcher nicht zû hûs quam.

(09783.) meister Manegolt lac tôt

(09784.) ûf dem mere, als got gebôt.

(09785.) drie brûdere wâren von Nieflant

(09786.) mit im uber mer gesant,

(09787.) der lâgen zwêne tôt,

(09788.) der dritte quam von der nôt

(09789.) und brâchte die brîve in daß lant,

(09790.) von danne sie wâren ûß gesant.

(09791.) dô man zû Nieflande vernam,

(09792.) daß der boten einer quam,

(09793.) und die brîve man gelas,

(09794.) daß meister Willekîn was

(09795.) bestêtiget in daß lant,

(09796.) des vreute man sich zû hant.

(09797.) er lebete vridelîchen

(09798.) mit armen und mit rîchen

(09799.) in deme lande manchen tac,

(09800.) an gotes dienste er arbeit pflac.

(09801.) Bie sîner zît eß geschach,

(09802.) daß man die Lettowen sach

(09803.) hern des bischoves lant.

(09804.) sie stiften roub und brant.

(09805.) die mêre wurden wol vernomen,

(09806.) sie wâren zû Aschrâten komen,

(09807.) die burc ist bie der Dune gelegen,

(09808.) dar ûffe die brûdere wonens pflegen.

(09809.) der kummentûr snel enpôt

(09810.) zû Kokenhûsen dise nôt.

(09811.) die burc des bischoves ist.

(09812.) dô was in der selben vrist

(09813.) ein brûder ûffe, sîn houbtman:

(09814.) der legete sînen vließ dar an,

(09815.) daß er den vienden tête ein leit.

(09816.) kurzelîch wart er bereit,

(09817.) daß er manchen raschen man

(09818.) von der stat zû sich gewan.

(09819.) daß lantvolk was willic gar.

(09820.) er gewan ein êrlîche schar.

(09821.) die Lettowen hetten wol vernomen,

(09822.) daß man wolde zû in komen

(09823.) und wern daß lant.

(09824.) dô in daß mêre wart bekant,

(09825.) dô wart in zû lande gâch,

(09826.) wan sie vorchten ungemach.

(09827.) iren roub sie nâmen dô

(09828.) und kârten uber die Dune vrô

(09829.) und wolden wider in ir lant.

(09830.) al die wîle hette besant

(09831.) der kummentûr, dô ich von las,

(09832.) der zû Aschrâten was,

(09833.) sîne boten ûf daß lant.

(09834.) sie quâmen willeclîch zû hant

(09835.) weme die mêre wurden kunt

(09836.) zû Aschrâten in kurzer stunt.

(09837.) des wart er von herzen vrô.

(09838.) nicht lange sûmete er dô,

(09839.) die brûdere er sich wâpen hieß.

(09840.) sie tâten gerne waß er hieß.

(09841.) dô sîn her was bereit,

(09842.) dem kummentûre wart geseit,

(09843.) die heiden wêren hine komen.

(09844.) dô er daß hette vernomen,

(09845.) im was ûf die viende zorn.

(09846.) die Dune was dô hart gevrorn,

(09847.) dâ quam er ûf mit sîner schar.

(09848.) von Kokenhûsen quam ouch dar

(09849.) der brûder, dâ ich ê von las,

(09850.) und waß rascher lûte was:

(09851.) im was ûf die heiden gâch,

(09852.) den wec sie îlten dô in nâch.

(09853.) ir wartlûte wâren vor,

(09854.) sie quâmen ûf der heiden spor.

(09855.) die Lettowen wurden ouch gewar,

(09856.) daß nâch in quam der brûder schar.

(09857.) sie wâren irs gemûtes stoltz

(09858.) und legerten sich in ein holtz.

(09859.) sie sprâchen sô: “die brûdere komen.

(09860.) wir hân in doch nicht genomen,

(09861.) sie brengen uns dâ her ir gût.

(09862.) des sul wir wesen hôch gemût,”

(09863.) sprâchen die Lettowen.

(09864.) sie hatten um sich gehowen

(09865.) und um die pfert einen hagen,

(09866.) sus hôre wir daß bûch sagen.

(09867.) die brûdere quâmen mit irre schar.

(09868.) der wurden sie gewar,

(09869.) des wurden sie von herzen vrô.

(09870.) sie trâten von den pferden dô,

(09871.) die heiden liefen kegen in:

(09872.) eß wart vil manches ungewin

(09873.) an beider sît von swertes nôt.

(09874.) die walstat wart von blûte rôt.

(09875.) die brûdere drungen in den hagen,

(09876.) der heiden sechzic wart geslagen,

(09877.) ir houbtman lac einer tôt,

(09878.) die andern wichen von der nôt.

(09879.) sie ließen dâ vil manich pfert,

(09880.) beide schilt, sper und swert.

(09881.) eß dûchte ein gût gewin,

(09882.) wer zû vûße mochte hin

(09883.) kêren kein Lettowen lant.

(09884.) Schoriât bleib vor ein pfant

(09885.) ûf der walstat geslagen:

(09886.) sîne vrûnt mochten in clagen.

(09887.) die brûder mit der cristen schar

(09888.) den roub sie mit in nâmen gar.

(09889.) zwêne brûdere wâren geslagen,

(09890.) die endorfte man nicht clagen.

(09891.) die anderen quâmen wol gesunt

(09892.) zû hûs. dar nâch in kurzer stunt

(09893.) dem meistere man die mêre enpôt.

(09894.) er lobete dar umme sêre got

(09895.) und die liebe mûter sîn

(09896.) die himelische kunigîn,

(09897.) die man von rechte êren sol,

(09898.) wen sie sint beide lobes vol.

(09899.) Meister Willekîn dâchte dô,

(09900.) wie er die Semegallen unvrô

(09901.) machte und brêchte in schaden,

(09902.) daß man wurde von in entladen.

(09903.) er sûchte sîner brûder rât,

(09904.) wie er gewurbe mit der tât.

(09905.) die brûdere rieten im zû hant,

(09906.) er solde bûwen in daß lant,

(09907.) daß quême der cristenheit zû vromen.

(09908.) dô er die mêre hette vernomen,

(09909.) des wart er von herzen vrô.

(09910.) er enhette keine rûwe dô,

(09911.) biß er alleß daß gewan,

(09912.) daß man zû rechte solde hân

(09913.) von cleidern und von spîse.

(09914.) der meister was sô wîse,

(09915.) daß er des gûtes nicht enließ,

(09916.) zûr Mitowen er eß vûren hieß.

(09917.) dô sîn wille dar an geschach,

(09918.) des nêhesten winters dar nâch

(09919.) er warb um eine herevart.

(09920.) kein arbeit wart von im gespart

(09921.) kein bischoven und des kuniges man,

(09922.) von den er manchen helt gewan

(09923.) der brûdere volkes manche schar.

(09924.) dô daß her was komen dar

(09925.) zû Rîge, des wart der meister vrô.

(09926.) ûf einen sêe brâchte er sie dô,

(09927.) der ist der Balât genant.

(09928.) manche banier wart dâ bekant,

(09929.) daß her was lanc und breit.

(09930.) kein der Mitowe man dô reit.

(09931.) manich slite wart dô geladen.

(09932.) ûf der Semegallen schaden

(09933.) quam daß her von Terwetein.

(09934.) der meister wart dô des in ein,

(09935.) er wolde bûwen ûf einen berc.

(09936.) dâ wart getân ein êrlîch werc:

(09937.) mit râte der brûdere diß geschach,

(09938.) daß man eine burc bûwen sach.

(09939.) der Heiligeberc wart sie genant,

(09940.) ir name wart sint wol bekant.

(09941.) daß hûs wart gespîset wol:

(09942.) waß man zûr nôtdurft haben sol,

(09943.) daß was in allen wol bedâcht.

(09944.) zwû blîden wâren dar gebrâcht.

(09945.) dô bereitet was der graben,

(09946.) und eine blîde ûf gehaben,

(09947.) vil wol daß hûs gespîset wart.

(09948.) man hûb sich ûf die widervart

(09949.) und ließ dâ wol drî hundert man.

(09950.) die andern riten al dô van.

(09951.) der meister und die brûdere sîn,

(09952.) die rittere und die pilgerîn,

(09953.) wer von deme hûse kârte wider,

(09954.) die quâmen hin zû Rîge sider.

(09955.) des meisters wille was ergân,

(09956.) zû hûse reit ein ieclîch man

(09957.) und danketen gote von himele dô.

(09958.) in sîme lobe wâren sie vrô,

(09959.) daß die arbeit was volbrâcht,

(09960.) als ir von êrst was gedâcht.

(09961.) Die burc, die ich genennet hân,

(09962.) dâ wurden helde ûffe gelân,

(09963.) armbruste unde pfîle.

(09964.) dô quam nâch einer wîle

(09965.) von Sameiten ein her gerant,

(09966.) die sint ouch Lettowen genant

(09967.) und ist ein bôse heidenschaft:

(09968.) die quâmen dar mit grôßer craft.

(09969.) des nêhesten tages sie quâmen dar,

(09970.) dô die brûdere mit irre schar

(09971.) kârten kein der Rîge wider.

(09972.) daß her legerte sich nider

(09973.) alumme daß hûs ûf ein velt.

(09974.) die heidenschaft hât kein gezelt:

(09975.) von holtze und von strûchen

(09976.) der kunnen sie gebrûchen,

(09977.) eß sie warm oder kalt:

(09978.) ir hutten sint dar nâch gestalt.

(09979.) der machten sie vil manche dar

(09980.) vor daß hûs, die rede ist wâr.

(09981.) vomme Heiligenberge und Terwetein

(09982.) die trûgen nicht wol uber ein,

(09983.) die ûf der burge wâren dô.

(09984.) irs krîges wart vil manich unvrô.

(09985.) dâ zwischen was ein cleiner grunt,

(09986.) des quâmen sie in vil kurzer stunt

(09987.) von den burgen in den tal,

(09988.) zû samen giengen ir beider wal.

(09989.) dô der Lettowen her was komen,

(09990.) als ir hie vor habt vernomen,

(09991.) des wâren die Semegallen vrô.

(09992.) nicht lenger sûmeten sie sich dô:

(09993.) die Semegallen mit den gesten

(09994.) îlten vor die vesten,

(09995.) die ûch die vor ist genant.

(09996.) den brûderen wart daß schiere bekant,

(09997.) sie quâmen snelle vor daß tor:

(09998.) dâ vunden sie ir viende vor,

(09999.) von Lettowen ein gewaldic her.

(10000.) die brûdere satzten sich zû wer.

(10001.) sie hatten bie in manchen helt

(10002.) von knechten kûne und ûß erwelt:

(10003.) die sach man menlîch bie in stân,

(10004.) ir keiner wolde zû rucke gân.

(10005.) dâ sach man vlîgen manich sper

(10006.) der cristen hin, der heiden her.

(10007.) mit armbrusten man dô schôß.

(10008.) die Lettowen sêre des verdrôß,

(10009.) sie begunden dannen gân,

(10010.) die brûdere ließen sie dâ stân.

(10011.) dô bleib in der selben nôt

(10012.) ein brûder vor dem hûse tôt.

(10013.) der heiden kan ich nicht gesagen:

(10014.) sumelîchen sach man dannen tragen,

(10015.) daß er der brûder gar vergaß;

(10016.) eß mêrte der Sameiten haß.

(10017.) man sach sie gân an einen rât,

(10018.) den sie vollenbrâchten mit der tât.

(10019.) ûf die burc stûnt al ir sin:

(10020.) daß wart dar nâch ir ungewin.

(10021.) sie ließen manchen heiden balt

(10022.) nâch holtze varen in den walt;

(10023.) sie brâchten holtz und delen wider

(10024.) und legeten ûf dem velde nider.

(10025.) sie bûweten ribalde grôß.

(10026.) daß velt was lanc und blôß,

(10027.) daß man al ir tûn wol sach.

(10028.) die brûdere richten sich dar nâch,

(10029.) vil cleiner rûwe ir keiner pflac

(10030.) beide nacht und ouch den tac:

(10031.) sie machten bolewerc und graben.

(10032.) ein ebenhôe wart ûf gehaben.

(10033.) der brûdere arbeit die was grôß,

(10034.) des doch ir keinen nicht verdrôß.

(10035.) die knechte wâren willic gar,

(10036.) daß lantvolk alleß, daß ist wâr,

(10037.) kein arbeit wart von in gespart.

(10038.) dô daß hûs bereitet wart,

(10039.) daß volc wart geordent ûf die wer

(10040.) nâch rechte kein der heiden her.

Saturs

Ðîs sadaïas teksta tulkojums latvieðu valodâ (09037.-10042.rinda)

Iepriekðçjâ sadaïa vidusaugðvâcu valodâ (08031.-09037.rinda)

Nâkamâ sadaïa vidusaugðvâcu valodâ (10041.-11031.rinda)

HISTORIA.LV