(04031.) Die Samen wâren bereit

(04032.) zû rechen ir hertzeleit,

(04033.) daß in was geschehen,

(04034.) als ûch nû ist verjehen.

(04035.) dô der meister vernam

(04036.) daß der Samen her zû quam,

(04037.) er und alle die brûdere sîn,

(04038.) daß lantvolk und die pilgerîn

(04039.) satzten menlîch sich zû wer

(04040.) snelle kein der heiden her.

(04041.) als ich daß bûch hôre sagen,

(04042.) die Samen wâren vor den hagen

(04043.) komen mit vil mancher schar.

(04044.) dô ir der meister wart gewar,

(04045.) lenger wart dâ nicht gebiten,

(04046.) durch der Samen her geriten

(04047.) von den brûderen wart zû hant.

(04048.) man sach dâ howen manche hant.

(04049.) dâ hôrte man swerte clingen,

(04050.) daß blût sach man dringen

(04051.) durch vil manche brunje gût.

(04052.) sie gußßen beider wegen blût.

(04053.) vil manich cristen hatte dô heil:

(04054.) ir hieb sich dô ein teil

(04055.) aldâ selbes durch den hagen,

(04056.) ein teil wart ir doch geslagen.

(04057.) der meister hieb sich durch daß her

(04058.) vaste kein dem wilden mer.

(04059.) doch ließ er in der selben nôt

(04060.) ein teil sîner brûdere tôt.

(04061.) waß roubes vor genomen was

(04062.) den Samen, als ich itzunt las,

(04063.) der wart in gentzlîch wider.

(04064.) ir wart ouch vil geslagen nider

(04065.) ê der strît ein ende nam.

(04066.) der meister mit nôten quam

(04067.) durch den hac bie daß mer.

(04068.) vorschrôten was im ouch sîn her

(04069.) in der reise zû Samelant,

(04070.) als ûch nû ist bekant.

(04071.) die veigen lâgen dô dâ nider.

(04072.) meister Anne kârte wider

(04073.) mit sîme here zû Kûrlant

(04074.) alleß bie des meres strant.

(04075.) dô er quam zûr Mimele,

(04076.) man lobete got von himele,

(04077.) daß er ûß dem strîte quam.

(04078.) sîn her er aber zû im nam

(04079.) und quam zû Rîge mit der schar.

(04080.) sus saget uns diß bûch verwâr.

(04081.) die cristen, die zû Samelant

(04082.) wurden geslagen mit werender hant,

(04083.) die bevele ich alle gote:

(04084.) sie sturben wol nâch sîme gebote.

(04085.) Zû Sameiten was ein man

(04086.) bie der zît, hieß Aleman;

(04087.) der was ein vil vromer helt

(04088.) von Sameiten ûß erwelt.

(04089.) der trûc in sînem hertzen

(04090.) bitterlîchen smertzen

(04091.) und dar zû grôßen haß.

(04092.) ich wil ûch sagen durch waß:

(04093.) daß der kunic Myndowe

(04094.) und manich Lettowe

(04095.) cristen wâren worden

(04096.) und her heiden orden

(04097.) hatten zû rucke geleit,

(04098.) und wâren bereit

(04099.) zû dienste gentzlîche

(04100.) gote von himelrîche.

(04101.) Aleman dâ dâchte,

(04102.) daß er sint vollenbrâchte,

(04103.) wie er mit grôßen vreisen

(04104.) wolde rische reisen

(04105.) ûf die vromen Kûren

(04106.) die sîne nâkebûren.

(04107.) Aleman gar unverzaget

(04108.) sprach: “ob eß behaget

(04109.) ûch Sameiten, sô wil ich varn,

(04110.) mînen lîp nimmer gesparn,

(04111.) ûf die Kûren, die dâ sint

(04112.) cristen, und dar zû ir kint.”

(04113.) der rât der was wol gehôrt

(04114.) von den Sameiten. er sprach vort:

(04115.) “wanne die Kûren sint verhert

(04116.) und von uns gar verzert,

(04117.) sô mûß Myndowe uns volgen,

(04118.) wie gar er sie verbolgen.”

(04119.) Zû hant die Sameiten

(04120.) begunden sich bereiten

(04121.) hin zû Kûrlande wart.

(04122.) die besten wurden ungespart

(04123.) die zû Sameiten wâren;

(04124.) der reise sie nicht verbâren.

(04125.) die Sameiten vûren hin,

(04126.) zû Kûrlande stûnt ir sin,

(04127.) mit eime here mâßen grôß,

(04128.) daß doch der verte wol genôß.

(04129.) dô sie mit here quâmen

(04130.) zû Kûrlant, sie nâmen

(04131.) vol ir hende, daß ist wâr.

(04132.) daß was den Kûren vil swâr,

(04133.) daß sie daß nicht enmochten

(04134.) erweren unbevochten.

(04135.) dô riten die Sameiten dan,

(04136.) sie vûrten wîb und man

(04137.) und dar zû roubes mêre.

(04138.) diß mûwete die brûdere sêre

(04139.) und die vil stoltzen Kûren,

(04140.) die vil wol kunden tûren

(04141.) in strîten und in reisen.

(04142.) sie sprâchen: “die weisen,

(04143.) die hie nû sint gemachet,

(04144.) alleine uns helfe swachet,

(04145.) die wolle wir rechen offenbâr

(04146.) ê uns entstêt daß ander jâr.”

(04147.) dô der Sameiten her dô quam

(04148.) zû lande wider, dô vernam

(04149.) meister Anne die mêre,

(04150.) daß verheret wêre

(04151.) Kûrlant von den Sameiten.

(04152.) er gedâchte bereiten

(04153.) ein her nâch sînem willen,

(04154.) daß er dâ mite gestillen

(04155.) mochte gar ir hôchvart.

(04156.) er gebôt eine herevart

(04157.) ûß allen sînen landen

(04158.) den Sameiten zû schanden.

(04159.) Die herevart wart vollen grôß,

(04160.) des der cristentûm genôß.

(04161.) zû Rîge die samenunge was.

(04162.) meister Anne zû im las

(04163.) alle die rischen pilgerîn

(04164.) von Rîge. er sprach: “nû tût schîn,

(04165.) daß ir daß crûce hât genomen

(04166.) durch der cristenheite vromen

(04167.) und bewîset ûch alsô,

(04168.) daß ir zû jungest werdet vrô.”

(04169.) Eisten, Lîven und Litten

(04170.) die endurfte man nicht bitten,

(04171.) die wâren alle bereit

(04172.) zû der reise sunder leit.

(04173.) daß her daß zogete wol geschart

(04174.) hin zû Semegallen wart.

(04175.) dô daß her quam in daß lant,

(04176.) der meister tet in bekant,

(04177.) daß sie solden mite varn,

(04178.) er wolde ir keinen sparn.

(04179.) eß wêre in lîb oder leit,

(04180.) sie mûsten im sîn bereit.

(04181.) die Kûren, als ich hôrte jehen,

(04182.) sie ließen sich mit trûwen sehen:

(04183.) an der selben herevart

(04184.) quâmen sie menlîch und hart.

(04185.) sus vûr daß her vrôlîchen hin

(04186.) kein Sameiten durch gewin.

(04187.) dô daß volk zû beider sît

(04188.) zû samne quam, eß dûchte zît

(04189.) den meister und die vogete sîn

(04190.) und dar zû die pilgerîn,

(04191.) daß mit zeichen undersniten

(04192.) wurde daß volk nâch strîtes siten.

(04193.) daß geschach al zû hant.

(04194.) nû wâren sie komen vor daß lant.

(04195.) die vogete scharten baß ir her

(04196.) und sterkten sie vil wol zûr wer.

(04197.) die baniere wurden dô

(04198.) bevolen den, die vollen vrô

(04199.) zû deme strîte wâren

(04200.) und ouch gebâren

(04201.) konden mit sô getânem spil.

(04202.) dar was volkes rechte vil.

(04203.) dâ sach man mancher hande snite,

(04204.) durch daß sich niemant underrite.

(04205.) der baniere was dâ gnûc,

(04206.) doch was daß lantvolk sô clûc,

(04207.) daß eß von sîner banier nicht

(04208.) kêren wolde; in stêter pflicht

(04209.) sie nâmen ouch irre hêrren war.

(04210.) dâ sach man in vil stoltzer schar

(04211.) daß her sich stellen zû der zît,

(04212.) als eß solde in einen strît.

(04213.) leitsagen wurden dô gegeben

(04214.) den houbtlûten. daß quam eben

(04215.) in allen in der herevart.

(04216.) die wâren in rechter art

(04217.) Lettowen und helde gût;

(04218.) des wart daß her wol behût.

(04219.) der eine der hieß Tûsche;

(04220.) der gienc dâ wol zû brûsche.

(04221.) der ander der hieß Milgerîn.

(04222.) er was kûne sam ein swîn.

(04223.) Gingeike der dritte hieß,

(04224.) der an vromekeite ließ

(04225.) sich alle wege vinden.

(04226.) sîne viende mûsten swinden

(04227.) vor im zû allen zîten

(04228.) in sturmen und in strîten.

(04229.) Daß her sprengete zû hant

(04230.) in der Sameiten lant

(04231.) unde tet vil grôßen schaden.

(04232.) dâ wurden gar uberladen

(04233.) die Sameiten zû der zît.

(04234.) daß ließen die Kûren âne nît.

(04235.) barvûßen und predigêre

(04236.) wâren in deme selben here.

(04237.) dâ sach man den êrsten brant,

(04238.) den brante eines predigêres hant

(04239.) und eines barvûßen dar nâch.

(04240.) zû burnen was in allen gâch,

(04241.) die in der reise wâren komen,

(04242.) als ich vur wâr hân vernomen.

(04243.) daß her daß was wol bewart,

(04244.) an allen enden wol geschart

(04245.) und zû strîte wol bereit.

(04246.) al die wîle ein rotte reit

(04247.) hin und her durch bejac,

(04248.) die andere rotte des selben pflac,

(04249.) die dritte rotte nicht vergaß,

(04250.) sie herten baß und baß.

(04251.) dô eß an den âbent gienc

(04252.) zû hant die legirstat bevienc

(04253.) daß grôße her der cristenheit.

(04254.) die wîle manich degen reit

(04255.) nâch bejage in die nacht.

(04256.) dô wart roubes vil gebrâcht,

(04257.) man, wîb und kinder

(04258.) und aller hande rinder.

(04259.) waß man trîben und tragen

(04260.) nicht enmochte, daß wart geslagen.

(04261.) Des heres warte die was gût

(04262.) und dar zû wol behût.

(04263.) doch wurden in der warte

(04264.) die wartlûte harte

(04265.) von den heiden an gerant.

(04266.) daß gulden sie mit mannes hant.

(04267.) die der warte pflâgen

(04268.) enließen sich nicht trâgen,

(04269.) sie enmachten vollenclîchen dâ

(04270.) den heiden ire kopfe blâ.

(04271.) des morgens dô der tag ûf brach

(04272.) die wartlûte man komen sach.

(04273.) dô zogete daß her vort

(04274.) und herte beide her und dort.

(04275.) daß triben sie in dem lande

(04276.) mit roube und mit brande

(04277.) nûn tage: alumme

(04278.) die richte und die krumme

(04279.) wart dâ vil wol gehert,

(04280.) wênic wart eß in gewert.

(04281.) daß her hatte vol die hant

(04282.) und verterbete gar daß lant.

(04283.) dô sprach meister Anne:

(04284.) “nû prûvet alle, wanne

(04285.) daß herhorn geblâsen wirt,

(04286.) sô bezale wir den wirt

(04287.) und rîten hin zû lande.

(04288.) wir haben vol die hande.

(04289.) waß wir haben hie gehert

(04290.) des ist mâßen vil gewert.”

(04291.) daß horn zû hant geblâsen wart.

(04292.) dô bereite sich ûf die vart

(04293.) daß her alglîche

(04294.) und was vreuden rîche,

(04295.) daß eß im wol was ergân.

(04296.) dâ mite kârten sie sân

(04297.) mit allem irme roube zû lande.

(04298.) dô kârten sunder schande

(04299.) die Kûren wider in ir lant.

(04300.) sie hatten roubes vol die hant.

(04301.) dô daß grôße her dô quam

(04302.) zû Semegallen, dô nam

(04303.) der meister die Semegallen

(04304.) und dankte in allen.

(04305.) dar mite reit der meister dan,

(04306.) ime volgete manich man,

(04307.) und quam zû Rîge wider.

(04308.) alle ir trûren lac dar nider.

(04309.) In disen zîten was gewesen

(04310.) zû Rôme, als ich ûch wil lesen,

(04311.) der hôhe meister Poppe gût

(04312.) an den pâbest, wen sîn mût

(04313.) stûnt von der meisterschefte gar

(04314.) (des man sint wart wol gewar)

(04315.) und hatte daß behalden

(04316.) mit bete manichvalden,

(04317.) daß er mit râte mûste nemen

(04318.) einen brûder, des sich nicht schemen

(04319.) sîn orden mochte an keiner stat.

(04320.) sînen capellân er bat

(04321.) schrîben brîve zû hant

(04322.) den kummentûren in die lant,

(04323.) die man ouch meistere heißet.

(04324.) sîn mût der was gereißet

(04325.) und sîn hertze enbinnen

(04326.) mit grôßer gotes minnen.

(04327.) die brîve wurden gesant

(04328.) den lantkummentûren zû hant.

(04329.) Dô die brîve wâren gelesen,

(04330.) sie wolden alle gehôrsam wesen

(04331.) und quâmen in kurtzen stunden

(04332.) dâ sie den meister vunden

(04334.) er entpfienc sie lieplîchen sâ.

(04335.) von Nieflande was ouch komen

(04336.) ein geistlîch man vil wol vernomen,

(04337.) brûder Anne was er genant.

(04338.) er was meister zû Nieflant.

(04339.) dô sie zû samne quâmen

(04340.) unde wol vernâmen

(04341.) ires hôen meisters mût,

(04342.) eß endûchte sie nicht gût

(04343.) und sprâchen vil dar wider.

(04344.) er bewîsete in doch sider,

(04345.) daß er urloub hatte irkrigen.

(04346.) zû hant die brûdere alle swigen

(04347.) und mûsten volgen mite.

(04348.) dô koren sie nâch des ordens site

(04349.) von Nieflant brûder Annen

(04350.) zu meistere vor vil mannen,

(04351.) die dâ stûnden zû der kur.

(04352.) dô trat brûder Poppe vur

(04353.) und ließ ûf die meisterschaft.

(04354.) die entpfienc gar tugenthaft

(04355.) meister Anne von Nieflant.

(04356.) dô gab man im an die hant

(04357.) daß zeichen, daß der meister treit:

(04358.) daß was ein vingerlîn vil feit.

(04359.) zû hant was brûder Poppe lôs

(04360.) der meisterschefte, dô man kôs

(04361.) meister Annen an sîne stat.

(04362.) zû hant getrûwelîchen bat

(04363.) meister Anne und sprach:

(04364.) “ir brûdere, wolt ir mir gemach

(04365.) tûn, als ich getrûwen,

(04366.) und lôsen mich von rûwen,

(04367.) sô prûvet, daß ir zû hant

(04368.) sendet hin zû Nieflant

(04369.) einen brûder, der meister sie.”

(04370.) die brûdere die im wâren bie,

(04371.) die wurden des zû râte,

(04372.) daß man setzte drâte

(04373.) den kummentûr von Kunigesberg.

(04374.) von dem kunden kein geberg

(04375.) die heiden in dem lande,

(04376.) er weste aller hande

(04377.) der heiden site und tât.

(04378.) dem hôen meistere wol der rât

(04379.) behagete und sprach zû in:

(04380.) “ûf den selben stûnt mîn sin.”

(04381.) zû hant der meister schrîben hieß

(04382.) brîve gût unde ließ

(04383.) vûren die kein Prûßen wart.

(04384.) daß ingesigel ûf die vart

(04385.) wart ouch gesant mit râte.

(04386.) die brîve quâmen drâte

(04387.) zû Prûßen hin, dâ man vant

(04388.) brûder Burkarden, der genant

(04389.) was von Hornhûsen.

(04390.) er kunde gêen zû prûsen

(04391.) wol, mit den heidenscheften

(04392.) torste er sich beheften.

(04393.) dô brûder Burkarden wurden kunt

(04394.) die mêre, er sprach zû der stunt:

(04395.) “waß an den brîven ist gelesen

(04396.) dar zû wil ich gehôrsam wesen.

(04397.) waß mîner meisterschaft behaget

(04398.) daß wil ich tûn gar unverzaget.”

(04399.) zû hant nam er von Nieflant

(04400.) daß ingesigel zû sîner hant.

(04401.) daß hatte meister Anne

(04402.) vil wol glîch einem manne

(04403.) mêr dan drî jâr getragen,

(04404.) als ich vor wâr hôrte sagen.

(04405.) Der gûte meister Burkart

(04406.) vûr kein Nieflande wart.

(04407.) von Hornhûsen was er genant,

(04408.) tugent und êre was im bekant.

(04409.) dô er mit grôßer arbeit

(04410.) alsô lange gereit,

(04411.) daß er quam ûf des meres strant,

(04412.) er kârte zû hant

(04413.) kein der Dune rechte.

(04414.) brûdere unde knechte

(04415.) wâren von Rîge kein im komen;

(04416.) ouch wâren, als ich hân vernomen,

(04417.) burgêre und pilgerîn

(04418.) dar mite. dâ wart offen schîn,

(04419.) daß sie des meisteres wâren vrô.

(04420.) sie entpfiengen in alsô,

(04421.) als eß sînen êren gezam vil wol.

(04422.) sie sprâchen: “meister, man sol

(04423.) ûch schenken ûf diser heide:

(04424.) wîn unde mete beide

(04425.) habe wir nû kein ûch brâch.”

(04426.) der meister antwurte in bedâcht

(04427.) und sprach: “got mûße ûch geben

(04428.) lôn und daß êwige leben,

(04429.) daß ir mich wol entpfangen hât,

(04430.) zû verdienen eß mir stât.”

(04431.) sie trunken und wâren vrô.

(04432.) dar nâch kârten sie dô

(04433.) zû Rîge in die gûte stat.

(04434.) daß volk algemeine bat,

(04435.) daß got in mûste sterken

(04436.) an allen gûten werken.

(04437.) Von Hornhûsen meister Burkart

(04438.) wol nâch tugentlîcher art

(04439.) sîne vrûnde êrte,

(04440.) daß in sîn tugent lêrte.

(04441.) er was den vrûnden vridelîch,

(04442.) den vienden ein kempfe rîch,

(04443.) sînen nâkebûren glîche.

(04444.) arme unde rîche

(04445.) gunden im heiles vil.

(04446.) sîn lob stûnt âne zil:

(04447.) zû Prûßen und zû Nieflant

(04448.) was sîn lob vil wol bekant.

(04449.) er sante zû Littowen

(04450.) dem kunige Myndowen

(04451.) sîne gift, die was gût.

(04452.) des vreute sich des kuniges mût.

(04453.) Myndowe des meisteres nicht vergaß,

(04454.) er envergulde im daß

(04455.) mit einer gûten gifte;

(04456.) ouch grûste er in mit schrifte.

(04457.) die vrûntschaft von in beiden

(04458.) was grôß. daß was den heiden

(04459.) nicht vil wol zû mâßen,

(04460.) doch wolden sie iß nicht lâßen.

(04461.) Eines nachtes spâte

(04462.) wart der meister zû râte,

(04463.) daß er zû Kûrlande

(04464.) wolde bie des meres strande

(04465.) und wolde beschowen

(04466.) die burc, die den Lettowen,

(04467.) die Sameiten sin genant,

(04468.) tet vil wê. er hieß zû hant

(04469.) des morgens zû bereiten,

(04470.) er sprach: “uns sol beleiten

(04471.) hin zû der Mimele

(04472.) der grôße got von himele.”

(04473.) alsus vûr er ûf die vart

(04474.) vaste kein der Mimele wart.

(04475.) er reit als ein degen gût

(04476.) bie des wilden meres vlût

(04477.) alsô lange, daß er quam

(04478.) zû der Mimele. dô vernam

(04479.) der meister, daß die heiden stoltz

(04480.) gelegert hatten in ein holtz,

(04481.) der burge harte vaste bie.

(04482.) er sprach: “wie eß dar umme sie,

(04483.) sie wollen morne vrûe hern:

(04484.) mit gots helfe wolle wirß wern.”

(04485.) dâ wâren brûdere uber al,

(04486.) vierzic was ir aller zal.

(04487.) er hatte ouch wol vumf hundert

(04488.) Kûren ûß gesundert.

(04489.) Dô der morgen ane brach,

(04490.) der Sameiten her man sach

(04491.) stoltz ûf deme velde wesen.

(04492.) der meister sprach: “wir sîn genesen

(04493.) dicke alsô grôßer nôt.”

(04494.) mit sînen lûten er sich bôt

(04495.) wol mit trûwen ûf daß velt.

(04496.) dô gab man gelt umme widergelt.

(04497.) die heiden mit den cristen

(04498.) striten wol mit listen.

(04499.) der heiden der was alsô vil,

(04500.) daß sie hatten keine zil.

(04501.) vumf hundert was der cristen her,

(04502.) sie bedurften wol der wer.

(04503.) der heiden wart dô vil geslagen:

(04504.) wem daß sie leit, der mac iß clagen.

(04505.) der meister der wart sêre wunt

(04506.) von den heiden zû der stunt.

(04507.) dar lâgen zwelf brûdere tôt,

(04508.) die Kûren liden grôße nôt.

(04509.) ir kummentûre zwâren,

(04510.) brûder Bernhart von Hâren,

(04511.) gewundet wart vil sêre

(04512.) und ouch brûdere mêre.

(04513.) zû hant mûste der brûdere her

(04514.) mit vil menlîcher wer

(04515.) howen wider zûr Mimele.

(04516.) nû bevele ich gote von himele

(04517.) die brûdere, die dâ sint geslagen,

(04518.) ich enwil sie nimmer geclagen:

(04519.) sie haben diß vil cranke leben

(04520.) um daß himelrîche gegeben.

(04521.) die vreude die mûß êwic stân,

(04522.) nimmer mêr mac sie vergân,

(04523.) ir vreude mûß dâ wesen grôß,

(04524.) sie sint der merterêre genôß;

(04525.) daß ist sunder zwîvel sô:

(04526.) mit gote suln sie wesen vrô.

(04527.) Dô der meister genas

(04528.) der wunden, als ich itzunt las,

(04529.) dô reit er hin zû Rîge wart.

(04530.) er wolde eine herevart

(04531.) ûf die Sameiten

(04532.) mit sîner macht bereiten,

(04533.) unde wolde in widergelt

(04534.) geben, daß sie ûf daß velt

(04535.) hatten im zûr Mimele brâcht.

(04536.) des hatte er endelîch gedâcht.

(04537.) der meister ließ sân

(04538.) sîne brûdere daß verstân.

(04539.) sie sprâchen alle glîche:

(04540.) “tût sô genêdeclîche

(04541.) und enpietet in die lant:

(04542.) hulfe wirt ûch gesant.”

(04543.) des gûten trôstes wart er vrô.

(04544.) eß stûnt dar nâch unlange dô,

(04545.) boten wurden ûß gesant

(04546.) zû Rîge von Sameiten lant.

(04547.) die wurben an den meister sô:

(04548.) die von Sameiten wêren vrô,

(04549.) daß man in gêbe einen vride

(04550.) und ouch von in niemant lide

(04551.) von keinen dingen ungemach.

(04552.) der meister zû den boten sprach:

(04553.) “enthaldet ûch eine wîle,

(04554.) ich wil in sneller île

(04555.) die brûdere besenden

(04556.) und mit irme râte enden

(04557.) ûwer gewerb, daß ir hie tût.”

(04558.) der rât die boten dûchte gût.

(04559.) man ließ der geste pflegen wol,

(04560.) als man zû rechte boten sol.

(04561.) der meister boten rîten ließ,

(04562.) die kummentûre er komen hieß.

(04563.) wen der meister lût aldar

(04564.) die quâmen willeclîchen gar

(04565.) hin zû Rîge in kurtzen tagen.

(04566.) waß sal ich lange rede sagen?

(04567.) ouch quam der ertzebischof

(04568.) zû Rîge ûf der brûdere hof

(04569.) durch des cristentûmes heil,

(04570.) und burgêre ein michel teil

(04571.) wurden in den rât genomen.

(04572.) dô sie zû samne wâren komen,

(04573.) sie bâten unsen hêrren got,

(04574.) daß er durch sînen grôßen tôt

(04575.) die Sameiten bekêrte

(04576.) und sie den wec lêrte,

(04577.) den Myndowe hatte bestân,

(04578.) der was dar vor ein cristen man

(04579.) bie kurtzen tagen worden;

(04580.) er hatte der heiden orden

(04581.) nâch gotes lobe ein teil verzigen.

(04582.) nû lâße wir die rede ligen.

(04583.) des selben hatten sie gedâcht,

(04584.) daß die Sameiten wurden brâcht

(04585.) mit râte zû der cristenheit.

(04586.) eß was in dennoch umbereit.

(04587.) doch wart zû den stunden

(04588.) durch beßßerunge vunden,

(04589.) man solde in einen vride geben

(04590.) unde gûtlîcheß leben

(04591.) mit in halden zwei jâr:

(04592.) sô wurde man an in gewar,

(04593.) wie zû den cristen wêre ir mût.

(04594.) der rât sie alle dûchte gût.

(04595.) dô sie hatten daß volant,

(04596.) nâch den boten wart gesant.

(04597.) die sache ließ man sie verstân,

(04598.) wie man den vride wolde hân.

(04599.) des wurden sie von hertzen vrô.

(04600.) sie machten einen vride dô,

(04601.) der solde stên zwei jâr

(04602.) mit den Sameiten, daß ist wâr.

(04603.) der vride wart bestêtiget wol,

(04604.) als man von rechte vride sol.

(04605.) die dâ mit dem bischove wâren komen,

(04606.) als ir hie vor hât vernomen,

(04607.) die kârten mit im von dan.

(04608.) dâ was vil manich man,

(04609.) der des vrides was vil vrô.

(04610.) in ir stat sie giengen dô.

(04611.) den heiden den stûnt ouch ir mût,

(04612.) als noch vremden lûten tût,

(04613.) wider hin zû lanude;

(04614.) sie tâten ire hande

(04615.) dem meistere und wâren vrô.

(04616.) des landes site stêt alsô:

(04617.) wer dem anderen tût die hant,

(04618.) wêr er uber daß dritte lant,

(04619.) der hette getrûwelîchen vride

(04620.) bie dem halse und der wide.

(04621.) dô diß alleß was ergân,

(04622.) sie schieden von der Rîge sân

(04623.) und kârten kein Sameiten wider.

(04624.) dô sie zû lande quâmen sider,

(04625.) dô saiten sie iren kunigen sô,

(04626.) daß sie der meister hette vrô

(04627.) gemachet wol mit stêtekeit;

(04628.) daß was den kunigen nicht leit.

(04629.) Die zwei jâr, als ich ûch wil sagen,

(04630.) endorfte niekein mensche clagen,

(04631.) daß im von den heiden icht

(04632.) geschêe an keiner geschicht

(04633.) dan alleß lieb und alleß gût.

(04634.) der vride der stûnt wol behût.

(04635.) man gienc die zwei jâr und reit

(04636.) zû Sameiten âne leit.

(04637.) ouch dorfte man die Sameiten

(04638.) niergen geleiten

(04639.) in der gotes rittere lant,

(04640.) wan eß was alsô gewant,

(04641.) daß sie âne sorgen

(04642.) den âbent und den morgen

(04643.) mochten wandern offenbâr

(04644.) in koufunge die zwei jâr.

(04645.) dô die zît dô was vergân,

(04646.) die Sameiten hûben sân

(04647.) daß urlouge an wider als ê,

(04648.) sie tâten manchem vil wê

(04649.) sint, als ich ûch sagen sol.

(04650.) hôchvarte wâren sie vil vol,

(04651.) sie hatten rischer manne vil.

(04652.) alsus sie griffen zû deme spil:

(04653.) die kunige von Sameiten

(04654.) die ließen in bereiten

(04655.) ein getrenke, daß was grôß.

(04656.) dar zû quam mancher ir genôß.

(04657.) sie trunken und wâren vrô.

(04658.) ir eldeste sprach alsô

(04659.) zû den kunigen uber al:

(04660.) “ich vreuwe mich zû diser zal,

(04661.) jô sehe ich rischer helde vil,

(04662.) durch die ich sunderlîchen wil

(04663.) vreuwen mich, die wîle ich leben.

(04664.) ir Sameiten ir sullet streben

(04665.) umme êre unde bejac

(04666.) ûf die cristen nacht und tac.

(04667.) ir hât lange genûc gelegen,

(04668.) urlouges sullet ir mêr pflegen

(04669.) und sullet mit mannes hant

(04670.) den cristen wûsten ire lant.”

(04671.) der rede die kunige wurden vrô

(04672.) unde sie gelobeten dô

(04673.) in deme getrenke, sie wolden varn,

(04674.) ir gote sulden sie bewarn.

(04675.) Dô die wirtschaft was ergân,

(04676.) sie bereiten sich sân

(04677.) ûß mit drîn tûsent mannen.

(04678.) sus kârten sie von dannen

(04679.) zû den Kûren in ir lant.

(04680.) ir blûtekirl der warf zû hant

(04681.) sîn lôß nâch ir alden site:

(04682.) zû hant er blûtete alleß mite

(04683.) ein quek, als er wol wiste.

(04684.) er sprach in sneller vriste:

(04685.) “ir Sameiten siet gemeit,

(04686.) ir sehet lieb unde leit

(04687.) ûf diser selben herevart.

(04688.) doch sult ir wesen sô bewart,

(04689.) daß ir behaldet die obern hant.

(04690.) ir mûßet nû zû Kûrlant

(04691.) strîten mit den cristen;

(04692.) dar umme solt ir nicht vristen,

(04693.) ir sult geloben daß dritte teil

(04694.) den goten, sô geschiet ûch heil.

(04695.) werden ûch die gote gût,

(04696.) sô werdet ir vil wol behût.

(04697.) die gote die sint wol wert,

(04698.) daß man brunjen und pfert

(04699.) und ouch rische man dâ mite

(04700.) burne nâch unser site.”

(04701.) die Sameiten sprâchen dô:

(04702.) “des râtes sie wir alle vrô.

(04703.) ist daß wir zû diser zît

(04704.) mit den cristen den strît

(04705.) behalden und die walstat

(04706.) und die brûdere machen mat,

(04707.) sô wolle wir vil werde

(04708.) brunjen und pferde

(04709.) unsern goten brinnen.

(04710.) nû rîte wir von hinnen

(04711.) und versûchen unser heil.

(04712.) die Kûren, die dâ sint sô geil,

(04713.) die wolle wir unverborgen

(04714.) brengen zû den sorgen.

(04715.) ir wîb und ir kinder,

(04716.) ir pferde und ir rinder,

(04717.) ir megete und ir knechte

(04718.) die komen uns gar rechte.

(04719.) wir wollen teilen iren gewin,

(04720.) den sie haben under in

(04721.) dise jâr behalden,

(04722.) den jungen und den alden,

(04723.) die in diser reise varn.

(04724.) der brûdere sal man nicht sparn

(04725.) und der dûtschen allen,

(04726.) wâ wir sie bevallen.

(04727.) nû rîte wir, wan eß ist zît.”

(04728.) zû hant daß her zû beider sît

(04729.) brach ûf unde zogete vort.

(04730.) die wîle hatten gehôrt

(04731.) die brûdere zû Kûrlant

(04732.) (gotes rittere sint sie genant),

(04733.) daß die Sameiten wolden komen

(04734.) wênic durch ir aller vromen.

(04735.) sie santen boten drâte

(04736.) mit einem snellen râte

(04737.) zûr Mimele und tâten kunt

(04738.) brûdern und dûtschen zû der stunt,

(04739.) daß sie rische quêmen

(04740.) und Kûren zû in nêmen.

(04741.) Dô der bote zûr Mimele quam,

(04742.) die botschaft, als eß wol gezam,

(04743.) saite er den brûderen offenbar.

(04744.) des was vrô der jungen schar,

(04745.) die dâ zûr Mimele wâren.

(04746.) die dûtschen nicht verbâren,

(04747.) sie enwolden reisen mite.

(04748.) die Kûren ouch nâch ir site

(04749.) wâren der reise vrô.

(04750.) sie bereiten sich dô

(04751.) ûf die vart mit vlîßen.

(04752.) man sach dâ helme glîßen,

(04753.) ir brunjen wâren silbervar.

(04754.) sie hatten eine stoltze schar.

(04755.) dar mite riten sie ûf die vart.

(04756.) der wec wart von in nicht gespart.

(04757.) sie hatten gûten willen,

(04758.) daß sie wolden stillen

(04759.) die heiden, die dâ quâmen.

(04760.) under des vernâmen

(04761.) die brûdere von Goldingen dô

(04762.) mêre, der sie wurden vrô:

(04763.) daß von der Mimele quême

(04764.) in helfe unde nême

(04765.) den wec kein Goldingen.

(04766.) “nû mac uns gelingen!”

(04767.) sprâchen die brûdere junge,

(04768.) “unse hertze und unse zunge

(04769.) sal gote gerne sagen danc.

(04770.) unser sorge wirdet kranc.

(04771.) wir wollen setzen uns zû wer

(04772.) wider der Sameiten her.”

(04773.) die von der Mimele quâmen dô

(04774.) zû Goldingen rechte vrô.

(04775.) brûder Bernhart von Hâren

(04776.) als ein degen zwâren

(04777.) rische hûb sich ûf die vart

(04778.) mit sînen brûderen ungespart

(04779.) von Goldingen und der Mimele.

(04780.) sie bâten got von himele,

(04781.) daß er geleite in wolde geben

(04782.) und daß êwiclîche leben.

(04783.) die Kûren vûren vaste mite.

(04784.) wer nicht enhatte daß er rite

(04785.) der lief zû vûße alleß nâch.

(04786.) nâch den Sameiten was in gâch.

(04787.) Dô die Sameiten hatten gehert

(04788.) der Kûren lant und ouch verzert

(04789.) alleß daß sie vunden,

(04790.) dâ quâmen sie zû den stunden

(04791.) in eine gegenôte gût.

(04792.) vil stoltz was ir aller mût,

(04793.) daß sie roubes hatten genûc.

(04794.) brûder Bernhart der was clûc

(04795.) und zogete den heiden alleß nâch

(04796.) mit sînem here; im was gâch

(04797.) ûf die heiden an der zît.

(04798.) er sprach: “brûdere, hie lît

(04799.) der heiden her nâhen bie.

(04800.) wer nû mit uns komen sie

(04801.) der denke an got, wan eß ist zît:

(04802.) hie hebit sich ein starker strît.

(04803.) wir wollen hie unser leben

(04804.) vor die gevangen geben,

(04805.) die diser Sameiten hant

(04806.) denket vûren in ir lant.

(04807.) ir brûdere und in dûtschen al,

(04808.) ûwer ieclîcher sal

(04809.) got von himele rûfen an

(04810.) unde strîten als ein man.”

(04811.) daß selbe sprach er al zû hant

(04812.) den Kûren zû: “nû sît gemant

(04813.) und strîtet als degene!

(04814.) ir wißßet die gelegene

(04815.) allenthalben rechte wol.

(04816.) ein wênic mêr ich biten sol,

(04817.) daß ir mit trûwen strîten

(04818.) nû zû disen zîten

(04819.) wider die heiden, die gerant

(04820.) sint mit macht in ûwer lant

(04821.) und ûch gar beroubet hân.

(04822.) ist daß ir sie rîten lân

(04823.) hinnen nû henoßßen,

(04824.) sie ensint nicht sô verdroßßen,

(04825.) sie enkomen aber wider

(04826.) unde legen dar nider

(04827.) ûwer lant und ûwer gût.

(04828.) nû weret ûch helde wol gemût!

(04829.) wir wollen sunder widerwort

(04830.) strîten ûf des veldes ort,

(04831.) daß dâ Schoten ist genant.

(04832.) bindet die helme ûf zû hant

(04833.) und bereitet ûch zû der wer:

(04834.) vor uns liget hie daß her.”

(04835.) Die brûdere und die dûtschen al

(04836.) und die Kûren an ir zal

(04837.) bereiten sich zû strîte mite

(04838.) vaste nâch des landes site.

(04839.) dô sie bereitet wâren,

(04840.) brûder Bernhart von Hâren

(04841.) nam die banier in die hant.

(04842.) zû hant wurden an gerant

(04843.) die heiden von den cristen:

(04844.) man wolde nicht mêr vristen.

(04845.) dô satzte sich der heiden her

(04846.) vil vaste an die widerwer.

(04847.) dâ hûb sich an beider sît

(04848.) ein vil ungevûger strît.

(04849.) dâ sach man Kûren vlîhen

(04850.) und von dem strîte zîhen

(04851.) alênzeln alsô lange,

(04852.) daß in grôßeme twange

(04853.) die brûdere bliben stân.

(04854.) die dûtschen enwolden ouch nicht lân,

(04855.) sie entrêten in die nôt

(04856.) bie die brûdere in den tôt.

(04857.) die getrûwen Kûren

(04858.) wolden ouch dâ dûren

(04859.) und dulden ungemach.

(04860.) die sper man dâ vliegen sach.

(04861.) brûder Bernhart und die brûdere sîn,

(04862.) die Kûren und die pilgerîn

(04863.) die hiwen unde vâchten.

(04864.) vil manchen man sie brâchten

(04865.) der heidenschaft in ungemach.

(04866.) daß rôte blût man dringen sach

(04867.) durch die brunjen in den sant.

(04868.) dô wurden mit werender hant

(04869.) drî brûdere und drîßic geslagen

(04870.) und dûtschen ein teil, daß ich clagen,

(04871.) ûf der selben walstat.

(04872.) die cristen wurden strîtes mat.

(04873.) die Sameiten teilten dô

(04874.) pferde und wâren vollen vrô

(04875.) und saiten iren goten danc,

(04876.) daß an deme strîte in gelanc.

(04877.) Dar nâch sie kârten drâte

(04878.) mit einem gemeinen râte

(04879.) mit dem roube in ir lant.

(04880.) sie sprâchen alle sân zû hant

(04881.) umme ein ander herevart,

(04882.) wie die wurde ungespart.

(04883.) wider ûf die cristenheit

(04884.) zû reisene was in nicht leit.

(04885.) sie hatten wol genoßßen,

(04886.) daß machte sie unverdroßßen.

(04887.) sie reiten aber zû ein her.

(04888.) sie wolden Kûrlant noch mêr

(04889.) vertiljen, dan sie hatten vor.

(04890.) ir hertze stûnt vil hô enpor,

(04891.) daß sie der reinen cristenheit

(04892.) sô dicke tâten hertzeleit.

(04893.) doch ê ir her bereitet wart,

(04894.) die brûdere hetten nicht gespart

(04895.) sie besatzten wol die wege

(04896.) mit wartlûten in stêter pflege.

(04897.) der eine vernam die mêre,

(04898.) wi iß in dem lande wêre,

(04899.) und war sie kârten iren sin.

(04900.) zû hant es quam geriten hin,

(04901.) diekeine rûe er nie genam,

(04902.) biß er zû Goldingen quam.

(04903.) die wârheit sait er in sunder wân.

(04904.) dâ was vil manch betrûbet man

(04905.) um den unverclageten schaden,

(04906.) dâ mit sie wâren noch verladen,

(04907.) der in sô nûwelîch was geschehen,

(04908.) und daß sie hôrten verjehen,

(04909.) die heiden quêmen dar mit her

(04910.) und daß sie hetten kein der wer

(04911.) sumelîchen ungetrûwen man.

(04912.) eß wart in dicke schîn getân

(04913.) sô man die brûdere dâ nider slûc,

(04914.) daß er sîn houbt von dannen trûc.

(04915.) die getrûwen bestûnden in der nôt

(04916.) und bliben die den brûderen tôt.

(04917.) ouch habet ir dicke wol vernomen,

(04918.) daß von den strîten sint abe komen

(04919.) manch vromer helt zû rechter nôt,

(04920.) die veigen mûßen ligen tôt:

(04921.) daß ouch zû Kûrlant geschach.

(04922.) dô man die zagen vlîhen sach

(04923.) die kûnen wurden uberladen.

(04924.) des mûsten sie in dem blûte baden.

(04925.) sumelîchem was iß sô gewant,

(04926.) daß er quam abe mit werender hant

(04927.) êrlîch zû hûs und dâ bie blôß.

(04928.) dar umme was ir macht nicht grôß.

(04929.) daß was in leit und ungemach.

(04930.) zû hant der kummentûr sprach:

(04931.) “brûdere, nû habet ûch wol!

(04932.) eß geschiet, daß geschehn sol.

(04933.) unser sorgen wirt gût rât,

(04934.) an gotes gebot iß alleß stât.”

(04935.) Vil schiere ein bote wart gesant

(04936.) zû Rîge. dô er den meister vant,

(04937.) dô warb er sîne botschaft sân.

(04938.) dô der meister hette verstân,

(04939.) daß man Kûrlant wolde hern,

(04940.) er sprach: “wir suln uns aber wern.”

(04941.) dâ wurden boten ûß gesant

(04942.) nâch Lîven, Letten und kein Eistlant.

(04943.) den brûderen und des hûses man

(04944.) wart eß alleß kunt getân.

(04945.) sie wolden willeclîchen varn

(04946.) mit manchen wunneclîchen scharn.

(04947.) der bischove lûte wâren ouch gereit

(04948.) vil snelle, dô in wart geseit.

(04949.) ie der voget sîn schar ûß las.

(04950.) zû Rîge die samenunge was.

(04951.) dô enwart lenger nicht gespart,

(04952.) der meister hûb sich ûf die vart

(04953.) mit den, die er dâ mochte haben.

(04954.) dâ sach man rennen und draben,

(04955.) diekein rûe niemant ennam

(04956.) biß man bie Goldingen quam.

(04957.) dâ leiten sie sich ûf daß gras.

(04958.) waß brûdere ûf der burge was

(04959.) die wurden algemeine vrô.

(04960.) man entpfienc die werden geste dô.

(04961.) der kummentûr hatte nicht gespart,

(04962.) die stiege wâren wol bewart

(04963.) wâ sie giengen in daß lant.

(04964.) vil schiere ein bote quam gerant,

(04965.) der sprach alsô: “die heiden quomen,

(04966.) daß hân ich vor wâr vernomen.

(04967.) sie wollen zûr Mimele in daß lant.”

(04968.) dô vûren kegen in zû hant

(04969.) die mit dem meistere wâren komen.

(04970.) ouch wurden Kûren mite genomen.

(04971.) dâ wâren Semegallen mite,

(04972.) die westen wol der lande site.

(04973.) dô wart geordent wol ir her

(04974.) kein der heidenschaft zû wer.

(04975.) dem die warte bevolen was

(04976.) sine besten lûte er zû sich las

(04977.) und den die wege ouch wâren kunt.

(04978.) sie riten manchen bôsen grunt

(04979.) durch; sie liden ungemach.

(04980.) ir her daß zogete alleß nâch.

(04981.) doch vunden sie ein vil schôneß velt.

(04982.) dâ slûc man ûf vil manich gezelt

(04983.) bie einer wunneclîchen bach.

(04984.) sie hetten dâ die nacht gemach.

(04985.) des morgens vrû wart in bekant,

(04986.) ir wartlûte quam ein teil gerant

(04987.) und brâchten sulche mêre wider:

(04988.) man herte ûf unde nider

(04989.) in dem lande mit grôßer macht;

(04990.) die Lettowen hetten heres brâcht,

(04991.) daß die cristen keine wer

(04992.) hetten kein der heiden her.

(04993.) dô der meister daß vernam,

(04994.) sîne brûdere und wer mit im quam

(04995.) die nam er alle in den rât.

(04996.) “ir hôret wol wie iß uns hie stât,”

(04997.) sprach der meister tugende vol,

(04998.) “ir habet alle daß vernomen wol,

(04999.) wie iß um die cristenheit stât,

(05000.) die grôßen schaden genomen hât.

(05001.) nû prûvet waß daß beste sie.

(05002.) die heiden sint uns nâhen bie:

(05003.) wolle wir nû die bestân,

(05004.) so ensol sich sûmen nû kein man,

(05005.) ir sult mir sagen ûwern sin.”

(05006.) dô sprach ein helt, was under in:

(05007.) “meister, ir habet hîr manchen man,

(05008.) wollen sie in der nôt bie ûch stân.”