(03018.) Bin des ein dinc zû Rîge geschach.

(03019.) Lengewîn an eime tische saß

(03020.) mit den brûderen dâ man aß.

(03021.) an ein schulderbein er sach,

(03022.) des quam sîn hertze in ungemach.

(03023.) er sprach: “die Littowen liden nôt,

(03024.) mîn brûder ist geslagen tôt.

(03025.) ein her in mîme hove lac

(03026.) sint gestern biß an diesen tac.”

(03027.) daß bein hât manchem sint gelogen.

(03028.) Lengewîn was doch unbetrogen:

(03029.) als er dâ vor hatte gesehen,

(03030.) nâch sînem gelouben iß was geschehen:

(03031.) die reise was im umbekant.

(03032.) vil schiere ein bote quam gerant,

(03033.) dô hôrte er wol die mêre

(03034.) wie eß irgangen wêre

(03035.) zû Littowen in dem lande.

(03036.) der sprach: “wir hân zû pfande

(03037.) wîb unde kinder,

(03038.) pferde, dar zû rinder.

(03039.) ouch ist der manne vil geslagen.

(03040.) Lengewînes brûder wolde jagen

(03041.) die afterhûte ûf daß her:

(03042.) sie satzten sich kein im zû wer

(03043.) mit menlîchem mûte.

(03044.) dô wart von der hûte

(03045.) Lengewînes brûder irslagen:

(03046.) wem daß leit sie, der mac iß clagen

(03047.) zû Littowen in dem lande!

(03048.) er bleib dâ sunder schande.”

(03049.) dô Lengewîn die mêre vernam,

(03050.) sîn herze in ein grôß jâmer quam,

(03051.) daß er sich selber nicht enhienc,

(03052.) ich weiß daß undervienc:

(03053.) daß quam dâ von, er was behût;

(03054.) man wolde von im haben gût.

(03055.) Der meister und sîn geselleschaft

(03056.) zû Rîge mit der gotes craft

(03057.) quam vil vrôlîche wider.

(03058.) die von Revele ritten sider

(03059.) mit vreuden hin zû lande.

(03060.) sie hatten vol die hande

(03061.) mit êren in der reise bejaget

(03062.) als helde unverzaget.

(03063.) dô dise reise was irgân

(03064.) Lengewînes vrûnde sân

(03065.) zû samne quâmen mit râte

(03066.) und wurben daß vil drâte,

(03067.) daß sie lôsten Lengewînen

(03068.) ûß sînen grôßen pînen.

(03069.) dô wart gelôset Lengewîn

(03070.) dar nâch von den vrûnden sîn.

(03071.) alsus wart ir gedinge:

(03072.) vumfhundert ôseringe

(03073.) gâben sie vor in zû hant

(03074.) und vûrten in wider in ir lant.

(03075.) Dâ was er inne manchen tac.

(03076.) sîn herze grimmes mûtes pflac

(03077.) sintemâl ûf die cristenheit.

(03078.) im was sîn alder schade leit.

(03079.) zû einen zîten daß geschach,

(03080.) daß man ein her vor Wenden sach;

(03081.) daß brâchte Lengewîn aldar.

(03082.) daß bleib ungewarnet gar;

(03083.) daß was ein wunderlîch geschicht,

(03084.) daß des die brûdere westen nicht;

(03085.) des quam in helfe mâßen vil.

(03086.) wer uber houbet howen wil

(03087.) der mac nicht lange tûren:

(03088.) gewalt brichet mûren.

(03089.) wer den strît volherten mac

(03090.) der tût den vienden bôsen tac.

(03091.) daß wart ouch zû Wenden schîn.

(03092.) der kummentûr und die brûdere sîn

(03093.) brâchte zû einem strîten

(03094.) zû grôßen unzîten:

(03095.) er hatte wol vumfhundert man.

(03096.) ein gewaldic her er an

(03097.) mit den selben rante.

(03098.) waß half, daß er genante?

(03099.) die brûdere meistic dâ bliben tôt,

(03100.) ir einer entran mit grôßer nôt;

(03101.) der brâchte heim die mêre.

(03102.) daß was in allen swêre.

(03103.) nûne wurden dô geslagen,

(03104.) der zênde brûder mûste tragen

(03105.) hin zû Littowen

(03106.) ein houbet abe gehowen,

(03107.) daß sînes kummentûres was.

(03108.) der clagete gote, daß er genas,

(03109.) dô man die anderen brûdere slûc,

(03110.) sô dicke als er daß houbet trûc,

(03111.) dannoch mûste daß selbe sîn.

(03112.) dar zû twanc in Lengewîn,

(03113.) dem was zû lande mit im gâch.

(03114.) er tôte in sînem brûdere nâch,

(03115.) dâ mite wolde er den verclagen.

(03116.) den hatte des meisters her geslagen

(03117.) binnes des, dô irgangen was

(03118.) zû Rîge, als man ûch ê las;

(03119.) ich wil von disen dingen lân

(03120.) und wil ein ander mêre bestân.

(03121.) Der gûte meister Dyterîch

(03122.) von Grûningen, stêter witze rîch,

(03123.) der hatte got von hertzen trût

(03124.) beide stille und uberlût.

(03125.) er minnete tugentlîchen

(03126.) den armen und den rîchen.

(03127.) man sach in alle zît bereit

(03128.) wâ die nûwe cristenheit

(03129.) betrûbet was an keiner nôt,

(03130.) dâ envorchte er nicht den tôt,

(03131.) er enwolde selber dar.

(03132.) Puch hatte er eine rische schar

(03133.) von brûderen und von knechten,

(03134.) die wol torsten vechten.

(03135.) der riet zû Nieflande

(03136.) mit sache mancher hande

(03137.) vollen dritehalbeß jâr,

(03138.) als ich vernomen habe vor wâr.

(03139.) die kummentûre von Nieflant

(03140.) wurden von ime dô besant.

(03141.) sie quâmen, dô erß in enpôt.

(03142.) er wart durch des landes nôt

(03143.) mit sîner brûdere râte gesant

(03144.) dâ er den hôhen meister vant.

(03145.) doch ê er ûf den wec quam

(03146.) mit râte er einen brûder nam,

(03147.) den hieß er des landes pflegen.

(03148.) er nam dô sîner brûdere segen

(03149.) und hûb sich vrôlîch ûf die vart.

(03150.) der wec wart dô nicht gespart

(03151.) biß daß er den hôhen meister vant;

(03152.) sîne botschaft tet er im bekant,

(03153.) wes er gerte, daß geschach.

(03154.) der hôe meister vil wol sach,

(03155.) daß er was ein wîser man,

(03156.) als ich vor wâr vernomen hân.

(03157.) Nieflandes er in erließ,

(03158.) kein Rôme er in varen hieß.

(03159.) der dâ hôe meister was

(03160.) die brûdere er zû samne las,

(03161.) die bie im wâren an der stunt.

(03162.) in allen was die sache kunt,

(03163.) daß der meister von Nieflant

(03164.) kegen Rôme was gesant

(03165.) unde des amtes was lôs.

(03166.) dar nâch man einen brûder kôs

(03167.) zû meistere uber Nieflant.

(03168.) der site was im wol bekant,

(03169.) des man in den landen pflac,

(03170.) er was gewesen manchen tac

(03171.) in Nieflande, daß ist wâr:

(03172.) dâ von weste er den site gar.

(03173.) brûder Andrês was er genant

(03174.) und was geborn von Stîrlant;

(03175.) er was des lîbes gar ein helt.

(03176.) zû hant dô er wart irwelt,

(03177.) brîve wurden dô geschriben.

(03178.) unlange sie dô bliben,

(03179.) sie wurden kegen Nieflant

(03180.) mit gûten boten dô gesant.

(03181.) dô sie zû Rîge wâren komen,

(03182.) die brîve wurden dô genomen:

(03183.) der an des meisters stat was

(03184.) die brîve man vor im las

(03185.) und vor den anderen brûderen dô.

(03186.) sie wurden algemeine vrô,

(03187.) dô man sô verre hatte gelesen,

(03188.) daß brûder Andrês solde wesen

(03189.) meister uber Nieflant.

(03190.) wen daß was in wol bekant,

(03191.) daß er was ein geistlîch man;

(03192.) sie wâren im gerne undertân.

(03193.) dô er die meisterschaft entpfienc

(03194.) lieplîch er dâ mit umme gienc,

(03195.) wen er was gotes genâden vol,

(03196.) sô ich die wârheit sprechen sol.

(03197.) wer in mit ougen ane sach

(03198.) in sînem herzen er jach,

(03199.) daß sô natûrlîch man

(03200.) sîn ougen nie gesêhen an.

(03201.) sîn munt was sûßekeit vol,

(03202.) als ich vil kurtzlîchen sol

(03203.) mit mîner schrift ûch tûn bekant.

(03204.) sich vreute dâ zû Nieflant

(03205.) junc und alt, daß ist alleß wâr.

(03206.) er enwas nicht ein halbeß jâr

(03207.) gewesen in dem lande,

(03208.) er hette zû sîner hande

(03209.) die bischove alle glîche

(03210.) von Rîge und von der Wîche.

(03211.) der von Darbete nicht enließ,

(03212.) der der dritte bischof hieß,

(03213.) er enwêre mit im albereit

(03214.) zû trôstene wol die cristenheit

(03215.) von der bôsen heidenschaft.

(03216.) die rittere alle mit irre craft

(03217.) von Revele die enließen nicht,

(03218.) sie enstûnden mit der selben pflicht.

(03219.) alsô trûgen sie uber ein

(03220.) recht, daß under in niekein

(03221.) zweiunge was als um ein hâr;

(03222.) einen mût hatten sie gar.

(03223.) des wâren ir lant vil rîche,

(03224.) daß sie sô vridelîche

(03225.) mit einander lebeten dô.

(03226.) ouch was daß lantvolc vrô.

(03227.) Dô die heidenschaft vernam,

(03228.) daß der meister sô vridesam

(03229.) mit sînen vrûnden kunde sîn,

(03230.) daß was in ein vil grôßer pîn.

(03231.) sie sprâchen: “sint dirre man

(03232.) mit sînen vrûnden alsô kan

(03233.) vrûntlîchen gebâren,

(03234.) wir suln haben vâren

(03235.) vor im, diß ist waß uns ist gût.

(03236.) ist daß er vîentlîchen mût

(03237.) kegen uns beginnet kêren,

(03238.) unser schade mac sich mêren.”

(03239.) die Littowen und Sameiten

(03240.) begunden sich bereiten

(03241.) nâch disen selben worten.

(03242.) die Semegallen ouch hôrten

(03243.) den meister sô vermeßßen,

(03244.) sie wâren im nâ geseßßen.

(03245.) Meister Andrês von Stîre dô

(03246.) dâchte, er wurde nimmer vrô,

(03247.) er enrichte der heidenschaft

(03248.) ein grôßer leit von sîner craft.

(03249.) er trûc in bôsen willen zû

(03250.) beide spâte unde vrû.

(03251.) zû jungest er genante:

(03252.) sîne boten sante

(03253.) er zû den kummentûren al.

(03254.) die vogete mit der selben zal

(03255.) quâmen zû im vil drâte.

(03256.) er sprach: “mit ûwerem râte

(03257.) wil ich kein Littowen varn.

(03258.) ir ensult nicht lenger sparn

(03259.) lîp, gût unde lûte,

(03260.) des bitte ich ûch hûte,

(03261.) wan uns got hât her gesant

(03262.) in sîner lieben mûter lant,

(03263.) daß sul wir breiten mit unser macht,

(03264.) mit stêter witze wol bedâcht.”

(03265.) die kummentûre sprâchen dô:

(03266.) “meister, wir sîn der rede vrô;

(03267.) ûwer wille sol dar an

(03268.) geschehen wol.” zû hant von dan

(03269.) ritten sie vil drâte.

(03270.) nâch des meisters râte

(03271.) geboten sie die herevart;

(03272.) des enwart niemant gespart.

(03273.) daß volc zû widerstrîte

(03274.) vreute sich der zîte,

(03275.) daß iß solde reise varn.

(03276.) die brûdere mit vil stoltzer schar

(03277.) quâmen dem meister dô.

(03278.) des was er von hertzen vrô.

(03279.) alle des dûtschen hûsen man

(03280.) die ritten mit einander dan.

(03281.) man sach helme und schilde

(03282.) glîßen ûf dem gevilde,

(03283.) die brunjen blenken sam ein glas,

(03284.) der dâ vil sunder zal was.

(03285.) daß her was michel unde breit

(03286.) und zû strîte wol bereit.

(03287.) Dô daß her sich hâte

(03288.) gelegert wol mit râte

(03289.) nâch des meisteres gebot,

(03290.) er sprach: “genêdeclîcher got,

(03291.) sunder dich mir kan gewern

(03292.) niemant, ich enwolle hern

(03293.) die Littowen und Sameiten.

(03294.) ouch saltu, hêrre, leiten

(03295.) mich an die Semegallen sûr,

(03296.) die dâ sint unser nâkebûr,

(03297.) daß ich die betwinge

(03298.) und dir zû dienste bringe.”

(03299.) dô daß her hatte gelegen

(03300.) die nacht in unseres hêrren segen

(03301.) und der tac sich schowen ließ,

(03302.) der meister sân gebieten hieß,

(03303.) blâsen an daß herhorn,

(03304.) daß zû dem zeichen was erkorn.

(03305.) des galm was michel unde grôß.

(03306.) daß her sich al zû hant entslôß

(03307.) und breite sich vil snelle.

(03308.) man hôrte aber eines helle

(03309.) daß herhorn erklingen:

(03310.) daß her begunde ûf dringen.

(03311.) dô daß dritte zeichen wart

(03312.) geblâsen, sich hûb ûf die vart

(03313.) der gûte meister Andrês dô

(03314.) von Nieflant als ein degen vrô,

(03315.) mit im daß her gemeine.

(03316.) sîn samenunge reine

(03317.) wâren alle vreuden rîch.

(03318.) daß her begunde breiten sich

(03319.) hin zû Nalsen in daß lant.

(03320.) man slûc daß volc mit vrîer hant,

(03321.) sam man tût die rinder.

(03322.) man, wîb unde kinder

(03323.) wurden wênic dâ gespart.

(03324.) sus vûr daß her vil wol geschart

(03325.) durch Nalsen kein Littowen.

(03326.) der meister wolde schowen

(03327.) wie kunic Myndowe mochte,

(03328.) ob er zû strîte tochte.

(03329.) der kunic in sîner burge lac.

(03330.) daß cristen her umme bejac

(03331.) wart vil dicke ane gerant.

(03332.) sie widerguldenß mit der hant

(03333.) rechte volleclîche.

(03334.) sie vlißßen sich gelîche,

(03335.) daß daß lant wurde verhert.

(03336.) sie gevlogen wâren, die in gewert

(03337.) solden hân die legirstat:

(03338.) er hatte sie gemachet mat.

(03339.) die cristenheit was alle vrô,

(03340.) sie dankten got von himele dô

(03341.) und der lieben mûter sîn.

(03342.) ir beider helfe wart dâ schîn.

(03343.) dô was roubes alsô vil

(03344.) genomen rechte âne zil

(03345.) zu Littowen in dem lande.

(03346.) sie verwûsten ouch mit brande

(03347.) alleß daß was um sie gelegen.

(03348.) sie hatten kure an allen wegen:

(03349.) dâ nie cristen her hin quam,

(03350.) die brûdere man dâ wol vernam.

(03351.) Der meister mit den sînen

(03352.) brûderen und pilgerînen

(03353.) scharten aber wol ir her,

(03354.) sie wolden vorwert sunder wer

(03355.) ûf die Sameiten sîn

(03356.) und brengen sie in grôßen pîn.

(03357.) man hôrte drîstunt den clanc,

(03358.) der ûß dem herhorne dranc:

(03359.) dô was daß her vil wol bereit.

(03360.) kein Sameiten man reit

(03361.) mit dem selben here dô.

(03362.) des wart vil mancher unvrô,

(03363.) der von kindes zîten

(03364.) nie quam zu keinen strîten,

(03365.) der mûste lîden den tôt;

(03366.) dar zû twanc in die grôße nôt,

(03367.) und die macht der cristenheit

(03368.) brâchte in manich herzeleit.

(03369.) der schade, der dô was getân

(03370.) zu Littowen, den lâße wir stân,

(03371.) der enwas nicht halb sô grôß.

(03372.) der Sameiten blût man grôß

(03373.) und sie mochten sich nicht weren.

(03374.) wer den lîp wolde generen,

(03375.) der mûste gar ân alle zucht

(03376.) in die welde nemen vlucht,

(03377.) in puschen und in brûchen

(03378.) mûsten sie vride sûchen;

(03379.) und wer dar under wart begân,

(03380.) der mûste dâ zû pfande lân

(03381.) den hals, daß was in ungemach.

(03382.) vil manchen dort alsô geschach,

(03383.) ich meine zû der selben stunt,

(03384.) daß sint der Sameiten munt

(03385.) dâ von clagete manchen tac.

(03386.) nicht mêr ich ûch sagen mac.

(03387.) die cristen hatten vol ir hant

(03388.) und die lant vil gar verbrant

(03389.) und kârten wider zû lande

(03390.) mit roube mancher hande.

(03391.) dô sie zû Rîge quâmen

(03392.) und die burger vernâmen,

(03393.) daß iß in wol was irgân,

(03394.) sie lobeten algemeine sân

(03395.) got von himelrîche,

(03396.) daß er genêdeclîche

(03397.) in der selben herevart

(03398.) die cristenheit hatte bewart.

(03399.) von der brûdere râte

(03400.) der meister gab vil drâte

(03401.) des roubes unserm hêrren teil,

(03402.) wen er hatte in gegeben heil.

(03403.) sînes teiles was er wert:

(03404.) man gab im wâpen unde pfert.

(03405.) die mêre lâße wir bestân

(03406.) und vallen ûf ein ander sân.

(03407.) Der meister Andrês von Stîre

(03408.) dâchte nicht lenger vîre

(03409.) halden mit der heidenschaft.

(03410.) er sprach: “hêrre got, dîn craft

(03411.) hât mir vil wol bestanden bie,

(03412.) doch werde ich nimmer sorgen vrie,

(03413.) dû engebest mir daß heil,

(03414.) daß ich der heiden erbeteil

(03415.) erwerbe mit den cristen:

(03416.) mîn leben wil ich nicht vristen.”

(03417.) Meister Andrês der ließ sân

(03418.) sîne brûdere verstân,

(03419.) daß er mit einer herevart

(03420.) wolde zu Semegallen wart.

(03421.) der reise wurden sie vil vrô.

(03422.) daß lantvolc gemeine dô

(03423.) hin und her wart besant.

(03424.) dem meistere quam daß her zû hant.

(03425.) der meister und die brûdere sîn,

(03426.) daß lantvolc und die pilgerîn

(03427.) hûben sich ûf die vart

(03428.) hin kein Semegallen wart.

(03429.) dô sie quâmen in die lant,

(03430.) sie nâmen roubes vol die hant

(03431.) und slûgen Semegallen vil.

(03432.) diß bûch ûch alle sagen wil.

(03433.) der meister treib her unde dar

(03434.) mit sîner ritterlîchen schar

(03435.) wâ er die heiden bie im vant.

(03436.) sus verwûste er in lant

(03437.) hûte hie und morne dâ.

(03438.) die heiden enwesten rechte wâ

(03439.) sie sich solden versehen,

(03440.) daß man vor wâr mac verjehen.

(03441.) Die Semegallen drâte

(03442.) mit eime gemeinen râte

(03443.) santen an den meister dô

(03444.) umme einen vride recht alsô,

(03445.) daß sie den zins mûsten geben

(03446.) und in der brûdere vride leben.

(03447.) dô der meister sie vernam,

(03448.) sîn hertze sân in vreude quam.

(03449.) er nam die Semegallen wider,

(03450.) den zins sie gerne gâben sider.

(03451.) Nû wil ich ûch ein teil verjehen,

(03452.) waß mêr wunders ist geschehen

(03453.) an dem meistere von Nieflant.

(03454.) er was zû Littowen wol bekant

(03455.) kunic Myndowen, der dô riet

(03456.) zû Littowen uber die diet.

(03457.) nû vûgete sichß, daß geschach,

(03458.) daß man des kuniges boten sach

(03459.) an den meister werben sô:

(03460.) kunic Myndowe wêre vrô,

(03461.) ob im die sêlde mochte geschehen,

(03462.) daß er den meister solde sehen:

(03463.) er wolde des immer wesen vrô.

(03464.) des kuniges bote warb alsô.

(03465.) dô der meister hatte vernomen

(03466.) den boten, der zû im was komen,

(03467.) mit sîner brûdere râte er reit

(03468.) uber manche heide breit

(03469.) biß daß er quam in daß lant,

(03470.) dâ er kunic Myndowen vant.

(03471.) von dem wart er entpfangen wol,

(03472.) als man einen hêrren sol.

(03473.) die kunigîn ouch zû im gienc,

(03474.) den meister sie lieplîch entpfienc

(03475.) und alle die brûdere, daß ist wâr,

(03476.) die mit im wâren komen dar.

(03477.) dar nâch dô die zît was komen,

(03478.) als ich vor wâr habe vernomen,

(03479.) daß man solde eßßen,

(03480.) nichtes wart dâ vergeßßen,

(03481.) daß man zû êren haben sol:

(03482.) dâ mite pflac man der geste wol.

(03483.) dô dâ was geßßen

(03484.) und nicht lange geseßßen,

(03485.) der kunic dankete zû hant

(03486.) dem meistere dô von Nieflant,

(03487.) daß er zû im was komen.

(03488.) dô der meister hatte vernomen

(03489.) des kuniges sin biß an daß ort,

(03490.) der meister hatte gûte wort,

(03491.) er sprach zû Myndowen

(03492.) dem kunige von Littowen:

(03493.) “wurdest dû ein cristen man,

(03494.) grôße êre ich dir danne gan:

(03495.) sô wil ich dir irwerben

(03496.) die crône, ich ensterben.”

(03497.) Der kunic was der rede vrô.

(03498.) dem meister gelobete er dô

(03499.) sînes landes genûc;

(03500.) gûten willen er zû im trûc.

(03501.) dô diß alleß was irgân,

(03502.) der meister und der kunic sân

(03503.) ir gelubde machten sie dô,

(03504.) des die cristen wurden vrô.

(03505.) der kunic einen heiden nam

(03506.) biderbe, als iß wol gezam,

(03507.) er was ein vil rêtig man,

(03508.) dô der meister wolde von dan,

(03509.) der was Parnus genant.

(03510.) der reit kegen Nieflant

(03511.) mit deme meister wider.

(03512.) der meister von der Rîge sider

(03513.) einen brûder sante hin

(03514.) zû Rôme ûf den sin,

(03515.) als er gelobet hâte.

(03516.) die boten ritten drâte

(03517.) vaste hin zû Rôme wart.

(03518.) der wec wênic wart gespart.

(03519.) dô sie zû Rôme quâmen

(03520.) ir brîve sie nâmen

(03521.) unde brâchten die zû hant

(03522.) dâ man den pâbest vant.

(03523.) dô die brîve wâren gelesen,

(03524.) der pâbest sprach: “ich wil wesen

(03525.) willic zû dirre botschaft.

(03526.) ich wil legen mîne craft

(03527.) dar an sô ich beste mac.

(03528.) diß ist mir ein vil lieber tac.”

(03529.) der pâbest brîve schrîben ließ

(03530.) umme die sache unde hieß

(03531.) sie den boten geben sider,

(03532.) dâ mite die boten kârten wider

(03533.) vaste hin zû lande wart.

(03534.) Parnus verdrôß nicht der vart.

(03535.) dô sie zû Rîge quâmen

(03536.) ir brîve sie nâmen

(03537.) unde gâben sie zû hant

(03538.) in des meisters Andrês hant.

(03539.) dô der capelân gelas

(03540.) sô verre, daß gegeben was

(03541.) dem meistere der crône gewalt,

(03542.) dô vreute sich junc und alt.

(03543.) der meister ließ dô machen

(03544.) mit vil rîchen sachen

(03545.) dem kunige Myndowen

(03546.) und Marthen sîner vrowen

(03547.) zwû crônen, gar von kunsten rîch.

(03548.) er hatte nâch bischove Heinrîch

(03549.) hin zû Prûßen lant

(03550.) sînen boten vor gesant.

(03551.) der bischof wart der mêre vrô;

(03552.) zû Rîge an den meister dô

(03553.) quam er vrôlîch geriten.

(03554.) dô wart lenger nicht gebiten,

(03555.) sie hûben sich ûf die vart

(03556.) kegen Littowen wart.

(03557.) pfaffen unde brûdere dar

(03558.) quâmen an des meisters schar.

(03559.) dô sie quâmen in daß lant,

(03560.) man toufte und wîhete zû hant

(03561.) den rîchen kunic Myndowen

(03562.) und Marthen sîne vrowen.

(03563.) der kunic was der crône vrô.

(03564.) dem meister gab er mit brîven dô

(03565.) rîchlîch in sîne hant

(03566.) rîche unde gûte lant

(03567.) in sîme kunicrîche sân.

(03568.) dô daß alleß was irgân,

(03569.) der meister pfaffen und brûdere ließ

(03570.) zû Littowen unde hieß,

(03571.) daß sie daß volc lêrten sô,

(03572.) daß eß zû jungest wurde vrô.

(03573.) der bischof und der meister sân

(03574.) und aller beide undertân

(03575.) ritten wider in ir lant.

(03576.) sus wart die reise volant.

(03577.) Nû wil ich aber vorder sagen.

(03578.) der meister krankte an den tagen;

(03579.) daß wart dem hôhen meistere kunt.

(03580.) er sante in vil sneller stunt

(03581.) von Seyne brûder Eberhart

(03582.) hin zû Nieflande wart.

(03583.) dô er quam zû Nieflant,

(03584.) daß amt gab im ûf zû hant

(03585.) meister Andrês, daß ist war.

(03586.) er hatte sechstehalbeß jâr

(03587.) daß lant vil wol verstanden;

(03588.) doch was er in den landen

(03589.) sint vil nâ ein halbeß jâr.

(03590.) der meister wîsete her und dar

(03591.) des landes site mit trûwen wol.

(03592.) nicht mêr ich dâ von sagen sol.

(03593.) brûder Andrês urloub nam

(03594.) von sînen brûderen, als iß wol zam,

(03595.) und reit zû Littowen

(03596.) an sînen vrûnt Myndowen

(03597.) und ouch zû der kunigîn.

(03598.) dannoch wâren die brûdere sîn

(03599.) in Littowen wol behût.

(03600.) des kuniges mût was vollen gût

(03601.) dannoch zû der cristenheit.

(03602.) der kunic mit brûder Andrês reit

(03603.) vil trûwelîch ûf die vart.

(03604.) der meister wol nâch tugende art

(03605.) nam urloub von Myndowen

(03606.) dem kunige von Littowen

(03607.) und reit vort zû dûtschem lant.

(03608.) alsus sî daß mêre volant.

(03609.) Von Nieflant meister Eberhart

(03610.) gebôt eine herevart

(03611.) uber al der brûdere lant.

(03612.) die kummentûre zû hant

(03613.) brâchten ime volkes vil,

(03614.) mêr danne ich sagen wil.

(03615.) dâ mite vûr meister Eberhart

(03616.) zû Sameiten wart.

(03617.) dô er quam in daß lant

(03618.) man sach roub unde brant

(03619.) ungevûgen stiften dâ.

(03620.) deme here was nicht gâ,

(03621.) wan eß was michel unde grôß.

(03622.) der reise eß vil wol genôß

(03623.) unde quam zû Rîge wider.

(03624.) kurtze wîle eß rûwete sider.

(03625.) Der meister aber mit eime here

(03626.) ûf dem strande bie dem mere

(03627.) kârte hin kein Kûrlant.

(03628.) die reise im sus gienc in hant.

(03629.) er kârte kein der Mimele wart,

(03630.) daß er was alleß vrô der vart.

(03631.) dô sie ûf die Mimele quâmen

(03632.) ir herberge sie nâmen

(03633.) ûf der Mimele kein dem mer.

(03634.) dâ legerte sich der brûdere her.

(03635.) der meister wider unde vort

(03636.) reit biß an der Dangen ort

(03637.) dâ sich die waßßere sließen

(03638.) und in einander vließen.

(03639.) dô arbeite man sô lange,

(03640.) dâ die Mimele und die Dange

(03641.) in einander sließen

(03642.) und zû samne vließen,

(03643.) daß daß hûs vollen quam.

(03644.) zû hant er die besten nam,

(03645.) die er bie im hâte,

(03646.) unde besatzte drâte

(03647.) die burc mit gûten mannen.

(03648.) sint reit er von dannen.

(03649.) er hatte zû der selben stunt

(03650.) uber des wilden meres grunt

(03651.) mit kocken vil der spîse brâcht,

(03652.) als er hatte vor bedâcht.

(03653.) dô wart daß hûs gespîset wol,

(03654.) sô ich die wârheit sprechen sol.

(03655.) Der meister mit den sînen reit

(03656.) zû Rîge wider und was gemeit.

(03657.) eß quam dar nâch in kurtzen tagen,

(03658.) als ich ûch nû wil sagen,

(03659.) daß den meister verdrôß

(03660.) der arbeit: er entslôß

(03661.) sînen mût den brûderen sîn,

(03662.) er sprach: “ich wil ûch tûn schîn,

(03663.) daß mir mîn lîp nû becranket,

(03664.) und mîn craft mir wanket:

(03665.) durch daß mûß ich zû lande varn.

(03666.) ist daß got mich wil bewarn,

(03667.) sô wil ich ûch irwerben,

(03668.) iß ensie den daß ich sterben,

(03669.) daß ûch ein meister wirt gesant

(03670.) nâch ûwerm willen in daß lant.”

(03671.) waß iemant dâ wider sprach,

(03672.) sîn wille doch dar an geschach.

(03673.) mit râte er einen brûder nam,

(03674.) der dem lande eben quam,

(03675.) und ließ den an sîner stat.

(03676.) die brûdere er gemeine bat,

(03677.) daß sie deme wêren undertân.

(03678.) er hatte als ein wîser man

(03679.) gerâten anderhalbeß jâr

(03680.) und wênic mêr, daß ist wâr.

(03681.) dô er zû dûtschen landen quam,

(03682.) der hôhe meister vernam,

(03683.) daß er nicht wolde zû Nieflant.

(03684.) daß amt gab er al zû hant

(03685.) eime tugenthaften manne,

(03686.) geheißen brûder Anne.

(03687.) des amtes was er wol wert.

(03688.) brûder, knechte, rasche pfert

(03689.) wurden im mite gegeben.

(03690.) er hatte ein geistlîcheß leben.

(03691.) daß ingesigel von Nieflant

(03692.) gab im der meister al zû hant.

(03693.) dô reit der meister Anne

(03694.) mit manchem rischen manne

(03695.) hin zû Nieflande dô.

(03696.) man wart sîner kumfte vrô.

(03697.) dô die brûdere hatten vernomen,

(03698.) daß der meister was komen,

(03699.) nicht lenger wart von in gebiten,

(03700.) kegen ime sie dô riten.

(03701.) die brûdere nicht enließen

(03702.) ir menje sie hießen

(03703.) den brûdern geselleschefte pflegen.

(03704.) dô man sach manchen stoltzen degen

(03705.) rîten kein im ûf den strant,

(03706.) entpfangen wart er zû hant

(03707.) als den êren wol gezam.

(03708.) ir vrûntschaft er gerne nam.

(03709.) dâ mite riten sie drâte

(03710.) unde quâmen spâte

(03711.) zû Rîge zû sente Uriân.

(03712.) im volgete manich man.

(03713.) man ließ zû den zîten

(03714.) niemande rîten,

(03715.) die mit dem meister wâren komen,

(03716.) als ich vor wâr hân vernomen,

(03717.) ê dan sie hatten geseßßen,

(03718.) getrunken unde geßßen.

(03719.) dô daß eßßen was irgân,

(03720.) sie danketen dem meister sân

(03721.) unde riten in ire stat.

(03722.) daß volc im alleß êre bat.

(03723.) Under des der meister was

(03724.) zû Rîge komen, als ich ê las.

(03725.) dô wart den von Samelant

(03726.) von der Mimele bekant,

(03727.) daß dâ lêge ein vesten

(03728.) mit vil swêren gesten.

(03729.) sie sprachen: “dâ wolle wir hine varn,

(03730.) keinen man dâ vor sparn.”

(03731.) zû hant wart ein rischer helt

(03732.) von den Samen ûß irwelt,

(03733.) der reit wol die richte

(03734.) und hatte in sîner pflichte

(03735.) zwêne gesellen harte stoltz.

(03736.) vil rische quâmen sie in daß holtz,

(03737.) daß ûf die Mimele stôßet.

(03738.) der eine sprach: “nû verdrôßet.”

(03739.) er wolde alleine rîten vort.

(03740.) dô er gesprochen hatte daß wort,

(03741.) er rûrte daß pfert mit den sporn:

(03742.) einen berc, den er irkorn

(03743.) hatte, risch er den ûf reit

(03744.) und sach uber die Mimele breit

(03745.) eine burc gebûwet.

(03746.) er sprach: “iß berûwet

(03747.) alle die cristen, die hie sint.

(03748.) sie dunken mich der sinne blint,

(03749.) sie sint sunder witzen,

(03750.) wênen sie hie besitzen.

(03751.) ich vreuwe mich, daß unser lant,

(03752.) daß Samelant ist genant,

(03753.) hât sô manchen rischen man,

(03754.) der mit urlouge kan

(03755.) harte wol gebâren.

(03756.) diß krêhennest wir zwâren

(03757.) wollen zû kleinen stucken

(03758.) in kurtzer wîle rucken.

(03759.) die lûte die dar ûffe sint,

(03760.) man, wîb unde kint

(03761.) die wolle wir mit lôßen

(03762.) die cleinen unde grôßen

(03763.) unsern goten senden;

(03764.) daß enkan niemant wenden.”

(03765.) dar mite reit er al zû hant

(03766.) dâ er sîne gesellen vant.

(03767.) den sagete er die mêre.

(03768.) daß was in harte swêre.

(03769.) dô sie wider quâmen

(03770.) zû Samelant, sie nâmen

(03771.) die Samen, die sie santen ê

(03772.) zû der Mimele. “iß tet uns wê”

(03773.) sprâchen die boten alle drî:

(03774.) “uns wonen bôse geste bî,

(03775.) nû sult ir uns vil wol verstân,

(03776.) waß die brûdere hân getân:

(03777.) sie hân mit cranken dingen,

(03778.) dar umme in misselingen

(03779.) mûß, eine burc vollenbrâcht,

(03780.) daß sage wir ûch wol bedâcht:

(03781.) die wolle wir abe brechen,

(03782.) an irme lîbe uns rechen.”

(03783.) die wîsten, die sie hâten,

(03784.) zû samne sie trâten

(03785.) von den anderen zû hant.

(03786.) der eldeste under in vant

(03787.) einen rât in allen,

(03788.) der was in wol gevallen.

(03789.) dar mite trâten sie wider,

(03790.) zû hant die besten sâßen nider.

(03791.) dô ir sitzen was bereit,

(03792.) der eine sprach: “lât ûch sin leit,

(03793.) daß die brûdere uns hân getân.

(03794.) disen rât sult ir verstân;

(03795.) ich gebiete ûch bie der hôesten kur,

(03796.) die ûch dicke ist geleget vur,

(03797.) daß ist die dem lîbe,

(03798.) daß niemant blîbe

(03799.) der der schilt getragen mac,

(03800.) ûf einen bescheidenen tac,

(03801.) er envare kein der Mimele wart

(03802.) mit uns: niemant wirt gespart.”

(03803.) Die Samen alle wurden vrô.

(03804.) ir antwurte was alsô,

(03805.) daß sie sunder widerwort

(03806.) mit vlîße wolden alle vort.

(03807.) ir einer vrâgen began,

(03808.) wie manchen schilt sie mochten hân.

(03809.) die Samen sprâchen alle

(03810.) in vil grôßeme schalle:

(03811.) “wir brengen uber daß gevilde

(03812.) vierzic tûsent schilde.

(03813.) sô machstu prûven, ob dû wilt,

(03814.) ob immer der Samen schilt

(03815.) unrechtes sich moge irwern.

(03816.) wir wollen ouch mit schiffen hern

(03817.) die dâ hân gebûwet.

(03818.) bie wâne eß sie berûwet.”

(03819.) Nicht lenger von in wart gespart.

(03820.) die schif, die kein der Mimele wart

(03821.) solden, die wurden schiere bereit.

(03822.) daß was den Samen nicht leit.

(03823.) die Samen aber bâten

(03824.) die besten, die sie hâten,

(03825.) daß sie nâch in quêmen,

(03826.) wenne sie vernêmen

(03827.) daß sie in der Mimele wêren.

(03828.) dar mite begunden kêren

(03829.) die Samen ûf daß wilde mer.

(03830.) ein teil vûr ouch ir her

(03831.) mit schiffen oben um daß lant,

(03832.) daß ist daß vrische hab genant.

(03833.) dar mite kârten sie dô

(03834.) zûr Mimele unde wâren vrô.

(03835.) dô sie mit schiffen quâmen

(03836.) von dem mere, und vernâmen

(03837.) die brûdere der Samen mût,

(03838.) der endûchte sie nich gût.

(03839.) sie wâren komen zû der zît

(03840.) beide durch sturm und durch strît.

(03841.) dâ sach man Samen alsô vil,

(03842.) daß sie wâren âne zil.

(03843.) sie hatten dâ mit schiffen

(03844.) die Mimele sô begriffen,

(03845.) daß man dar uber mochte gân.

(03846.) daß enwart nie mêr getân.

(03847.) die Mimele ist ein waßßer grôß.

(03848.) dô man schif zû schiffe slôß,

(03849.) dô wart eß zû allen stucken

(03850.) bestellet sam sie ein brucken

(03851.) hetten uber die vlût geleit.

(03852.) daß was deb brûderen vil leit

(03853.) sie bereiten wol ir wer.

(03854.) al die wîle quam daß her

(03855.) der heiden dâ von Samelant.

(03856.) sie trâten abe sân zû hant

(03857.) und nâmen schilt und sper.

(03858.) zû sturme stûnt ir aller ger.

(03859.) sie drungen und trâten zû

(03860.) der burge; sumelîch zû vrû

(03861.) hatte des morgens ûf gestân,

(03862.) der mûste dâ zû pfande lân

(03863.) den lîb, den er dar hatte brâcht.

(03864.) alleine er es nicht hatte gedâcht,

(03865.) daß geschach doch manchem dâ.

(03866.) sint entrâten sie nicht sô nâ.

(03867.) dâ sie hatten verlorn

(03868.) ir lûte, dô wart in zorn,

(03869.) daß ie die reise wart gedâcht.

(03870.) in disen dingen wurden brâcht

(03871.) ir lûte, die dâ lâgen tôt.

(03872.) sân ir wîsten in gebôt,

(03873.) daß sie die tôten brenten

(03874.) und von hinnen senten

(03875.) mit iren wâpen ungespart;

(03876.) sie solden dort ouch herevart

(03877.) und reise rîten.

(03878.) des geloubeten sie bie den zîten.

(03879.) der rede volgeten sie mite,

(03880.) wen eß was der lûte site.

(03881.) ûf hôr zû hant sie trâten,

(03882.) ir tôten, die sie hâten,

(03883.) die branten sie mit irme zûge,

(03884.) vur wâr ich nicht enlûge:

(03885.) spere, schilde, brunje, pfert,

(03886.) helme, keyen und swert

(03887.) brante man durch ir willen,

(03888.) dar mite solden sie stillen

(03889.) den tûvel in jener werlde dort.

(03890.) sô grôße tôrheit wart nie gehôrt.

(03891.) Die brûdere ûf der burge dô

(03892.) wurden algemeine vrô,

(03893.) daß in got helfe hatte gesant.

(03894.) die heiden, dô sie hatten gebrant

(03895.) ir tôten, dô ritten sie dan.

(03896.) des was trûric manich man,

(03897.) der gewundet von dannen schiet.

(03898.) den Samen dô ir beste riet,

(03899.) daß sie nicht verbêren,

(03900.) alle die da wêren

(03901.) gewurfen oder geschoßßen

(03902.) die solde man unverdroßßen

(03903.) vûren wider zû Samelant

(03904.) in schiffen vaste umme den strant.

(03905.) die schif wurden bereit

(03906.) und die gewunten dar în geleit.

(03907.) sus vûren sie von dannen

(03908.) mit schiffen und mit mannen.

(03909.) Dem meistere von Nieflant

(03910.) wurden brîve gesant,

(03911.) wie eß zûr Mimele ergangen was.

(03912.) dô man die brîve im gelas,

(03913.) er sprach: “mich sal nicht trâgen,

(03914.) mîn leben wil ich wâgen

(03915.) durch dise sache, die ich hân

(03916.) vernomen.” er ließ boten sân

(03917.) mit brîven rîten in sîn lant,

(03918.) den kummentûren tûn bekant,

(03919.) daß er die Samen wolde hern,

(03920.) und wolde in daß bewern,

(03921.) daß sie den brûderen hatten getân,

(03922.) die zûr Mimele wâren gelân.

(03923.) dô die brîve wâren gelesen

(03924.) den kummentûren: “eß sal wesen”

(03925.) sprâchen sie mit willen;

(03926.) “wir wollen gestillen

(03927.) die Samen in vil kurtzer stunt.”

(03928.) sie tâten iren lûten kunt,

(03929.) daß sie wolden reisen,

(03930.) wittewen und weisen

(03931.) machen mit der gotes craft.

(03932.) dô daß volc die botschaft

(03933.) hatte gehôrt, eß vreute sich

(03934.) mit grôßer vreude sicherlîch

(03935.) und wart vil wol gemeit

(03936.) und zû der reise bereit.

(03937.) dô quam ein hovelîcheß her

(03938.) der cristen bie daß wilde mer.

(03939.) der meister und die brûdere sîn

(03940.) und dar zû manich pilgerîn

(03941.) wâren vrô der herevart

(03942.) hin kein Samelande wart.

(03943.) der meister und die brûdere sîn,

(03944.) daß lantvolc und die pilgerîn

(03945.) zogeten hovelîchen hin

(03946.) kein Samelant durch gewin

(03947.) alleß ûf des meres strant.

(03948.) daß was den Samen unbekant.

(03949.) Dô daß her zûr Mimele quam,

(03950.) meister Anne zû im nam

(03951.) der brûdere von der burc ein teil,

(03952.) alleß durch des heres heil,

(03953.) wan in wâren bekant

(03954.) die stîge dâ zû Samelant.

(03955.) daß lant ist ummevloßßen,

(03956.) des hân sie dicke genoßßen.

(03957.) an eime ende daß wilde mer,

(03958.) dâ enschadet in kein her;

(03959.) an den anderen sîten

(03960.) mac niemant kein in strîten:

(03961.) dâ vlûßet ein wilder wâc

(03962.) tief und breit; er machet trâc

(03963.) die dâ mit den schiffen varn

(03964.) des somers, wie kûme sie sich bewarn.

(03965.) kein der Mimele dâ gêt zû

(03966.) ein hals; dâ quâmen sie vrû

(03967.) mit irme here hovelîch.

(03968.) des vreuten die cristen sich.

(03969.) dâ was ein vil grôßer hagen

(03970.) von den Samen vor geslagen,

(03971.) der was grôß unde dicke,

(03972.) dâ enwâren nicht cleine ricke,

(03973.) dâ wâren boume sô grôß,

(03974.) daß sint vil manchen verdrôß.

(03975.) sie wâren sô gevellet,

(03976.) daß eß was gestellet

(03977.) sam eß wêre ein bolewerc.

(03978.) eß was ein ungevûgeß werc,

(03979.) daß von den Samen was gemacht.

(03980.) vinster was eß sô die nacht

(03981.) und gienc von des meres strant

(03982.) wan in daß vrische hab. zû hant

(03983.) trâten zû die cristen,

(03984.) sie enwolden nicht gevristen,

(03985.) sie enhiwen den hac enzwei.

(03986.) dar umme gâben sie ein ei,

(03987.) daß tâten sie gar âne wer.

(03988.) ordenlîchen lac in her.

(03989.) dô sie hatten geslagen

(03990.) und gehowen durch den hagen

(03991.) einen rûm zû mâßen grôß,

(03992.) daß her sich zû hant entslôß

(03993.) und kârte in daß lant.

(03994.) dâ wart den Samen bekant,

(03995.) daß sie wâren verladen

(03996.) mit gesten, die in wolden schaden.

(03997.) Die cristen slûgen volkes vil

(03998.) unde nâmen âne zil

(03999.) roubes vol die hande.

(04000.) sie tâten ouch mit brande

(04001.) den Samen grôßen schaden.

(04002.) sie hatten gûtes vil geladen

(04003.) in deme lande, daß ist wâr.

(04004.) sie triben zû samne gar

(04005.) den roub, der dâ genomen was.

(04006.) under des zû samne las

(04007.) der hôeste Same die vrûnde sîn.

(04008.) er sprach: “wir suln lîden pîn,

(04009.) wir engelden daß in kurtzer vrist

(04010.) daß uns nû geschên ist.”

(04011.) der Samen quam ein michel schar.

(04012.) man wart an in wol gewar,

(04013.) daß sie irzurnet wâren.

(04014.) sie sprâchen offenbâren:

(04015.) “wir wollen underrîten

(04016.) den hagen zû disen zîten,

(04017.) sô sal man den cristen

(04018.) an keinen dingen vristen,

(04019.) man gebe ir volleclîcheß gelt.”

(04020.) “nû rîtet risch ûf daß velt,

(04021.) daß vor deme hagen lît:

(04022.) dâ sô habe wir den strît”

(04023.) sprach der beste under in.

(04024.) zû hant kârten sie hin

(04025.) und machten wider den hagen,

(04026.) dâ daß her was durch geslagen:

(04027.) wan sie westen daß wol,

(04028.) daß sie wolden den zol

(04029.) von den cristen nemen dâ

(04030.) und nirgen anderswâ.