(01005.) Dâ reite man sich vaste zû.

(01006.) des anderen tages sanc man vrû

(01007.) messe ubir al die stat.

(01008.) der gûte meister Volkewîn bat

(01009.) die pilgerîme ubir al,

(01010.) sô sie den grôßen glocken schal

(01011.) driestunt vernêmen,

(01012.) daß sie zû velde quêmen

(01013.) und unser vrouwen vanen war

(01014.) nêmen. daß geschach vil gar.

(01015.) den nam der herzoge in die hant:

(01016.) den besten ritter den er vant

(01017.) in aller sîner rotte gar

(01018.) deme tet er in dô dar.

(01019.) er sprach: “lât ûch in bevoln sîn

(01020.) bie gotes hulden und mîn!

(01021.) ich wil selbe bie ûch wesen.”

(01022.) der besten rittere ûß gelesen

(01023.) viere er im zû helfe gab.

(01024.) er trûc des marschalkes stab

(01025.) selbe von des rîches wegen.

(01026.) er sprach: “wir suln des heres pflegen,

(01027.) wil und got genêdic sîn

(01028.) daß wir den heiden vûgen pîn.”

(01029.) er sûchte der besten rittere dô

(01030.) zwelve, die des wâren vrô,

(01031.) und schûf sie vor den vanen.

(01032.) des ließen sie sich gern manen.

(01033.) vorrîter sante man dâ hin,

(01034.) leitsagen gût die tet man in.

(01035.) die brûdere nâmen dô die wege,

(01036.) daß volc sie hatten in ir pflege.

(01037.) der herzoge den meister nam

(01038.) bie sich, als iß wol gezam,

(01039.) und vrâgete in der mêre,

(01040.) wie iß in den landen wêre.

(01041.) beide gewonheit und lant

(01042.) tet im der meister vil wol bekant.

(01043.) sus wart daß her wagehaft.

(01044.) sie hielden doch geselleschaft

(01045.) harte zuchteclîche

(01046.) beide arme und rîche;

(01047.) zûn herbergen riten sie.

(01048.) daß volc sich vaste nider lie

(01049.) ûf eine schône wise breit.

(01050.) der herzoge und der meister reit

(01051.) umme und sâhen;

(01052.) zû rechter mâße nâhen

(01053.) hießen sie die lûte ligen.

(01054.) sie wolden wesen ungezigen,

(01055.) daß ir her wêre hûte vrie.

(01056.) in wonte êre und wîsheit bie.

(01057.) Des anderen tages sie zogeten hin

(01058.) zû Segewalde. dâ was in

(01059.) die herberge wol bereit

(01060.) ûf eine reine bach geleit,

(01061.) dem here wol zû mâße.

(01062.) stîge unde strâße

(01063.) wâren harte wol bewart.

(01064.) der meister hatte nicht gespart:

(01065.) daß zû Sigewalde was

(01066.) daß wart gevûrt ûf daß gras,

(01067.) daß sie vûren alle deste baß.

(01068.) daß ließ vil mancher âne haß.

(01069.) dâ lâgen sie an den dritten tag;

(01070.) daß volc dô gûter rûwe pflag.

(01071.) die Lîven zogeten vaste zû.

(01072.) des dritten tages reit man vrû

(01073.) zû Winden hovelîche.

(01074.) daß hûs was wol sô rîche,

(01075.) daß man sie lieblîchen dâ

(01076.) handelte als ouch anderswâ.

(01077.) daß her quam zû samne dô;

(01078.) die werden geste wâren vrô.

(01079.) die Letten und Lîven

(01080.) die wolden stête blîben

(01081.) bie deme cristentûme.

(01082.) die Eisten wol nâch rûme

(01083.) sûchten von ir lande her.

(01084.) sie vûrten schilt und sper

(01085.) vil brunjen und manchen helm

(01086.) den sach man lûchten durch den melm

(01087.) ûf stiegen und ûf strâßen.

(01088.) nû quâmen wol zû mâßen

(01089.) des meisters wartlûde dan.

(01090.) die santen einem rischen man

(01091.) von sich zû warnunge.

(01092.) stolze helde junge

(01093.) harreten dannoch bie dem her.

(01094.) die cristen zogeten durch die wer

(01095.) die richte kegen der Emere zû.

(01096.) dar quâmen sie eines morgens vrû

(01097.) ûf anderhalb der Eisten her.

(01098.) hui wie schutten sie die sper

(01099.) dô sie einander sâhen!

(01100.) daß was zû mâße nâhen,

(01101.) daß ist noch manchem manne kunt.

(01102.) sie hindert ein vil tiefer grunt,

(01103.) daß nicht zû samne die geschach,

(01104.) und in dem grunde ein bôse bach;

(01105.) des mochten sie zû samne nicht.

(01106.) man hôrte beiderhalb geschricht.

(01107.) sie schußßen vitzern und sper,

(01108.) die cristen hin, die heiden her,

(01109.) sie wurfen kegen widerstrît.

(01110.) dô sûchten wege, des was zît,

(01111.) die Letten, den sie wâren kunt.

(01112.) die brâchten ubir wol gesunt

(01113.) der werden pilgerîmen schar.

(01114.) der meister und die brûdere gar

(01115.) wâren mit in ubir komen.

(01116.) ouch hatten sich wol vor genomen

(01117.) die Letten und die Lîven,

(01118.) sie wolden bie in blîben:

(01119.) mit einer wunnenclîchen schar

(01120.) quâmen sie vil rische dar

(01121.) vollenclîche in lewen wîs.

(01122.) die Eisten kêrten durch prîs

(01123.) vrîlîch ûf der dûtschen schar.

(01124.) des wurden sie durchdrungen gar,

(01125.) daß ir nicht vil zû samne was.

(01126.) man reit sie nider an daß gras

(01127.) als ob sie wêren ungegurt.

(01128.) dâ wart vil manich man gehurt,

(01129.) daß er verre ûß dem satele vûr

(01130.) und rîten immer mê verswûr:

(01131.) sie wurden strîtes wol gewert.

(01132.) dô clungen sô der dûtschen swert

(01133.) daß iß den Eisten missehaget.

(01134.) die wurden ouch dâ von verzaget,

(01135.) sie mûsten vlîhen durch die nôt.

(01136.) ir lac vumfzên hundert tôt,

(01137.) die anderen machten sich enwec;

(01138.) sie sûchten brucken noch den stec,

(01139.) sie vluhen wiltnisse und brûch.

(01140.) sie sprâchen: “nû ist der gotes vlûch

(01141.) vollenclîch an uns argân:

(01142.) daß wir den cristen hân getân

(01143.) daß ist uns wol vergolden.”

(01144.) bliben ungescholden

(01145.) ir gote, daß was ân ir danc.

(01146.) sie brâchten jêmerlîchen sanc

(01147.) iren kinden un diren wîben.

(01148.) die Letten und die Lîven

(01149.) die wâren helde unverzaget:

(01150.) beide an dem strîte und an der jaget

(01151.) entwurchten sie die heidenschaft.

(01152.) des half in got mit sîner craft.

(01153.) die cristen dô die walstat

(01154.) behielden. meister Volkwîn bat,

(01155.) daß niemant lôste sînen helm

(01156.) biß daß gelegen wêre der melm

(01157.) und ouch die jegere quêmen wider.

(01158.) man sûchte ûf und nider

(01159.) ob dâ iemant cristen lêge,

(01160.) der dannoch lebenes pflêge,

(01161.) daß man im hulfe von der nôt:

(01162.) der enwâren nicht den sechzik tôt.

(01163.) die endorfte man nicht sêre clagen,

(01164.) sie wâren dâ durch got irslagen.

(01165.) umme daß êwiclîche leben

(01166.) hatten sie den lîp gegeben.

(01167.) dâ bliben in der selben nôt

(01168.) zwêne brûder bie in tôt.

(01169.) Dô gote daß lob geschach,

(01170.) die pilgerîme an ir gemach

(01171.) zû Rîge kârten drâte.

(01172.) nâch des meisters râte

(01173.) lebeten sie vil gerne dô.

(01174.) sie wâren gotes êre vrô.

(01175.) die Eisten wurben umme vride,

(01176.) in tâten wê des strîtes lide.

(01177.) den gab man in mit râte dô.

(01178.) des was die meiste menje vrô.

(01179.) doch mûte die von Jerwen daß;

(01180.) sie satzten ûf irn alden haß

(01181.) kegen der armen cristenheit.

(01182.) dar nâch des winters wart gereit

(01183.) mit eime here der meister dô.

(01184.) die pilgerîme des wâren vrô,

(01185.) die Letten und die Lîven mite.

(01186.) gar nâch minneclîchem site

(01187.) sûchten sie daß selbe lant.

(01188.) die Oselêre man dar inne vant

(01189.) die stoltzen heiden mit irme her.

(01190.) die hatten gar ân alle wer

(01191.) einen grôßen roub genomen.

(01192.) die cristen wâren dar komen

(01193.) und wolden heren Jerwen lant.

(01194.) dô daß mêre wart bekant,

(01195.) daß die Oselêre wâren dâ,

(01196.) sie îlten nâch in ûf ir slâ.

(01197.) dô sie quâmen in sô nâhen,

(01198.) daß sie einander sâhen

(01199.) die cristen und die heiden,

(01200.) ein strît sie mûste scheiden.

(01201.) die Oselêre satzten sich zû wer.

(01202.) vil wunderlîchen die zwei her

(01203.) dar zû samne quâmen,

(01204.) des grôßen schaden nâmen

(01205.) die Oselêre, ir lac vil tôt.

(01206.) den roub sie ließen stân durch nôt.

(01207.) vil lutzel ir zû lande quam:

(01208.) die wâren doch an vreuden lam.

(01209.) Zû Karidal geschach der strît.

(01210.) ûf deme selben velde lît

(01211.) der Oselêre gebeines vil.

(01212.) daß sûche der is nicht glouben wil.

(01213.) der hertzoge Albrecht der was vrô,

(01214.) mit im daß volc gemeine dô.

(01215.) sie triben wîb und man

(01216.) und grôßen roub mit êren von dan.

(01217.) zû lande hertzoge Albrecht vûr.

(01218.) vil mancher lobete in und swûr,

(01219.) er wêre mit êren dâ gewesen.

(01220.) der sêle helfe got genesen

(01221.) durch sîne grôße erbarmekeit!

(01222.) er was zû tugenden vil bereit.

(01223.) der meister gab die gîsele wider.

(01224.) in die Wîc dâ quâmen sider

(01225.) die Sweden dar mit grôßer craft.

(01226.) die wurden bie in wonhaft.

(01227.) Ein bischof und volkes gnûc,

(01228.) als sie die sê dar ubir trûc,

(01229.) die bûweten in daß lant ein hûs.

(01230.) als die katze mit den mûs

(01231.) spilten die Oselêre:

(01232.) den Sweden wart iß swêre.

(01233.) daß hûs gewunnen sie in an.

(01234.) niekein ir entran,

(01235.) sie slûgen sie algemeine tôt.

(01236.) der bischof leit die selbe nôt.

(01237.) sô man die wârheit sprechen wil,

(01238.) dô half sîn bannen mâßen vil.

(01239.) dô des der meister wart gewar,

(01240.) er sante boten zû in dar

(01241.) und ließ sie vrâgen mêre,

(01242.) waß ir wille wêre

(01243.) kegen der cristenheit.

(01244.) die in der Wîc wâren gemeit,

(01245.) daß sie der Sweden wâren vrî.

(01246.) die Oselêre in wonten bî;

(01247.) den hatten sie gelobet daß,

(01248.) daß sie dem gelouben trûgen haß;

(01249.) den wolden sie verkiesen gar.

(01250.) mit eime here der meister dar

(01251.) vûr nâch vientlîchem site,

(01252.) die Letten und die Lîven mite,

(01253.) zû Suntaken ûf daß velt.

(01254.) die in der Wîc durch widergelt

(01255.) quâmen mit irme here zû.

(01256.) vumfhundert wâren der zû vrû

(01257.) des morgens unrecht ûf gestân:

(01258.) die mûsten dâ daß leben lân.

(01259.) die gîsele sie zû undanke dô

(01260.) gâben und wâren vrô,

(01261.) daß ir nicht mêr geslagen wart.

(01262.) der meister ûf der widervart

(01263.) kârte dô zû lande

(01264.) vil gar ân alle schande.

(01265.) sie hatten alle roubes gnûc,

(01266.) jener sleifte, dirre trûc,

(01267.) sô man in den reisen pfliget.

(01268.) dâ was mit êren wol gesiget.

(01269.) Die Eisten dô verkêrten sich.

(01270.) sie wâren grimmes mûtes rîch:

(01271.) wâ sie die cristen quâmen an,

(01272.) eß wêre kint, wîb oder man,

(01273.) die giengen vor dem winde hin.

(01274.) ir was doch nicht vil under in,

(01275.) den cristen geloube wêre bî.

(01276.) sus worchten sich die Eisten vrî

(01277.) und nâmen ir apgote wider;

(01278.) den cristentûm sie slûgen nider.

(01279.) dô gieng eß in der selben nôt

(01280.) an eines armen mannes tôt.

(01281.) der was ein dûtscher, mâßen rîch;

(01282.) mit nâlden bejagete er sich,

(01283.) von durfe zû durfe trûc er die.

(01284.) des amtes er sich begie.

(01285.) der quam an eine stat gegân,

(01286.) dâ er gûte vrûnde wânte hân.

(01287.) der wirt in gûtlîch entpfienc,

(01288.) daß doch zû bôsem ende ergienc.

(01289.) er gab im zû eßßene und sprach:

(01290.) “ensorge nicht vor ungemach:

(01291.) ich behûte dich vor schaden.

(01292.) wir suln mit einander baden.”

(01293.) man machte in eine stube warm.

(01294.) der wirt nam undir sînen arm

(01295.) zwei biel, dâ der gast nicht sach.

(01296.) zû sînem wîbe er alsô sprach:

(01297.) “hilf mir slâen disen man:

(01298.) des lîbes ich im nicht engan.

(01299.) dû salt wesen vor der tur:

(01300.) nim war als er gêet her vur,

(01301.) sô slâ in an daß houbet sîn.

(01302.) ich tû dir danne helfe schîn,

(01303.) daß er vil schîre tôt gelît.”

(01304.) daß gelobete sie im ân allen strît.

(01305.) daß was ein verwâßen rât.

(01306.) sie vollenvûren mit der tât:

(01307.) vil jêmerlîche morten sie in.

(01308.) zû pusche er wart gesleifet hin,

(01309.) dâ bleib er ligende alsô blôß.

(01310.) daß wîb daß gienc mit kinde grôß.

(01311.) dar nâch sie schiere des genas:

(01312.) waß wunden an dem tôden was,

(01313.) die sie und ir man slûc,

(01314.) daß kint die wunden alle trûc

(01315.) zû glîcher wîs alsô der man.

(01316.) dâ sach man gotes zeichen an:

(01317.) der alle die werlt berichten sol

(01318.) der rach iß an den Eisten wol.

(01319.) daß mêre quam in manich lant;

(01320.) des wart zû Rôme ein brief gesant:

(01321.) von Modele Wilhelm ein legât

(01322.) daß selbe ding geschriben hât.

(01323.) die rede sage ich ûch vor wâr,

(01324.) daß kint wol anderhalbeß jâr

(01325.) mit den wunden lebete alsô.

(01326.) man sach die mûter selden vrô.

(01327.) waß mac man dâ von sprechen mê?

(01328.) dem vater tet daß jâmer wê.

(01329.) daß dorf Poderejal ê hieß,

(01330.) dâ got daß zeichen werden ließ.

(01331.) die geinôte Karkus ist genant,

(01332.) die hân die brûdere in der hant.

(01333.) Des anderen jâres daß crûce nam

(01334.) der grêve Albrecht. ouch uber quam

(01335.) der helt von Orlamunde

(01336.) vor alle sîne sunde;

(01337.) mit im vil manich ritter gût.

(01338.) sie hatten ellenthaften mût

(01339.) zû strîtene ûf die heidenschaft.

(01340.) der grêve mit vil grôßer craft

(01341.) was komen dâ zû Nieflant.

(01342.) die brûdere tâten in bekant,

(01343.) daß sie irre kumfte wâren vrô.

(01344.) man entpfienc sie lieblîchen dô

(01345.) beide arme und rîche.

(01346.) der meister williclîche

(01347.) tet alleß des sie gerten dô.

(01348.) des wâren die pilgerîme vrô.

(01349.) dô sie gemaches hatten gepflegen

(01350.) und ir mûde was gelegen,

(01351.) der meister mit den sînen

(01352.) gienc zû den pilgerînen.

(01353.) der grêve vrâgen dô began,

(01354.) wie iß in dem lande wêre getân,

(01355.) von weme die cristen ungemach

(01356.) liden. sân der meister sprach:

(01357.) “wir sint mit manchen landen belegen,

(01358.) die alle strîtes ûf uns pflegen.

(01359.) ein heidenschaft die Eisten sint.

(01360.) des rechten gelouben sint sie blint:

(01361.) sie hetten den touf an sich genomen,

(01362.) nû ist iß leider dar zû komen,

(01363.) daß sie die valschen apgot

(01364.) an beten durch des tûvels spot.

(01365.) waß cristen in irme lande was,

(01366.) der wênic ie dekein genas.

(01367.) nû gebet uns, hêrre, ûweren rât.

(01368.) ir hôret wol, wie iß hie stât.”

(01369.) grêve Albrecht der sprach dô:

(01370.) “ich bin des von herzen vrô,

(01371.) daß ich die heiden sûchen sol.

(01372.) ich getrûwe dem gûten gote sô wol,

(01373.) daß wir uns an in rechen sô,

(01374.) daß sie des nimmer werden vrô.”

(01375.) Der meister und die brûdere sîn

(01376.) und vil manich pilgerîn,

(01377.) Letten und Lîven,

(01378.) die enwolden nicht belîven.

(01379.) dô sûchte man kein der Eisten lant:

(01380.) die heiden man dar inne vant.

(01381.) sie enwolden nicht entwîchen:

(01382.) harte stoltzlîchen

(01383.) brâchten in die Eisten strît

(01384.) daß gûte hûs zû Velîn lît

(01385.) nicht verre von der walstat

(01386.) dâ man sie kampfes machte sat

(01387.) wol anderhalbe mîle.

(01388.) in einer kurtzer wîle

(01389.) vierzên hundirt tôt bliben.

(01390.) ir hôchvart wart in în getriben

(01391.) mit der brûdere helfe dô.

(01392.) die Letten und die Lîven vrô

(01393.) wâren und hôchgemût.

(01394.) sie hatten êre und gût

(01395.) erworben in deme strîten.

(01396.) ouch gâben in den zîten

(01397.) die Eisten zêenden immer mê,

(01398.) in wurde wol oder wê,

(01399.) von allem irme gûte.

(01400.) der cristenheit zû hûte

(01401.) suln sie burge bûwen.

(01402.) ich wil in wol getrûwen,

(01403.) mochten sie is erlâßen sîn,

(01404.) sie envurchten nicht der helle pîn.

(01405.) sie geben mildeclîch ir brôt.

(01406.) sie bûwen kirchen durch die nôt

(01407.) in deme cristentûme.

(01408.) nâch gotelichem rûme

(01409.) leider selden daß geschicht:

(01410.) entwungen sie ir hêrren nicht,

(01411.) sô man die wârheit sprechen sol,

(01412.) sô wêren sie is erlâßen wol.

(01413.) von Orlamunde grêve Albrecht

(01414.) der was ein pilgerîm, gerecht

(01415.) biß er zû lande wider quam.

(01416.) Des anderen jâres daß crûce nam

(01417.) von Wentlande er Barwîn

(01418.) mit rittern unde knapen sîn.

(01419.) schône samenunge,

(01420.) stoltze helde junge

(01421.) brâchte er zû Nieflande dô.

(01422.) des wâren rîche und arme vrô.

(01423.) sus bereite sich die cristenheit,

(01424.) daß was den Littowen leit.

(01425.) der wurfen dô zû samne sich

(01426.) vumfzên hundert. noch wên ich,

(01427.) daß sie der tûvel vûrte:

(01428.) kein her sich nie gerûrte

(01429.) sô vrevelîchen in vremde lant,

(01430.) sô von den selben wart bekant.

(01431.) durch Semegallen vûren sie.

(01432.) daß was dâ vor geschêen nie,

(01433.) eß sol geschêen kûme mê.

(01434.) zû Swurben vûren sie ubir sê,

(01436.) als eß Perkune ir apgot gap

(01437.) daß nimmer sô hart gevrôs.

(01438.) sie wâren kûne unde lôs.

(01439.) sus herten sie durch Osellant,

(01440.) sie stiften roub und brant,

(01441.) sie engerten keiner sône.

(01442.) dar nâch sie herten Mône.

(01443.) daß lac ouch in dem mere dâ bie.

(01444.) sie wâren ires gemûtes vrie,

(01445.) sie strichen ûf daß selbe lant,

(01446.) daß niemant nâhen nicht envant,

(01447.) vil gewaldeclîchen dô;

(01448.) sie machten manchen man unvrô.

(01449.) dar nâch kârten sie in die Wîk;

(01450.) beide strâße unde stik

(01451.) mit blûte sie begußßen.

(01452.) die lûte ir nicht genußßen:

(01453.) wâ sie sich hine kêrten

(01454.) daß volc sie sterben lêrten,

(01455.) eß wêre wîb oder man,

(01456.) waß in mit nôten nicht entran.

(01457.) sie envurchten niemandes drô.

(01458.) in daß lant zû Jerwen dô

(01459.) sie riten vrîlîche.

(01460.) dô enwas kein wirt sô rîche,

(01461.) er enwêre lieber anderswâ

(01462.) gewesen, danne bie in dâ.

(01463.) daß lant was gût und grôß

(01464.) und dannoch waldes alsô blôß,

(01465.) daß in des volkes kleine entran.

(01466.) sie slûgen manchen rischen man,

(01467.) die sich wol mochten hân gewert,

(01468.) wêr ir gelucke nicht verzert.

(01469.) dâ wâren sie von vurchten blint,

(01470.) des beide wîb unde kint

(01471.) entgulden mit vil grôßer nôt.

(01472.) ir bleib vil in dem lande tôt

(01473.) zû der selben stunde.

(01474.) daß lant zû Normegunde

(01475.) herten sie zû hûse wider.

(01476.) sie slûgen alleß daß dar nider,

(01477.) daß sie bejagen kunden.

(01478.) vil manche tiefe wunden

(01479.) hiwen sie mit vrîer hant.

(01480.) sie herten ouch durch Sackellant,

(01481.) sô wider durch die Letten hin.

(01482.) sie enhatten nie sô grôß gewin.

(01483.) in geschach dar nâch unheil;

(01484.) die vergulden es in ein teil.

(01485.) zû Remyn sie dô quâmen zû;

(01486.) daß dûchte die Lîven alzû vrû,

(01487.) sie wâren ûf iren schaden komen

(01488.) und hatten grôßen roub genomen:

(01489.) rindere, pfert, wîb und man

(01490.) sie triben stoltzlîchen dan.

(01491.) Die mêre quâmen drâte

(01492.) eime brûdere zû Aschrâte,

(01493.) der dâ pfleger was.

(01494.) die besten lûte er zû sich las

(01495.) und zwelf brûdere wol bereit.

(01496.) in was der cristen jâmer leit.

(01497.) hine zû Lenewarte dô

(01498.) gâhete er vil drâte sô.

(01499.) die Letten quâmen kegen in dar

(01500.) mit einer vil gevûger schar.

(01501.) er hatte nicht vier hundert man,

(01502.) mit den er strîtes dô began.

(01503.) die Littowen triben hin

(01504.) zû lande wart. dô volgete in

(01505.) brûder Lupprecht mit der cleinen schar.

(01506.) die wâren grimmes mûtes gar

(01507.) durch vrûnt und durch ir mâge.

(01508.) sie achten keiner lâge,

(01509.) sie wolden lâßen dô den lîp,

(01510.) sie enlôsten man und wîp.

(01511.) sie quâmen an dem dritten tac

(01512.) dâ daß her der heiden lac.

(01513.) sie wâren aller hûte vrî:

(01514.) durch recht in wonte mûde bî,

(01515.) zû rûwene stûnt ir aller ger.

(01516.) verhowen hatten sie die sper

(01517.) von den scheften alle,

(01518.) daß quam in ouch zû valle.

(01519.) Wie brûder Lupprecht balde sprach,

(01520.) dô er die heiden vor im sach:

(01521.) “ir Letten und ir Lîven

(01522.) ir sult zû samne blîven!

(01523.) sehet an wîp und an kint,

(01524.) die vor ûch hie gebunden sint.

(01525.) eß ist beßßer hie gelegen tôt,

(01526.) wir enhelfen in von dirre nôt.”

(01527.) daß was ir aller wille gar.

(01528.) sie quâmen mit der cleinen schar

(01529.) harte bitterlîchen zû,

(01530.) die Littowen sie zû vrû

(01531.) triben ûß dem bette.

(01532.) dâ gab vil mancher wette,

(01533.) daß er dar umme tôt gelac.

(01534.) beide stich unde slac

(01535.) was dâ wol veile.

(01536.) die Letten zû irme teile

(01537.) slûgen dâ vil manchen man.

(01538.) waß den Lîven ir entran

(01539.) die brûdere slûgen sie dar nider.

(01540.) sus gâben sie den roub wider

(01541.) mit grôßen unêren.

(01542.) drî vlohen alsô sêre,

(01543.) daß sie die mêre brâchten hein.

(01544.) mir ist als ein bast wer drumme grein.

(01545.) ir vlîen was vil wol gewant,

(01546.) sie hiengen selbe sich zû hant.

(01547.) die getouften lobeten Crist,

(01548.) der al der werlde lôser ist.

(01549.) sie lôsten wîp und man

(01550.) und triben grôßen roub von dan

(01551.) zû lande vrôlîche.

(01552.) den teilten sie gelîche.

(01553.) Dô gienc iß als iß dicke tût:

(01554.) geschiet dem armen manne ein gût,

(01555.) daz iß der bôse nîdet

(01556.) und unsamfte lîdet.

(01557.) die Rûßen nâmen sich daß an,

(01558.) daß der cristentûm began

(01559.) sich in dem lande mêren:

(01560.) daß wolden sie verkêren.

(01561.) eß was in von herzen leit.

(01562.) mit eime grôßen her vil breit

(01563.) vûren sie ûf den cristentûm.

(01564.) sie herten vaste durch iren rûm

(01565.) biß sie zû Nieflant quâmen.

(01566.) grôßen roub sie nâmen

(01567.) ûf die armen cristenheit.

(01568.) dâ zû Ymmenkulle man sie bestreit,

(01569.) sie hatten verre gnûc gevarn.

(01570.) vil hart begunden sie sich scharn.

(01571.) die cristen von der Rîge zû

(01572.) quâmen eines morgens vrû,

(01573.) vil manich tûre pilgerîn,

(01574.) der meister und die brûdere sîn

(01575.) zû in ûf ein schôneß velt.

(01576.) die Letten und die Lîven gelt

(01577.) in gâben vrîlîche.

(01578.) vil manche brunje rîche

(01579.) sach man dâ durchstechen,

(01580.) ir helme vil zubrechen

(01581.) mit den dûtschen swerten.

(01582.) die wîle sie strîtes gerten

(01583.) des wart in dâ die hende vol.

(01584.) nûnzêen hundert gâben zol,

(01585.) die wurden aldâ tôt geslagen;

(01586.) die anderen sach man balde jagen

(01587.) wider heim zû lande.

(01588.) in tût noch wê die schande.

(01589.) sie vluhen vreislîche:

(01590.) vil maniche banier rîche

(01591.) ließen sie ûf der walstat.

(01592.) sie vluhen manchen bôsen pfat

(01593.) und dar zû breite strâße.

(01594.) vil brunjen ûßer mâße

(01595.) von stâle und von golde

(01596.) sie gâben dâ zû solde,

(01597.) vil manchen helm liechtgevar.

(01598.) die wege, die sie quâmen dar,

(01599.) mit schilden wurden wol bespreit.

(01600.) die cristen wâren des gemeit.

(01601.) ûf dem selben nâch jagen

(01602.) vumf hundert Rûßen wart geslagen;

(01603.) zû Ogenhûsen daß geschach.

(01604.) sie liden michel ungemach.

(01605.) ir konic den jâmerleist rief,

(01606.) wan im sîn pfert nicht balde lief.

(01607.) sie riefen wâfen ubir al.

(01608.) den selben jêmerlîchen schal

(01609.) vûrten sie mit in von dan.

(01610.) sie ließen manchen stoltzen man

(01611.) zû gîsele vor der cristenheit,

(01612.) der nimmer pfert mê ubirschreit.

(01613.) Sus breite got sîn êre

(01614.) zû Nieflande sêre:

(01615.) sîn name wart ie baß bekant.

(01616.) nû was gelegen Osellant

(01617.) in dem mere bevloßßen.

(01618.) des hatten sie genoßßen,

(01619.) daß man sie sûchte nicht mit her.

(01620.) des sumers harte cleine wer

(01621.) bedurften sie, die rede ist wâr.

(01622.) des sâßen sie vil manich jâr

(01623.) des gelouben und des zinses vrî.

(01624.) betrogenheit in wonte bî.

(01625.) des somers herten sie die lant

(01626.) mit schiffen, dâ eß in was bekant;

(01627.) sie tâten dicke schaden grôß.

(01628.) den meister sêre des verdrôß:

(01629.) der sûchte rât in alle wîs,

(01630.) wie man des winters uber îs

(01631.) zû deme lande quême

(01632.) und in die vrîheit nême.

(01633.) daß wart im doch gemachet kunt,

(01634.) daß alsô starke gevrure der sunt,

(01635.) dâ mite daß lant bevloßßen ist;

(01636.) zwû mîle mûß man sundir vrist

(01637.) des somers zît mit schiffen varn.

(01638.) vor steinen mûß man sich bewarn,

(01639.) der liet dâ mancher in dem mer.

(01640.) wer dâ sûchen wil mit her,

(01641.) îs wirt in winter kalden tagen

(01642.) eß mochte hundert her getragen.

(01643.) der meister wart der rede vrô.

(01644.) ouch quâmen pilgerîme dô

(01645.) zû Rîge werdeclîche

(01646.) beide arme und rîche.

(01647.) Der grêve dâ von Arnstein

(01648.) der was der besten ritter ein

(01649.) in Duringen und in Vranken.

(01650.) got mochte im vil wol danken,

(01651.) daß er sô verre pilgerîn

(01652.) durch sîn êre wolde sîn.

(01653.) dar nâch schûf sich der winter hart.

(01654.) mit den pilgerîmen wart

(01655.) der meister dâ zû râte.

(01656.) er hieß gebieten drâte

(01657.) ein her ûß ubir al die lant.

(01658.) dâ mite vûr er al zû hant

(01659.) kein Osele, wen daß îs was vast.

(01660.) er brâchte manchen stoltzen gast

(01661.) vur daß hûs zû Mône dô;

(01662.) des wurden die Oselêre unvrô.

(01663.) dâ was vil manich degen balt.

(01664.) die burg sie gewunnen mit gewalt.

(01665.) Sie slûgen in der selben nôt

(01666.) wol vumf und zwênzik hundert tôt,

(01667.) beide wîb, kint und man.

(01668.) vil listeclîchen einer entran,

(01669.) der genôß behendekeit;

(01670.) sîn selbes bok in dar umme reit,

(01671.) den warf er ûf den rucke sîn

(01672.) rechte als ein ander pilgerîn.

(01673.) er trûc in hin und her

(01674.) alsô lange, biß daß er

(01675.) mit vûge von dem here entlief.

(01676.) ich weiß wol daß er nicht enslief

(01677.) biß er zû sînen vrûnden quam.

(01678.) daß volc er zû samne nam,

(01679.) er sagete in die mêre dô.

(01680.) daß volc wart algemein unvrô.

(01681.) durch vurchte satzte sich zû hant

(01682.) daß volc gemein in Osellant.

(01683.) sîn kint gab vil manich man;

(01684.) die gîsele vûrte man von dan.

(01685.) dô vûr der helt von Arnstein

(01686.) und andere pilgerîme heim

(01687.) zû lande wol mit êren.

(01688.) got mûß ir sêlde mêren

(01689.) dâ sie es bedurfen beste!

(01690.) Ander werde geste

(01691.) daß crûce entpfiengen, der was vil,

(01692.) sô man die wârheit spechen wil,

(01693.) daß ir nie mê zû Nieflant quam.

(01694.) der meister Volkwîn gerne nam

(01695.) ûf die Semegallen.

(01696.) eß was im wol gevallen,

(01697.) er mochte rechen dâ sîn leit.

(01698.) mit eime starken her vil breit

(01699.) vûr er zû in in daß lant.

(01700.) Vester den konic zû hûs er vant,

(01701.) der quam mit grôßer menje zû.

(01702.) got der half der sînen dû

(01703.) kegen den heiden, des was zît.

(01704.) eß mûste gân an einen strît.

(01705.) die Semegallen wâren stoltz,

(01706.) sie schußßen vitzern sam den boltz,

(01707.) als man tût zû einem mâle.

(01708.) pfîle und strâle

(01709.) die dûtschen schußßen in dâ wider.

(01710.) der heiden slûgen sie dâ nider

(01711.) sechzên hundert tôt.

(01712.) die anderen wichen durch die nôt.

(01713.) der meister in dem lande lac

(01714.) drî wochen. wie man sîn dô pflac,

(01715.) des mochten sie wol nemen war,

(01716.) durch die er was geriten dar:

(01717.) wâ der gast gebieten mac

(01718.) dâ hât der wirt vil swâren tac.

(01719.) die cristen wol mit êren

(01720.) zû lande mochten kêren.

(01721.) sie triben grôßen roub von dan,

(01722.) kinder, wîb und man

(01723.) und waß man in dem lande vant.

(01724.) zû hûs sie brâchten vol die hant.

(01725.) zû schiffunge vûren hin

(01726.) die pilgerîme. got sie mit in

(01727.) und helfe ir sêlen ûß aller nôt,

(01728.) sie sîn lebende oder tôt!

(01729.) Den konic Vesters row sîn leit.

(01730.) des anderen jâres wart er bereit

(01731.) mit eime here vil drâte.

(01732.) er vûr kegen Aschrâte.

(01733.) dâ jagete er in der brûdere lant,

(01734.) er nam von roube vol die hant,

(01735.) im was vil liebe zû der vart.

(01736.) ein brûder, der hieß Marquart,

(01737.) was dâ pflegêre dô.

(01738.) der was der mêre mâßen vrô.

(01739.) er tet doch lutzel deme glîch

(01740.) und sante boten umme sich

(01741.) nâch Letten und nâch Lîven,

(01742.) bî den er wolde blîven

(01743.) beide lebende und tôt,

(01744.) er enhulfe den armen ûß ir nôt,

(01745.) die dâ gevangen wâren.

(01746.) er kunde wol gebâren

(01747.) zû ernstlîchen dingen:

(01748.) des mûste in wol gelingen.

(01749.) die Semegallen triben dan

(01750.) irn roub. in volgen dô began

(01751.) brûder Marquart und die sîne.

(01752.) er wolde lîden pîne,

(01753.) er enlôste die cristen ûß ir hant.

(01754.) er zogete nâch, biß er sie vant

(01755.) des morgens ûf der vûerstat.

(01756.) nû merket, wie er die sîne bat!

(01757.) Er sprach: “gedenket, helde gût,

(01758.) daß ûwer vleisch und ûwer blût

(01759.) hie vor ûch stât gebunden.

(01760.) zû disen selben stunden

(01761.) sul wir lâßen hie den lîp,

(01762.) wir enlôsen man und wîp.”

(01763.) des râtes wurden sie alle vrô.

(01764.) harte grimmeclîchen dô

(01765.) strîtes sie begunden.

(01766.) sie slûgen tiefe wunden

(01767.) mit speren und ouch mit swerten.

(01768.) kampfes sie gewerten

(01769.) vil rische Vesters her.

(01770.) vumf hundert quâmen der zûr wer,

(01771.) die slûgen sie alle gemeine tôt.

(01772.) er selbe entran mit grôßer nôt:

(01773.) er greif zûr were in sîne hant

(01774.) einen ungeschulten brant.

(01775.) brûder Marquart wart sîn gewar,

(01776.) vil snelle rante er ûf in dar,

(01777.) als er in rechte hatte erkorn.

(01778.) er was von Burbach geborn

(01779.) und was von art ein ritter gût.

(01780.) sîn êre hatte er wol behût;

(01781.) in lobet dâ noch vil manich man.

(01782.) der sêle ich immer heiles gan!

(01783.) sîn urs ein teil in ubir trûc:

(01784.) Vesters im ûß dem munde slûc

(01785.) ich enweiß des nicht wie manchen zan.

(01786.) ûf eine burg er im entran.

(01787.) brûder Marquart was des mâßen vrô,

(01788.) daß er im was entloufen sô.

(01789.) die cristen lobeten alle got.

(01790.) sie sprâchen: “nû ist des tûvels spot

(01791.) an der heidenschaft ergân.

(01792.) unser scheppfer hât getân

(01793.) kein uns vil genêdeclîche.”

(01794.) sie lôsten lieblîche

(01795.) kinder, wib und man

(01796.) und triben grôßen roub von dan;

(01797.) sie brâchten brunjen und pfert

(01798.) zû hûs mancher marke wert.

(01799.) Die cristen wurden alle vrô.

(01800.) sie lobeten got von himel dô

(01801.) aller sîner gûte.

(01802.) dem meister daß gemûte

(01803.) stûnt zû Littowen;

(01804.) dâ mûste man in schowen.

(01805.) er vûr zû Alsen in daß lant.

(01806.) ein michel her er vor im vant

(01807.) von den heiden ubir al.

(01808.) die quâmen kein im âne zal

(01809.) mit rûme und ouch mit schalle

(01810.) zû des tôdes valle.

(01811.) der meister sprach den sînen zû:

(01812.) “gedenket, zîren helde, nû,

(01813.) durch waß wir her komen sîn;

(01814.) daß lât noch hûte werden schîn.

(01815.) wollet ir âne schande

(01816.) komen heim zû lande,

(01817.) sô enlât ûch nicht bedrowen.

(01818.) wir suln uns hinne howen

(01819.) mit gotes helfe und ouch mit wer.”

(01820.) sie riefen ubir al daß her:

(01821.) “lât nû die rede ein ende hân,

(01822.) wir suln den êrsten kouf bestân

(01823.) mit speren und ouch mit swerten.”

(01824.) zû strîte sie alle gerten

(01825.) recht als ein hungeric vedirspil.

(01826.) der heiden wart geslagen vil

(01827.) von den von Eistenlande.

(01828.) die Letten wolden schande

(01829.) hân, sie envêchten umme prîs,

(01830.) die Lîven wâren helde wîs,

(01831.) die wol zû strîte tochten.

(01832.) sus wart der strît ervochten.

(01833.) zwei tûsent Littowen

(01834.) wurden dâ zuhowen,

(01835.) die bliben ûf der walstat.

(01836.) die anderen wâren strîtes sat,

(01837.) sie vluhen dan in mancher wîs.

(01838.) got gab den sînen dâ den prîs.

(01839.) die cristen wâren alle vrô;

(01840.) zû lande kêrten sie sich dô.

(01841.) got was vil wol irs lobes wert:

(01842.) vumf und zwenzic hundert pfert

(01843.) sie den heiden nâmen.

(01844.) zû hûs sie wider quâmen

(01845.) mit ellenthaftem mûte.

(01846.) sus half in got der gûte.

(01847.) Der gûte meister Volkwîn

(01848.) vernam und andere brûdere sîn

(01849.) von einem orden geistlîch,

(01850.) der wêre gerecht und êrlîch

(01851.) zû dem dûtschen hûse irhaben,

(01852.) daß sie die siechen solden laben

(01853.) und ouch wêren rittere gût.

(01854.) dâ want er allen sînen mût,

(01855.) daß sîn orden quême zû in.

(01856.) des sante er an den pâbest hin

(01857.) sô lange, daß sîn wille ergienc,

(01858.) daß sie daß dûtsche hûs entpfienc.

(01859.) Dar under bleib er leider tôt,

(01860.) als eß got ubir in gebôt;

(01861.) vil gar ân alle die schulde sîn

(01862.) mit im manich pilgerîn,

(01863.) der was dô vil zû Rîge komen.

(01864.) die hatten dicke wol vernomen,

(01865.) wie iß in dem lande was getân:

(01866.) die enwolden in des nicht erlân,

(01867.) er envûre des somers herevart;

(01868.) dar umme er vil gebeten wart.

(01869.) von Haseldorf ein edil man

(01870.) der legete sînen vlîß dran,

(01871.) von Dannenberg ein grêve gût:

(01872.) dâ stûnt vil manches heldes mût

(01873.) hin zû Littowen.

(01874.) “ir mûßet ûch dannen howen”

(01875.) sprach dô meister Volkewîn,

(01876.) “des habet ûch die trûwe mîn.”

(01877.) daß hatten sie alle wol vernomen.

(01878.) “dar umme sie wir her komen”

(01879.) sprâchen sie alle glîche,

(01880.) beide arm unde rîche.

(01881.) den krîg in meister Volkwîn lie.

(01882.) er sprach: “wir sîn durch got ouch hie,

(01883.) der mac uns harte wol bewarn.

(01884.) wir suln gerne mit ûch varn,

(01885.) sint ûch sô nôt strîtene ist.

(01886.) gebet uns eine wîle vrist,

(01887.) ich brenge ûch kurtzlîch an die stat,

(01888.) dâ wir des alle werden sat.”

(01889.) er sante boten kegen Rûßen lant

(01890.) nâch helfe. die quâmen in zû hant:

(01891.) die Eisten mit vil mancher schar

(01892.) quâmen willenclîchen dar;

(01893.) die Letten und die Lîven

(01894.) zû hûs nicht wolden blîven.

(01895.) die pilgerîme des wâren vrô.

(01896.) sie wurfen sich zû samne dô

(01897.) mit eime schônen here vil breit:

(01898.) zû Littowen man dô reit

(01899.) durch velt und uber manche bach.

(01900.) sie liden michel ungemach

(01901.) biß daß sie quâmen in daß lant.

(01902.) sie stiften roub und brant

(01903.) mit mancher schar vil wunneclîch.

(01904.) sie herten vrîlîch umme sich

(01905.) daß lant ûf unde nider.

(01906.) kein Soule sie kârten wider

(01907.) durch brûch und uber heide.

(01908.) Owê der grôßen leide,

(01909.) daß die reise ie wart bedâcht!

(01910.) ûf eine bach sie wurden brâcht,

(01911.) dâ sie die viende sâhen.

(01912.) dâ sach man lutzel gâhen

(01913.) vil manchen, der zû Rîge streit.

(01914.) der meister zû den besten reit,

(01915.) er sprach: “nû strîten, des ist zît!

(01916.) al unser êre dar an lît:

(01917.) wir slahen die êrsten nû dar nider,

(01918.) sô moge wir vrîlîchen wider

(01919.) heim zû lande rîten.”

(01920.) “wir enwollen hie nicht strîten”

(01921.) sprâchen dô die helde wert:

(01922.) “ob wir verliesen unser pfert,

(01923.) sô mûße wir zû vûße stân.”

(01924.) der meister sprach: “sô wolt ir lân

(01925.) die houbte mit den pferden hie?”

(01926.) er sagete vor als iß in ergie.

(01927.) die heiden quâmen vaste zû.

(01928.) des anderen tages dô wânten vrû

(01929.) die cristen dannen rîten,

(01930.) dô mûsten sie strîten

(01931.) mit den heiden ân irn danc.

(01932.) ir were was in dem brûche kranc,

(01933.) man slûc sie nider sam die wîp.

(01934.) mich jâmert manches heldes lîp,

(01935.) der âne wer dâ wart geslagen.

(01936.) ir genûc sach man sô verzagen,

(01937.) daß sie zû lande vluhen wider:

(01938.) die Semegallen die dar nider

(01939.) slûgen jâmerlîche

(01940.) beide arm und rîche.

(01941.) der meister und die brûdere sîn

(01942.) die tâten heldes were dâ schîn

(01943.) biß in ir ros gelâgen tôt.

(01944.) zû vûß sie trâten in die nôt:

(01945.) sie velten dannoch manchen man,

(01946.) ê man den sig an in gewan.

(01947.) der gûte meister Volkewîn

(01948.) trôste wol die brûdere sîn.

(01949.) achte und vierzik der dâ bliben,

(01950.) die wurden manchen warp getriben.

(01951.) die Littowen sie mit nôt

(01952.) zû lest mit boumen velten tôt.

(01953.) ir sêlen mûße got bewarn:

(01954.) sie sint mit êren hin gevarn,

(01955.) mit in vil manich pilgerîn;

(01956.) got mûße in allen genêdic sîn

(01957.) durch sînen jêmerlîchen tôt,

(01958.) und helfe in sêlen ûß aller nôt!

(01959.) Alsus nam meister Volkewîn

(01960.) daß ende und ouch die brûdere sîn.

(01961.) er was meister, hôrte ich sagen,

(01962.) nûnzên jâr bie sînen tagen.

(01963.) ir hât daß alle wol verstân,

(01964.) waß got genâden hât begân

(01965.) bie sîner zît, des weiß man vil,

(01966.) dâ von ich nicht mê sprechen wil

(01967.) von deme grôßen valle.

(01968.) die cristen wurden alle

(01969.) dâ zû Nieflande unvrô.

(01970.) die brûder santen aber dô

(01971.) boten, den was harte gâch,

(01972.) zû dem wîsen manne von Salzâch,

(01973.) der des dûtschen hûses meister was.

(01974.) dô man die brîve vor im gelas,

(01975.) er trôste die boten und sprach:

(01976.) “wir suln diß ungemach

(01977.) durch got von himelrîche tragen.

(01978.) ich sende in kurtzlîchen tagen

(01979.) alsô vil brûdere dar,

(01980.) daß wol irvullit wirt die schar.”

(01981.) capitel er zû hant gebôt

(01982.) vil snelle durch die selbe nôt.

(01983.) vil minneclîchen er dô bat

(01984.) lieplîchen an unses hêrren stat

(01985.) die kummentûre ubir al,

(01986.) daß sie disen grôßen val

(01987.) hulfen ûf richten.

(01988.) “wir mûßen mit in pflichten”

(01989.) sprach er, “sie sint uns gegeben

(01990.) ummer mê die wîle daß wir leben:

(01991.) daß ist recht nâch geistlîcher kure.

(01992.) wir suln uns alle sehen vure,

(01993.) daß wir die besten brûdere dar

(01994.) senden.” daß geschach vil gar.

(01995.) sie welten einen under in,

(01996.) der hatte tugenthaften sin,

(01997.) zû meistere wider in daß lant:

(01998.) brûder Herman Balke was er genant.

(01999.) man sûchte die besten brûdere dô,

(02000.) die ouch der verte wâren vrô:

(02001.) vier und vumfzik helde wert.

(02002.) urs, cleider und pfert

(02003.) gab man in vollenclîchen.

(02004.) sie vûren hovelîchen

(02005.) kegen Nieflande.

(02006.) dar quâmen sie âne schande.

(02007.) sie entpfiengen wirdeclîchen

(02008.) beide arme und die rîchen;

(02009.) ir wart getrôstet wol daß lant.

(02010.) die gotes rittere al zû hant

(02011.) ir zeichen legeten sie dar nider,

(02012.) daß swartze crûce entpfiengen sie wider

(02013.) von deme dûtschen hûse dô.

(02014.) des wart des landes meister vrô

(02015.) und alle, die von dûtschen lant

(02016.) mit in wurden is gesant.